PAGBASA I
Is 25:6-10a
Pagbasa tikang han Basahan ni Isaias nga manaragna.
Dinhe ha Bukid Sion mag-aandam an Ginoo nga Makagarahum han Ngatanan hin bangkite para han ngatanan nga mga nasod han kalibutan—bangkite han girarasahi nga pagkaon ngan han gimamaupayi nga bino. Dinhe kukuhaon niya dayon an dampog han kabidoan nga nagtinahob han ngatanan nga mga nasod. Pagbubungkagon hin kadayonan han Ginoo nga Dyos an kamatayon! Papahiron niya an mga luha tikang han ngatanan nga mga mata ngan kukuhaon niya an kaarawdan nga gin-antos han iya katawhan ha bug-os nga kalibutan. An Ginoo an nagyakan. Kon mahinabo na ini, masiring an ngatanan, “Amo hiya an amon Dyos! Sinmarig kita ha iya ngan gintalwas kita niya. Amo hiya an Ginoo! Sinmarig kita ha iya, ngan malipayon ngan narayhak na kita, kay gintalwas kita niya.” Pananalipdan han Ginoo an Bukid Sion.
An Pulong han Ginoo.
SALMO RESPONSORiO
Sal 23:1-3a, 3b-4, 5, 6
℟. Didto han balay han Ginoo
mag-uukoy ako ha kadayonan.
1. An Ginoo an magmarangno ha akon,
dida ha iya waray ko iiliwon.
Gindara ako ngadto hin kabanwaan,
ngadto hin pahuwayan nga kapatagan.
Gindara ako niya ngadto han linaw,
tubig nga bulong hin kapaso ug kauhaw.
Hin bag-o nga kusog hi ako tinagan.
℟. Didto han balay han Ginoo
mag-uukoy ako ha kadayonan.
2. Ha matadong nga dalan ako gin-unhan;
pagtuman niya han iya ginsaaran.
Bisan kon magtarap ako han kasisidman,
Ginoo, waray ko sadang kahadlokan;
kay ikaw man an akon inuupdan,
imo tungkod ug tabog an akon abayan.
℟. Didto han balay han Ginoo
mag-uukoy ako ha kadayonan.
3. Hin sasaro para ha akon ikaw naghikay,
ha atubangan han akon mga kaaway.
Kinarawat ako, imo ginpasidunggan,
ginpalapwas nimo an akon irimnan.
℟. Didto han balay han Ginoo
mag-uukoy ako ha kadayonan.
4. Magpapabilin an imo paghigugma,
samtang nga aanhi pa ako ha tuna.
Ngan an imo balay akon puroy-anan,
nga buhi pa ako ha mga katuigan.
℟. Didto han balay han Ginoo
mag-uukoy ako ha kadayonan.
PAGBASA II
Flp 4:12-14, 19-20
Pagbasa tikang han Surat ni San Pablo ngadto han mga taga Filipos.
Mga kabugtoan: Maaram ako kon ano an pag-ukoy ha kawarayan, ngan kon ano man liwat an pag-ukoy ha kahuraan. Nahibaroan ko ini nga sekreto ha kinabuhi, sanglit bisan diin ngan bisan san-o, ma busog ako o ginugutom, mamay-ada o mawaray, waray la ha akon. May-ada ako kusog hin pagasdang han ngatanan tungod han gahom nga iginhatag ha akon ni Cristo. Maupay adto nga iyo ginbuhat hin pagbulig ha akon dida han akon mga kakurian.
An Dyos upod an hura nga bahandi pinaagi kan Cristo Jesus mahatag han ngatanan nga iyo mga kinahanglanon. Ngadto han aton Dyos nga Amay an himaya nga waray kataposan. Matuman kunta.
An Pulong han Ginoo.
EBANGHELYO
Mt 22:1-14 [Mt 22:1-10]
Pagbasa tikang han santos nga Ebanghelyo sumala kan Mateo.
[Ginamit gihapon hi Jesus hin mga pananglitan han iya pagyakan ha mga tawo. “An Ginhadian han langit sugad hin hadi nga nag-andam hin kombite han pagkasal para han iya anak nga lalake. Nagsugo hiya han iya mga surugoon hin pagsumat han mga dinapit nga makadto na hira han kombite, kundi waray ini hira maruyag hin pagtambong. Sanglit nagsugo hiya hin iba nga mga surugoon upod ini nga tugon: ‘Sumati an mga dinapit nga andam na an akon kombite; gin-ihaw na an akon mga baka ngan pinatambok nga mga nati, ngan andam na an ngatanan. Kadi na kamo ha kombite han pagkasal!’ Kundi nagpaka bungol la an mga gindapit ngan nagpadayon la han ira mga buruhaton: kinadto ha iya uma an usa, ngan ha iya tindahan an usa, samtang an iba nagdakop han mga surugoon, ginbalbag ngan pinanmatay nira. Duro an kasina han hadi; ginsugo niya an iya mga sondalo hin pamatay hadton nagpatay han iya mga surugoon ngan ginsunog an ira syudad. Niyan gintawag niya an iya mga surugoon ngan ginsiring hira, ‘Andam na an akon kombite han pagkasal, kundi diri angay hini an gindapit ko nga mga tawo. Yana kadto kamo ha mga kadalanan ngan dapita niyo ngadto han kombite an ngatanan nga mga tawo nga igkita niyo.’ Sanglit kinmadto ha mga kadalanan an mga surugoon ngan gintirok an ngatanan nga mga tawo nga ira hin-agian, an mag-upay sugad man an magraot; ngan napuno hin mga tawo an dapit nga ginkombitehan.] “Sinakob an hadi hin pag-usisa han mga gindapit, ngan hinkit-an niya in tawo nga waray magbado hin bisti para hin pagkasal. Nagpakiana ha iya an hadi, ‘Sangkay, gin-unan-o nimo hin pagsulod dinhe nga waray ka man bisti para hin pagkasal?’ Kundi waray magtingog an tawo. Niyan ginsiring han hadi an mga surugoon, ‘Gaposa niyo an iya mga kamot ngan mga tiil ngan ilabog hiya ngadto han kasisidman ha gawas. Didto magtatangis hiya ngan manliligot an iya mga ngipon!’” Ngan gintapos ni Jesus hin pagsiring, “Kay damo an mga gindapit kundi gutiay la an mga ginpili.”
An Ebanghelyo han Ginoo.