Tuig II

PAGBASA I     

1 Hadi 3:4-13

Pagbasa tikang han Syahan nga basahan han mga Hadi.

Usa ka higayon kinadto hiya ha Gabaon hin paghalad kay nakadto man an labi ka mahal nga altar. Han naglabay nga panahon naghalad na hi Solomon didto hito nga altar hin ginatosgatos nga mga halad nga tutuboron. Hito nga gab-i pinmakita ha iya an Ginoo dida hin usa nga inop ngan nagpakiana ha iya, “Ano an imo karuyag nga akon ihahatag ha imo?” Binaton hi Solomon, “Nagpakita ka hin dako nga paghigugma kan David nga akon amay, nga imo surugoon, ngan maupay hiya, maunongon, ngan tangkod hiya nga tawo. Ngan nagpadayon ka hin pagpakita ha iya han imo dako ngan dayuday nga paghigugma pinaagi hin paghatag ha iya hin anak nga lalake nga yana naghahadi na liwan ha iya. O Ginoo nga Dyos, ginpasaliwan mo ako han akon amay hin pagkahadi, bisan kon bata pa ako ngan diri pa maaram hin pagpangulo hin mga tawo. Iini ako yana ha butnga han mga tawo nga imo ginpili nga imo kalugaringon, mga tawo nga uraura hin kadamo nga makuri maihap. Sanglit tagi ako han kinaadman nga akon kinahanglan hin matadong nga pagdumara han imo mga tawo ngan hin pakasabot kon ano an maupay ug maraot. Kay kon diri, uunanhon ko hin pakagpangulo hini nga imo damo nga mga tawo?”

Nalipay an Ginoo nga nangaro hini hi Solomon, sanglit nagsiring ha iya an Ginoo, “Tungod nga nangaro ka han kinaadman basi magmatadong an imo pagpangulo, ngan waray ka lugod mangaro hin hilawig nga kinabuhi para ha imo ngahaw, o mga manggad, o han pagpuo han imo mga kaaway, pagtutumanon ko an imo ginpangaro. Ighahatag ko ha imo in larolabaw pa nga kinaadman ngan pagsabot kay han naangkon han bisan hin-o nga una ha imo o maaangkon han mga masunod ha imo. Ighahatag ko liwat ha imo an waray mo pangaroa; magkakamay-ada ka mga manggad ngan kadungganan ha bug-os mo nga kinabuhi, nga labaw gud kay han bisan hin-o nga hadi.

An Pulong han Ginoo.

SALMO RESPONSORIO

Sal 119:9, 10, 11, 12, 13, 14

℟. Ginoo, an imo mga paagi ha akon igtutdo.

1. Uunanhon hin pagkaputli hin batan-on?

Kon an imo mga sugo iya pagtumanon.

℟. Ginoo, an imo mga paagi ha akon igtutdo.

2. Hin kinasingkasing magsisirbe ako ha imo,

ayaw itugot nga talikdan ko an imo mga sugo.

℟. Ginoo, an imo mga paagi ha akon igtutdo.

3. Ha kasingkasing gintipig ko an imo balaod,

basi diri ako makasala ha imo hin tinuod.

℟. Ginoo, an imo mga paagi ha akon igtutdo.

4. Gindadayaw ta ikaw, O Ginoo,

an imo mga paagi ha akon itutdo.

℟. Ginoo, an imo mga paagi ha akon igtutdo.

5. Akon liwat igpapasangyaw ha tingog nga dako,

an mga balaod nga ha akon ginhatag nimo.

℟. Ginoo, an imo mga paagi ha akon igtutdo.

6. Nalipay ako hin pagtuman han imo mga sugo,

labaw hin pakaangkon hin manggad nga damo.

℟. Ginoo, an imo mga paagi ha akon igtutdo.

EBANGHELYO

Mc 6:30-34

Pagbasa tikang han santos nga Ebanghelyo sumala kan Marcos.

Binalik ngan nakigkita kan Jesus an mga apostoles ngan ginsumatan hiya nira han ngatanan nga ira ginbuhat ngan gintutdo. Abotkiabot an mga tawo, sanglit waray na ngani panahon pagkaon hi Jesus ngan an iya mga tinun-an. Sanglit nagsiring hi Jesus ha iya mga tinun-an, “Tana, pahirayo kita han mga tawo, ngadto hin mamingaw nga dapit, basi makapahuway anay kamo.” Sanglit sinmakay hira hin sakayan ngadto hin dapit nga mamingaw. Kundi damo nga mga tawo an kinita han ira paggikan ngan nahibaro dayon hira kon hin-o an mga sakay. Sanglit, linanat hira tikang han mga kaburubungtohan. Tungod nga darodalagan man an ira pagbaktas, nahiuna hira pag-abot kanda Jesus ngan han iya mga tinun-an.

Han paghaw-as ni Jesus han sakayan hinkit-an niya ini nga kadam-an nga mga tawo ngan nalooy hiya ha ira kay sugad hira hin mga karnero nga waray magmarangno. Ngan nagtikang hiya hin pagtutdo ha ira hin damo nga mga butang.

An Ebanghelyo han Ginoo.