PAGBASA I     

2 Sam 24:2, 9-17

Pagbasa tikang han Ikaduha nga Basahan ni Samuel.

Ginsugo ni David hi Joab nga pangulo han iya kasondalohan: “Kadtoa upod an imo mga opisyal an ngatanan nga mga tribo han Israel, tikang ha usa nga kataposan han nasod ngadto ha luyo, ngan ihapa an mga tawo. Karuyag ko hibaroan an ira kadamo.” Iginsumat nira kan David an kadamo han kalalaken-an nga makakahimo hin pagsondalo: walo kagatos kayokot (800,000) didto ha Israel ngan lima kagatos kayokot (500,000) didto ha Juda.

Kundi katapos ni David pagpaihap han mga tawo, nasamok an iya panhunahuna, ngan nagsiring hiya han Ginoo, “Nakasala ako hin dako han akon pagbuhat hini! Pasayloa ako. Linurong hin duro an akon ginbuhat.” Nagsiring an Ginoo kan Gad nga manaragna ni David, “Kadtoa ngan sumati hi David nga pinapagpili ko hiya hinin tutulo. Tutumanon ko an bisan hain han iya pagpilion.” Han pagkaaga han pagbangon na ni David, kinadto ha iya hi Gad ngan ginsumatan hiya han iginsiring han Ginoo ngan nagpakiana, “Hain man hini nga tutulo? Tulo ba ka tuig nga kagutom dinhe han imo tuna, o tulo ba ka bulan nga pagkinalagiw tikang han imo mga kaaway, o tulo ba ka adlaw nga peste dinhe han imo tuna? Pagpainoinoha ini yana ngan sumati ako han akon igbabaton han Ginoo.” Binaton hi David, “Kamakahurulop hini nga akon kahimtang! Kundi diri ko karuyag nga kastigohon ako hin mga tawo. An Ginoo la an angay magkastigo ha amon, kay maloloy-on hiya.” Sanglit nagpadara hin peste ngadto ha Israel an Ginoo, nga nagtikang hito nga aga tubtob han takna nga iya igintalaan. Tikang ha usa nga kataposan han nasod ngadto ha luyo, kapitoan kayokot (70,000) nga mga Israelita an nagkamatay. Han harapit na bungkagon han anghel han Ginoo an Jerusalem, nabalhin an hunahuna han Ginoo hin pagkastigo han mga tawo, ngan ginsiring han Ginoo an anghel nga nagpipinamatay ha ira, “Ukoy na! Igo na ito!” Natukdaw an anghel didto ha ligid han giriokan ni Arauna nga Jebuseohanon. Hinkit-an ni David an anghel nga namamatay han mga tawo, ngan ginsiring niya an Ginoo, “Ako an nakasala. Ako an nakasayop. Ano an nabuhat hini nga makalolooy nga mga tawo? Kinahanglan ako ngan an akon panimalay an imo kastigohon.”

An Pulong han Ginoo.

SALMO RESPONSORIO

Sal 32:1-2, 5, 6, 7

℟. Pasayloa, Ginoo, an dum-it han akon sala.

1. Malipayon adton mga ginpasaylo,

han ira mga sala ug mga pag-ato.

Palaran an tawo nga diri paghukman,

han Ginoo han iya mga karat-an;

ngan waray dida ha iya kinabuhi,

an mga paglimbong, mga pagtiyupi.

℟. Pasayloa, Ginoo, an dum-it han akon sala.

2. Niyan ngada ha imo akon gintug-an,

waray ko tagoa mga kasaypanan;

karuyag ko gud hin pagtug-an ha imo,

ngan an mga sala ko imo ginpasaylo.

℟. Pasayloa, Ginoo, an dum-it han akon sala.

3. Adton mainampoon nimo nga mga tawo,

kon may kinahanglan, nag-ampo ha imo;

kon umabot in lunop hin kakurian,

diri gud hira han lunop hiaabutan.

℟. Pasayloa, Ginoo, an dum-it han akon sala.

4. Hi ikaw amo an akon taragoan,

pagagawson mo ako ha kakurian;

igsisinggit ko an imo katalwasan,

kay imo man ako pinapanalipdan.

℟. Pasayloa, Ginoo, an dum-it han akon sala.

ebanghelyo             

Mc 6:1-6

Pagbasa tikang han santos nga Ebanghelyo sumala kan Marcos.

Binaya hi Jesus hito nga dapit ngan inoli ngadto han iya kalugaringon nga bungto ngan an iya mga tinun-an sinunod ha iya. Nagtutdo hiya ha sinagoga ha Adlaw nga Iparahuway. Damo an nakadto nga mga tawo, ngan nanhipausa hira han pakabati nira ha iya. “Diin ba hiya kuha hini nga hibaro?” nagpakiana hira. “Ano ini nga hibaro nga ihinatag ha iya? Inuunan-o ba niya hin pagbuhat hin mga milagro? Diri ba hiya an panday nga anak ni Maria ngan bugto nira Santiago, Jose, Judas ug Simon? Diri ba nag-uokoy dinhe an kababayen-an nga iya kabugtoan?” Sanglit iginsalikway hiya nira. Nagsiring hi Jesus ha ira, “Tinatahod an manaragna bisan diin nga dapit labot la dida han iya kalugaringon nga bungto, han iya kauropdan ngan han iya panimalay.” Waray hiya makahimo hin pagbuhat hin mga milagro didto, labot la nga gindun-an ngan gintambal niya in pira nga mga magsakit. Dako an iya paghipausa tungod han kawaray nira pagtoo.

An Ebanghelyo han Ginoo.