PAGBASA I
Ef 1:1-10
Pagbasa tikang han Surat ni San Pablo ngadto han mga taga Efeso.
Tikang kan Pablo nga apostol ni Cristo Jesus, tungod han kaburut-on han Dyos—Ngadto han mga magtinuohon nga nag-uukoy ha Efeso, nga mga matinumanon kan Cristo Jesus: Tagan unta kamo han Dyos nga aton Amay ngan han Ginoo Jesu-Cristo hin grasya ngan kamurayaw.
Magpasalamat kita han Dyos nga Amay han aton Ginoo Jesu-Cristo! Kay ha aton pakig-usa kan Cristo gintagan kita niya hin mga kaupayan pinaagi hin paghatag ha aton han ngatanan nga espirituhanon nga kaupayan tikang ha langit. Ginpili kita ngadaan han Dyos nga maiya kita dida kan Cristo, han waray pa paghimoa an kalibutan, basi mabaraan kita ngan mawaray sayop ha atubangan niya. Tungod han iya gugma, an Dyos daan naglarang nga pinaagi kan Jesu-Cristo, aangkonon kita nga iya mga anak—amo ini an iya kalipay ngan an iya tuyo.
Pagdayawon ta an Dyos tungod han iya mahimayaon nga grasya nga iginhatag ha aton pinaagi han iya hinigugma nga Anak! Kay natalwas kita pinaagi han kamatayon ni Cristo, ha aton pa, ginpasaylo an aton mga sala. Pagkadako han grasya han Dyos, nga iya iginhatag ha aton hin waray sukol! Ha bug-os niya nga kinaadman ngan hibaro ginbuhat han Dyos an iya nahunahunaan, ngan iginpasabot niya ha aton an iya kaburut-on hin paghingpit pinaagi kan Cristo. Ini nga kaburut-on hin paghingpit han mga butang kon umabot na an igo nga panahon, amo an pag-urosa han ngatanan nga mga binuhat ha langit ngan ha tuna, dida kan Cristo nga amo an pangulo.
An Pulong han Ginoo.
SALMO RESPONSORIO
Sal 98:1, 2-3ab, 3cd-4, 5-6
℟. Ginpahibaro han Ginoo an iya katalwasan.
1. Bag-o nga kanta ha Ginoo kantahon,
kay ginbuhat niya mga urosahon!
Han iya baraan nga kusog ug gahom
an pagdarag-an iya na gud naangkon.
℟. Ginpahibaro han Ginoo an iya katalwasan.
2. An Ginoo amo’n nagpahibaro na
han iya pagdarag-an, iya victorya;
ha mga nasod ginpahibaro niya
adton iya gahom nga nagtatalwas pa.
Saad ha Israel gintuman gud niya
upod dayuday pag-unong, paghigugma.
℟. Ginpahibaro han Ginoo an iya katalwasan.
3. Pagdarag-an han aton Dyos an nakita
han mga katawhan ha tanan nga tuna.
Magrugyaw ha Ginoo, tanan nga tuna,
pagrayhak hin kanta, pagdayawa hiya.
℟. Ginpahibaro han Ginoo an iya katalwasan.
4. Ngadto ha Ginoo hin dayaw pagkanta!
Ngan pagtokar dida hadton mga arpa.
Upod hadton tunog han mga trompeta,
pati adton mga budyong pagpatungga;
ngan gogliat tungod hin kalipay
kita ngadto ha Ginoo nga amo’n hadi ta.
℟. Ginpahibaro han Ginoo an iya katalwasan.
EBANGHELYO
Lc 11:47-54
Pagbasa tikang han santos nga Ebanghelyo sumala kan Lucas.
An Ginoo nagsering: “Pagkamakaharadlok para ha iyo! Naghihimo kamo hin makaruruyag nga mga lubnganan para han mga manaragna—an mga manaragna ngahaw nga pinamatay han iyo mga kaapoy-apoyan. Kamo ngahaw natangdo nga nauyon kamo han ginbuhat han iyo mga kaapoy-apoyan; kay ginpatay nira an mga manaragna, ngan gintindog niyo an ira mga lubnganan. Tungod hini nga pangatadongan, nagsiring an Kinaadman han Dyos: ‘Padadad-an ko hira hin mga manaragna ngan mga magsarangyaw; papatayon nira in pira ha ira ngan pagtitimaraotan an iba.’ Sanglit kakastigohon an mga tawo hini nga panahon, tungod han pagpataya han ngatanan nga mga manaragna tikang pa han paghimoa han kalibutan, tikang han pagpataya kan Abel, ngadto han papataya kan Zacarias nga ginpatay ha butnga han altar ngan han baraan nga dapit. Oo, susumatan ko kamo, kakastigohon an mga tawo hini nga panahon tungod ha ira ngatanan! “Pagkamakaharadlok para ha iyo, mga magturutdo han Balaod! Gintago niyo an yawi nga nag-aabre han porta ngadto han balay hin hibaro; kamo ngahaw diri nasulod, ngan gindidid-an pa niyo adton karuyag sumulod!” Han pagbaya na ni Jesus hadto nga dapit, nagtikang an mga magturutdo han Balaod ngan an mga Parisiyo hin pagsuson ha iya, ngan pagpakiana ha iya mahitungod hin damo la nga mga butang, nga nagtalingoha hira hin pagbitik ngan pagdakop ha iya dida hin sayop nga iya igyayakan.
An Ebanghelyo han Ginoo.