PAGBASA I

Mal 3:1-4

Pagbasa tikang han basahan ni Malaquias nga Manaragna.

Nagbaton an Ginoo nga Labi Kamakagarahum, “Susugoon ko an akon magsarangyaw hin pag-andam han dalan para ha akon. Niyan maabot dayon ngadto han iya Templo an Ginoo nga iyo ginpipinamiling. Maabot an magsarangyaw nga iyo karuyag hikit-an ngan magsasangyaw hiya han akon ginsaaran.” Kundi hin-o man an makakailob han adlaw nga ikakanhi niya? Hin-o an mabubuhi kon magpakita na hiya? Sugad hiya hin mapintas nga sabon, sugad hin kalayo nga nagpupurog hin metal. Maabot hiya hin paghukom sugad hin tawo nga nagpupurog ngan naghihinlo hin salapi. Sugad hin usa nga panday hin metal nga nagpupurog hin salapi ug bulawan, paglilinisan man han magsarangyaw han Ginoo an kapadian basi pagdad-on nira ngadto han Ginoo an angay nga mga halad. Niyan makakapahimuot na han Ginoo an mga halad nga gindadara ha iya han mga tawo han Juda ug Jerusalem sugad han hadto anay.

An Pulong han Ginoo.

SALMO RESPONSORIO

Sal 24:7, 8, 9, 10

℟. Hin-o ini nga hadi han kahimayaan? Amo hiya an Ginoo.

1. Buksi hin maupay an mga ganghaan,

abrehi an mga daan nga portahan;

kay amo ini an iya pag-aagian,

han kusgan nga hadi han kahimayaan.

℟. Hin-o ini nga hadi han kahimayaan? Amo hiya an Ginoo.

2. Hin-o ini nga hadi han kahimayaan?

An Ginoo nga makusog ngan gamhanan;

an Ginoo nga dara an pagdarag-an,

pag-uli niya tikang ha pag-awayan.

℟. Hin-o ini nga hadi han kahimayaan? Amo hiya an Ginoo.

3. Buksi hin maupay an mga ganghaan,

abrehi an mga daan nga portahan;

kay masulod na an hadi nga bantogan,

nga amo an hadi han kahimayaan.

℟. Hin-o ini nga hadi han kahimayaan? Amo hiya an Ginoo.

4. Hin-o ini nga hadi han kahimayaan?

An Ginoo hiya han kasondalohan;

an Ginoo nga dara an pagdarag-an,

hiya an hadi han kahimayaan!

℟. Hin-o ini nga hadi han kahimayaan? Amo hiya an Ginoo.

PAGBASA II   

Heb 2:14-18

Pagbasa kinuha han surat ngadto han mga Hebreo.

Tungod kay an mga anak unod man ug dugo han ira ginikanan, nasugad ha ira hi Jesus ngan nakaangbit han ira kinaiya. Ginbuhat ini niya, basi pinaagi han iya kamatayon, madaog niya hi Satanas nga may gahom han kamatayon, ngan matalwas niya adton mga naoripon ha bug-os nira nga kinabuhi tungod han ira kahadlok han kamatayon. Kay dayag gud nga diri an mga anghel an iya ginbubuligan. Lugod, sumala han siring han kasuratan, “Ginbubuligan niya an mga tulin ni Abraham.” Karuyag sidngon hini, nga kinahanglan magin sugad gud hiya han iya kabugtoan ha ngatanan nga paagi, ngan mahimo hiya nga ira matinumanon ngan maluloy-on nga labaw nga padi dida han iya pag-alagad han Dyos, basi mapasaylo an mga sala han mga tawo. Ngan yana makakabulig na hiya hadton mga ginsusulay, kay ginsulay ngan nag-antos man hiya ngahaw.

An Pulong han Ginoo.

EBANGHELYO

Lc 2: 22-40

[Lc 2:22-32]

Pagbasa tikang han santos nga Ebanghelyo sumala kan Lucas.

[Inabot an panahon hin pagtuman nira Jose ug Maria han seremonyas han paglinis sumala han iginsugo han Balaod ni Moises. Sanglit, gindara nira an bata ngadto ha Jerusalem basi ihalad liwat hiya ngadto han Ginoo, sumala han iginsurat dida han balaod han Ginoo: “Kinahanglan ighalad ngadto han Ginoo an tagsa nga suhag nga lalake.” Naghalad liwat hira, sumala han kinahanglan han balaod han Ginoo, “Usa ka padis nga sarapati o duha nga piso nga tukmo.”

Niyan, may-ada tawo nga nag-uokoy ha Jerusalem, nga Simeon an ngaran. Maupay ngan mainampoon hiya nga tawo, ngan naghihinulat hiya han katalwasan han Israel. Nakada ha iya an Espiritu Santo, ngan ginpatapod hiya han Espiritu Santo nga diri gud hiya mapatay, kon diri anay kumita hiya han Mesiyas nga iginsaad han Ginoo. Inaghat han Espiritu Santo kinadto hi Simeon ha Templo. Gindara han mga kag-anak ngadto ha Templo an bata nga Jesus basi magtuman hira han sugo han Balaod. Ginkugos ni Simeon an bata ngan nagpasalamat han Dyos:

“Yana, Ginoo, gintuman mo na an imo saad, ngan tugoti na pagbaya ha kamurayaw an imo surugoon. Ha akon kalugaringon nga mga mata, hinkit-an ko na an imo katalwasan, nga imo gin-andam ha atubangan han ngatanan nga mga katawhan: Kapawa nga magpapadayag ha mga Hentil han imo paagi ngan magdadara hin kadungganan han imo katawhan nga Israel.”]

Nanhipausa an amay ug iroy han bata han mga butang nga iginsiring ni Simeon mahitungod ha iya. Ginbendisyonan hira ni Simeon, ngan nagsiring hi Simeon kan Maria nga iroy han bata, “Ginpili han Dyos ini nga bata para han pagkapukan ngan han katalwasan hin damo ha Israel. Magigin tigaman hiya tikang sa Dyos nga pagsusupakon hin damo nga mga tawo, ngan tungod hini, ipadadayag niya an ira tinago nga mga panhunahuna. Ngan sasamaron sugad hin matarom nga espada an imo kasingkasing tungod hin kabido.”

May-ada manaragna nga babaye nga ginngangaranan kan Ana, nga anak ni Panuel, han tribo ni Aser. Lagas na hiya, nga nainasaw-an hin pito ka tuig, ngan nabalo hiya ug kawaloan kag-upat (84) ka tuig na an iya panuigon. Waray gud hiya bumaya han Templo; adlaw gab-i nagsingba hiya han Dyos, nga nagpuasa ngan nag-ampo hiya. Inabot hiya hito manta nga takna ngan nagpasalamat sa Dyos, ngan namulong hiya mahitungod han bata ha ngatanan mga naghihinulat han kanan Dyos pagtubos han Jerusalem.

Katapos nira pagbuhat han ngatanan nga ginkikinahanglan han balaod han Ginoo, binalik hira ngadto ha Galilea, ha ira kalugaringon nga bungto ha Nazaret. Tinubo ngan nagmakusog an bata; puno hiya hin kinaadman, ngan nakada ha iya an mga bendisyon han Dyos.

An Ebanghelyo han Ginoo.