Tuig II

PAGBASA I     

1 Hadi 2:1-4, 10-12

Pagbasa tikang han Syahan nga basahan han Kahadian.

Han tikamaratay na hi David, gintawag niya hi Solomon nga iya anak ngan iya iginhatag an kataposan niya nga mga tugon: “Inabot na an takna han akon kamatay. Magmaisog ngan pagpakalalake, ngan buhata an isugo ha imo han Ginoo nga imo Dyos. Sugta an ngatanan niya nga mga balaod ngan mga sugo, sumala han nahisurat ha Balaod ni Moises, basi magmainuswagon ka ha ngatanan nga imo mga buhat, bisan ngain ka kadto. Kon pagsugton mo hiya, pagtutumanon han Ginoo an iya iginsaad han pagsumati niya ha akon nga maghahadi han Israel an akon mga tulin basta magsugot hira nga matinumanon han iya mga sugo ha bug-os nira nga kasingkasing ug kalag.

Namatay hi David ngan iginlubong didto han Syudad ni David. Naghadi hiya han Israel sulod hin kap-atan (40) ka tuig; pito ka tuig didto ha Hebron ngan katloan kagtulo (33) ka tuig didto ha Jerusalem. Sinunod hin pagkahadi hi Solomon kan David nga iya amay ngan makusog ngan gamhanan gud an iya ginhadian nga nasunod kan David.

An Pulong han Ginoo.

SALMO RESPONSORIO

1 Cron 29:10, 11ab, 11d-12a, 12bcd

℟. Ikaw, Ginoo, an naghahadi labaw han ngatanan.

1. “Ginoo nga Dyos han amon ginikanan nga hi Jacob,

dayawon ka ha kadayonan!

℟. Ikaw, Ginoo, an naghahadi labaw han ngatanan.

2. Imo an gahom, pagkaharangdon, himaya,

kamatahum, ngan pagdarag-an.

℟. Ikaw, Ginoo, an naghahadi labaw han ngatanan.

3. Imo an ngatanan nga aadto ha langit ug aanhi ha tuna,

ngan ikaw an hadi, ngan labaw ikaw han ngatanan.

An mga bahandi ug manggad natikang ha imo.

℟. Ikaw, Ginoo, an naghahadi labaw han ngatanan.

4. Naghahadi ka han ngatanan

pinaagi han imo kusog ug gahom;

ngan nahatag ka ha ngatanan

hin gahom ngan hin kusog.

℟. Ikaw, Ginoo, an naghahadi labaw han ngatanan.

EBANGHELYO             

Mc 6:7-13

Pagbasa tikang han santos nga Ebanghelyo sumala kan Marcos.

Gintirok niya an dose nga mga tinun-an, ngan iya ginsugo hin padispadis. Tinagan niya hira hin gahom hin pakadaog han mga yawa ngan gintugon hira niya, “Ayaw kamo pagdara hin bisan ano ha iyo paglakaton, labot hin tungkod; ayaw pagdara hin pagkaon, hin supot ngan hin kwarta ha iyo mga bulsa. Pagsul-ot kamo hin sandalyas kundi ayaw pagdara hin liliwanan.” Gintugon pa hira, “Kon diin kamo nga balay karawata ngan pasak-a pabilin kamo dida ngahaw tubtob han iyo pagbaya hito nga dapit. Kon diri kamo karawaton ha usa nga dapit o diri kamo pamatian, bayai ito nga dapit katapos niyo padpara an tapotapo ha iyo mga tiil. Usa ini nga pahimangno ha ira.” Sanglit nagkalakat ngan nagwali hira nga kinahanglan bumaya an mga tawo han ira mga sala. Nagpaiwas hira hin damo nga mga yawa, ngan nagdihog hira hin lana ha damo nga mga magsakit, ngan gin-upay nira hira.

An Ebanghelyo han Ginoo.