PAGBASA I
Gal 1:13-24
Pagbasa tikang han Surat ni San Pablo ngadto han mga taga Galacia.
Mga kabugtoan: Hinbatian na niyo an akon kinabuhi hadto han matinumanon pa ako han tuluohan han mga Judiyo, kon gin-unan-o ko hin pagpakurii hin waray kalooy han singbahan han Dyos, ngan an akon paniguro hin pagpuo han singbahan. Lupig ko an kadam-an nga katubo ko nga igkasi Judiyo hin pagtuman han tuluohan han mga Judiyo ug han mga nababatasan nga mga ginpapasunod tikang han amon mga kaapoy-apoyan.
Kundi daan na ako ginpili han Dyos tungod han iya grasya, bisan han waray pa ako katatawo, ngan gintawag ako hin pag-alagad ha iya. Ngan han iya na paglarang nga ipadayag ha akon an iya Anak, basi magwali ako han Maupay nga Sumat mahitungod ha iya ngadto han katawhan han mga nasod nga Hentil, waray ako pangaro hin sagdon bisan kan kanay, o waray ako kumadto ha Jerusalem pakigkita han mga apostoles nga una ha akon. Lugod kinadto ako dayon ha Arabia, ngan katapos binalik ako ha Damasco.
Tulo ka tuig anay an linabay tikang han kakabig ko san-o ako kumadto ha Jerusalem hin pagduaw kan Pedro, ngan nagpabilin ako upod ha iya sulod hin duha ka semana. Waray ako iginkakita nga mga apostoles labot kan Santiago nga bugto han Ginoo. Matuod an akon ginsusurat. Diri ako nagbubuwa, sayod man hini an Dyos! Katapos, kinadto ako hin mga dapit ha Siria ug Cilicia. Hadto nga panahon diri pa nakilala ha akon an mga kaapi han mga singbahan ha Judea. Maaram la hira han iginsumat han iba, “An tawo nga nagpakuri hadto ha aton nagwawali na yana han pagtoo nga iya hadto anay gintinguha hin pagpuo.” Sanglit gindayaw nira an Dyos tungod ha akon.
An Pulong han Ginoo.
SALMO RESPONSORIO
Sal 139:1b-3, 13-14ab, 14c-15
℟. Tugwayi ako, Ginoo, dida han dayon nga aragian.
1. O Ginoo, gin-usisa mo ako,
ngan kinikilala mo ako.
Maaram ka han ngatanan nga akon binubuhat,
nasasabtan mo tikang hin hirayo
an ngatanan nga akon panhunahuna.
Kinikita mo ako, kon nagbubuhat
o kon napahuway ba ako;
maaram ka han ngatanan nga akon mga ginawian.
℟. Tugwayi ako, Ginoo, dida han dayon nga aragian.
2. Ikaw an naghimo han tagsa ko nga bahin;
ginturugkop mo ako ha tagoangkan han akon iroy.
Gindadayaw ko ikaw kay angay ka kahadlokan;
makabuburong ngan urosahon
an ngatanan nga imo binubuhat.
℟. Tugwayi ako, Ginoo, dida han dayon nga aragian.
3. Sayod ako hito ha bug-os ko nga kasingkasing.
Hinkit-an mo nga ginpuporma an akon mga tul-an,
ginhinayhinay pagturogkopa ha tagoangkan han ako iroy,
han nagtutubo ako hin sekreto didto.
℟. Tugwayi ako, Ginoo, dida han dayon nga aragian.
EBANGHELYO
Lc 10:38-42
Pagbasa tikang han santos nga Ebanghelyo sumala kan Lucas.
Samtang nagpadayon hi Jesus ngan an iya mga tinun-an ha ira paglakaton, inabot hiya ngadto hin usa nga baryo, diin gin-abiabi hiya ngadto ha iya balay hin usa nga babaye nga ginngangaranan kan Marta. May-ada bugto hi Marta nga Maria an ngaran, nga liningkod ha tiilan han Ginoo ngan namati han iya gintututdo. Nalisang hi Marta han iya damo nga mga buruhaton; sanglit dinaop hiya ngan nagsiring, “Ginoo, diri ka ba nababaraka nga ginpapabay-an la ako han akon bugto pagbuhat han ngatanan nga buruhaton ha balay? Sidnga daw nga buligan ako niya!” Binaton ha iya an Ginoo, “Marta, Marta! Naguguol ngan nababaraka ka hin damo nga mga butang, kundi usa la an kinahanglanon. Ginpili ni Maria an labi ka maupay nga butang, ngan diri na ini maaagaw ha iya.”
An Ebanghelyo han Ginoo.