PAGBASA I
Ezeq 18:25-28
Pagbasa tikang han Basahan ni Ezequiel nga manaragna.
Nagsiring an Ginoo, “Masiring kamo, ‘Diri matadong an binubuhat han Ginoo nga Dyos.’ Pamati ha akon, kamo nga mga Israelita. Naghuhunahuna ba kamo nga diri matadong an akon paagi hin pagbuhat? An iyo paagi amo an diri matadong. Kon umundang pagbuhat hin maupay in usa nga matadong nga tawo ngan magtikang hiya hin pagbuhat hin maraot, ngan unina mamatay hiya, namamatay hiya tungod han maraot nga iya nabuhat. Kon umundang hin pagpakasala in usa nga maraot nga tawo ngan magbuhat hiya han matadong ngan maupay, gintatalwas niya an iya kinabuhi. Nakakasabot hiya han iya ginbubuhat ngan naundang hiya hin pagpakasala, sanglit diri gud hiya mamamatay, kundi magpapadayon hiya hin kabuhi.
An Pulong han Ginoo.
SALMO RESPONSORIO
Sal 25:4-5, 6-7, 8-9
℟. Panumdum han imo kalooy ha amon, Ginoo.
1. Ginoo, tutdoi ako han imo mga paagi,
ipahayag hira ha akon.
Tutdoi ako pagkinabuhi
sumala han imo kamatuoran,
Nasarig ako ha imo ha bug-os nga adlaw
kay ikaw man an akon Magtaralwas.
℟. Panumdum han imo kalooy ha amon, Ginoo.
2. Ginoo, hinumdomi an imo pagkalooy
ngan dayon nga paghigugma
nga iginpakita mo tikang pa hin maiha na nga panahon.
Pasaylo-a an mga sala ngan kasaypanan
han akon pagkabatan-on.
Tungod han imo dayuday nga paghigugma ngan pagkamaupay,
hinumdomi ako, O Ginoo!
℟. Panumdum han imo kalooy ha amon, Ginoo.
3. Matadong ngan maupay an Ginoo;
nagtututdo hiya han dalan
nga angay pag-agian han mga makasasala.
Nagmamando hiya han mapinaubsanon
ha matadong nga paagi
ngan nagtututdo ha ira han iya kaburut-on.
℟. Panumdum han imo kalooy ha amon, Ginoo.
PAGBASA II
Flp 2:1-11 [Flp 2:1-5]
Pagbasa tikang han Surat ni San Pablo ngadto han mga taga Filipos.
[Nakakaparig-on ba ha iyo an iyo kinabuhi ha pag-alagad kan Cristo? Ginlilipay ba kamo han iya gugma? May-ada ba pakighiusa niyo han Espiritu? May-ada ba niyo pagbinatiay hin gugma ngan kalooy? Kon sugad, nag-aaghat ako ha iyo nga paghingpiton niyo an akon kalipay pinaagi hin kamay-ada sugad nga mga panhunahuna, pag-inangbitay hin sugad nga paghigugma, ngan pagkaurosa ha kasingkasing ug kalag. Ayaw kamo pagbuhat nga tikang hin hinalot nga tinguha, o tikang hin waray la pulos nga ungara hin paghinambog; kundi pagpaubos kamo ngatanan, ngan waray hunahuna nga kamo maoruopay kay han iba. Paghunahunaa niyo an kaupayan han iba, diri an iyo la kalugaringon.
Angay angkonon niyo ini nga panhunahuna nga nakada kan Cristo Jesus:] Dayuday may-ada niya kinaiya han Dyos, kundi waray hiya makahuna-huna hin pagtupong han Dyos pinaagi hin kusog. Lugod, ha iya kaburot-on, itinubyan niya an ngatanan nga pagka-Dyos, ngan kinmuha hiya han kinaiya hin surugoon. Natawo hiya sugad ha aton, ngan pinmakita hiya nga sugad hin tawo. Nagpaubos hiya ngan nagsugot tubtob ha kamatayon—an kamatayon ha kros. Tungod hini, gin-undong hiya han Dyos ngadto han gihahataasi nga langit, ngan ihinatag ha iya an ngaran nga labaw han iba nga mga ngaran. Ha pagpasidungog han ngaran ni Jesus, maluhod an ngatanan nga aadto ha langit an aanhi ha tuna, ngan aadto ha kahiladman, ngan ha dayag magpapasangyaw nga hi Jesu-Cristo amo an Ginoo, ha pagpasidungog han Dyos nga Amay.
An Pulong han Ginoo.
EBANGHELYO
Mt 21:28-32
Pagbasa tikang han santos nga Ebanghelyo sumala kan Mateo.
Nagsiring hi Jesus han mga puno han kapadian ug han mga katigurangan, “Yana, ano man an iyo paghunahuna? May-ada hadto tawo nga may duha nga mga anak nga kalalaken-an. Ginkadto niya an magurang ngan ginsiring, ‘Anak, pagtrabaho yana nga adlaw ha urubasan.’ Binaton ini hiya, ‘Diri ako magtratrabaho!’ kundi naliwat an iya hunahuna, ngan kinadto hiya ha urubasan. Niyan an amay kinadto han manghod nga anak ngan amo gihapon an iya iginsiring, ‘Oo, makadto ako,’ binaton hiya, kundi waray hiya makadto. Hin-o man ha ira nga duha an nagtuman han karuyag han amay nira?” Binaton hira, “An magurang.” “Susumatan ta kamo,” nagsiring hi Jesus ha ira. “An mga parasukot hin buhis ngan an magraot nga kababayen-an mahiuuna pa ha iyo hin pagsulod han Ginhadian han Dyos. Kay kinanhi ha iyo hi Juan nga Parabunyag hin pagtutdo ha iyo han matadong nga aragian, ngan waray kamo tumoo ha iya; kundi tinoo ha iya an mga paragsukot hin buhis ngan an magraot nga kababayen-an. Bisan ngani kamo, kahuman niyo pakakita, waray gihapon kamo magbasol ngan magtoo ha iya.”
An Ebanghelyo han Ginoo.