Tuig A

PAGBASA I     

Is 58:7-10

Pagbasa tikang han basahan ni Isaias nga manaragna.

Nagsiring an Ginoo: Bahini han iyo pagkaon an mga ginugutom ngan pasak-a ha iyo mga balay an mga pobre nga waray mga urokyan. Tagi hin panapton adton waray iginbabado, ngan ayaw pagbaribad hin pagbulig han iyo kalugaringon nga kauropdan. “Niyan masirak ha iyo an akon maupay nga kaburot-on sugad han nasirang nga adlaw, ngan mag-uupay dayon an iyo mga samad. Dayuday maupod ako ha iyo hin pagtalwas ha iyo; pananalipdan ko kamo ha bisan diin nga dapit. Kon mag-ampo kamo, pamamatian ko kamo. Mabaton ako kon tumawag kamo ha akon. “Kon undangon niyo an pagtalumpigos, an tagsa nga gawi hin pagtamay, ngan an tagsa nga maraot nga pulong; kon tagan niyo hin pagkaon an mga ginugutom ngan pagbusgon niyo adton mga nagkikinahanglan, niyan mahihimo nga kapawa han naudtohan nga adlaw an kasisidman nga nagpapalibot ha iyo.

An Pulong han Ginoo.

SALMO RESPONSORIO

Sal 112:4-5, 6-7, 8-9

℟. An maupay nga tawo usa nga kapawa han mga magtadong dida ha kasisidman.

1. An kapawa malamrag ha kasisidman,

para hadton mga tawo nga buotan;

para hadton maloloy-on ug magtadong,

ngan han mga tawo nga mahigugmaon.

Palaran an tawo nga diri makuri utangan,

ngan tangkod an iya mga binuhatan.

℟. An maupay nga tawo usa nga kapawa han mga magtadong dida ha kasisidman.

2. Diri mapapakyas an tawo nga buotan,

ngan dayuday diri ini hira hingangalimtan.

Hiya an tawo nga waray kahadlokan,

han magraot nga sumat nga iya hinbabatian;

an pagtoo niya may-ada kadig-onan,

kay Ginoo la an iya sinasarigan.

℟. An maupay nga tawo usa nga kapawa han mga magtadong dida ha kasisidman.

3. Waray niya kabaraka ug kagupong,

waray dida ha iya an kamahadlokon;

waray ruhaduha nga iya kikitaon,

nga an iya mga kaaway pagpupukanon.

Hadton mga kablas hiya mahinatagon,

waray utlanan an iya kamaloloy-on;

hiya an magigin makagarahum,

ngan takus man liwat pagtahoron.

℟. An maupay nga tawo usa nga kapawa han mga magtadong dida ha kasisidman.

PAGBASA II   

1 Cor 2:1-5

Pagbasa tikang han Syahan Surat ni San Pablo ngadto han mga taga Corinto.

Kabugtoan ko, han pagkada ko ha iyo pagwali han kanan Dyos tinago nga kamatuoran, waray ako maggamit hin hilarom nga mga pulong ngan hitaas nga hibaro. Kay samtang nakada ako ha iyo, gintuyo ko nga mahingalimot ako han ngatanan labot la kan Jesu-Cristo, ngan labi na gud han iya kamatayon ha kros. Sanglit han pagkada ko na ha iyo, maluya ako ngan nakurog ako hin kahadlok, ngan waray ko ighatag an akon pagturon-an ug mensahe pinaagi hin mag-abtik nga mga pulong han kinaadman han tawo, kundi han nakakalukmay nga gahom han Espiritu han Dyos. Sanglit diri ipinasisikad an iyo pagtoo ha kinaadman han tawo, kundi ha gahom han Dyos.

An Pulong han Ginoo.

EBANGHELYO

Mt 5:13-16

Pagbasa tikang han santos nga Ebanghelyo sumala kan Mateo.

Nagsiring hi Jesus ha iya mga tinun-an, “Kamo amo an asin para han ngatanan nga katawhan ha tuna. Kundi kon tumab-ang an asin, waray na iba nga paagi hin pagpabalik han iya kapag-ad. Waray na ito gamit, sanglit ilalabog nala basi pagtamaktamakan han mga tawo. “Kamo amo an kapawa han bug-os nga kalibutan. Diri matatago in bungto nga gintindog ha bawbaw hin bukid. Waray nadagkot hin suga ngan takloban. Lugod, ibinubutang ha burutangan hin suga basi makalamrag han ngatanan nga aada ha balay. Ha sugad nga paagi, kinahanglan an iyo suga magmapawa ha atubangan han mga tawo, basi hikit-an nira an iyo maupay nga buhat, ngan pagdayawon nira an Amay niyo ha langit.

An Ebanghelyo han Ginoo.