Tuig II

PAGBASA I     

Sir 47: 2-11

Pagbasa tikang han Basahan han Sirac.

Sugad nga iginggahin para han Ginoo an gitatamboki nga bahin han halad han pagkaurosa, sanglit ginpili hi David tikang han mga Israelita. Nakig-uyag hiya hin mga liyon ngan mga uso nga daw sugad la hin nati nga mga karnero o nati nga mga kanding. Han bata pa hiya, ginpatay niya in usa nga higante basi matalwas an iya mga tawo. Ginbutang niya in usa nga bato dida han iya labyog, itinadong niya ngadto han higante ngan gintapos niya an paghinambog ni Goliat. Nag-ampo hiya han Ginoo nga Gihahataasi, ngan gintagan hiya han kusog hin pagpatay hadto nga bantogan nga sondalo, basi magkamay-ada pagtahod an mga nasod para han gahom han iya mga tawo. Ginpasidunggan hiya han mga tawo tungod hin pagpatay niya han tag napulo kayukot (10,000) nga mga sondalo han kaaway ngan han pagkoronahi na ha iya nga hadi, gindayaw hiya nira tungod nga ginpili hiya han Ginoo. Ginpuo niya an ngatanan nga iya mga kaaway, ngan gindugmok niya ha kadayonan an mga Filisteo, sanglit waray na gud hira mahimo nga tarhog. Han ngatanan nga iya nabuhat, nagpapasalamat hi David ngadto han Baraan nga Ginoo, an Gihahataasi. Ginhigugma niya an iya Magburuhat ngan nagkanta hiya hin mga pagdayaw ngadto ha iya ha bug-os niya nga kasingkasing. Nagbutang hiya hin mga magkaranta didto han altar hin paghatag hin matahom nga mga kanta. Ginpahimutang niya an panahon han mga pyesta ha bug-os nga tuig ngan ginhimo ini nga makaruruyag nga mga higayon; nag-aningal an Templo han mga pagdayaw han Ginoo ha bug-os nga adlaw. Ginpasaylo han Ginoo an sala ni David ngan ginparig-on ha kadayonan an iya gahom. Naghimo hiya hin ginsaaran ha iya nga maghahadi nga mahimayaon hiya ngan an iya mga tulin ha Israel.

An Pulong han Ginoo.

SALMO RESPONSORIO

Sal 18:31, 47 & 50, 51

℟. Dayawon an Dyos nga nagtalwas ha aton.

1. Pagkahingpit han kanan Dyos binuhatan;

an iya mga pulong katataporan!

Usa nga taming itatanding ha iya,

hadton iya panalipod nangingita.

℟. Dayawon an Dyos nga nagtalwas ha aton.

2. Ginoo nga Dyos mabuhi ka hin dayon,

akon panalipod hiya pagdayawon;

Igsasangyaw gud an iya kagamhanan,

an naghatag ha akon hin katalwasan.

Sanglit ako man nagdadayaw ha imo,

dida ha butnga hini nga mga tawo;

ngan akon ta kamo pagkakantahan,

mga kanta hin pagdayaw han imo ngaran.

℟. Dayawon an Dyos nga nagtalwas ha aton.

3. Ginpadaog gud han Dyos an iya hadi,

ginpakita in gugma han iya ginpili;

ngadto kan David nga iya gindihogan,

ngan ha iya tulin ha kadayonan.

℟. Dayawon an Dyos nga nagtalwas ha aton.

EBANGHELYO

Mc 6:14-29

Pagbasa tikang han santos nga Ebanghelyo sumala kan Marcos.

Niyan nakabati hi Hadi Herodes hiunong hini ngatanan kay nahisamwak man an bantog ni Jesus ha ngatanan nga dapit. May-ada mga tawo nga nasiring, “Nabuhi na liwat hi Juan nga Parabunyag! Sanglit nakikita ta ini nga mga gahom dida ha iya.” Kundi nagsiring an iba, “Hi Elias hiya.” Nagsiring liwat an iba, “Manaragna hiya sugad hin usa nga bantogan nga manaragna hadton mga una pa nga panahon.”

Han pakabati hini ni Herodes, nagsiring hiya, “Amo hiya hi Juan nga Parabunyag! Ginpapugotan ko na hiya, kundi nabuhi liwat!” Hi Herodes ngahaw an nagpadakop kan Juan; iya iginpagapos ngan iginsulod ha bilanggoan. Ginbuhat ini ni Herodes tungod kan Herodias nga iya gin-asawa. Hi Herodias asawa ni Felipe nga bugto ngahaw ni Herodes. Waray hunong hin pagsinaway ni Juan kan Herodes, “Diri matadong nga buhat an pag-asawa mo han asawa han imo bugto!”

Sanglit nagdumot hi Herodias kan Juan ngan karuyag niya patayon, kundi waray hiya makahimo tungod kan Herodes. Nahadlok hi Herodes kan Juan kay maaram hiya nga maupay ngan baraan nga tawo hi Juan, sanglit ginpabantayan hiya niya. Karuyag niya mamati kan Juan, bisan kon nagugupong hiya ha kada pakakabati niya kan Juan.

Ha kataposan nakahigayon hi Herodias hin pagpatay kan Juan. Naghatag hi Herodes hin dako nga kombite dida han iya kaadlawan, han mga punoan han kasondalohan, ngan han mga dagko nga pagkatawo ha Galilea. Sinakob ngan sinayaw an anak nga babaye ni Herodias Nakalipay hiya kan Herodes ngan han mga dinapit ngada han kombite. Nagpakiana han daragita an hadi, “Ano an imo karuyag aroon? Ihahatag ko ha imo in bisan ano nga imo karuyag.” Pinaagi hin damo nga panumpa, nagsiring ha iya na hadi, “Nagsasaad ako nga tatagan ta ikaw han imo karuyag aroon, bisan pa an katunga han akon ginhadian.”

Ginawas an daragita ngan pinakiana han iroy niya kon ano an iya aaroon. Binaton an iroy niya, “An ulo ni Juan nga Parabunyag.” Kinadto dayon han hadi an daragita ngan nangaro, “Karuyag ko nga ihatag mo ha akon an ulo ni Juan nga Parabunyag nga sinangga hin plato!” Nabido kaupay an hadi; kundi waray hiya makabaribad, kay nagsaad hiya ha atubangan han iya nga dinapit. Sanglit ginsugo niya in gwardya han bilanggoan nga dad-on an ulo ni Juan. Linakat an gwardya, kinadto ha bilanggoan, ngan ginpugotan hi Juan. Gindara niya an ulo nga sinangga hin plato, ngan iginhatag niya han daragita, ngan ihinatag han daragita ngadto han iroy niya. Pakabati hini han mga tinun-an ni Juan, kinadto hira pagkuha han iya lawas ngan iginlubong nira.

An Ebanghelyo han Ginoo.