PAGBASA I
Gal 4:22-24, 26-27, 31–5:1
Pagbasa tikang han Surat ni San Pablo ngadto han mga taga Galacia.
Mga kabugtoan: Nagsiring an Kasuratan nga may duha nga anak nga lalake hi Abraham, an usa anak hin oripon nga babaye, an ikaduha anak hin talwas nga babaye. An anak han oripon nga babaye na tawo ha naaraan nga paagi, kundi an anak han talwas nga babaye natawo sugad nga bunga han saad han Dyos. Usa ini nga pananglitan: an duha nga babaye amo an duha nga ginsaaran. An usa amo hi Agar tikang ha bukid han Sinai kanay mga anak natawo nga oripon. Kundi an langitnon nga Jerusalem diri oripon ngan amo hiya an aton iroy. Kay nasiring an Kasuratan, “Magmalipayon ka, babaye nga baw-as! Goliat hin kalipay, ikaw nga waray gud umabat han mga pag-antos hin pag-anak! Kay magdadarudamo pa an mga anak han babaye nga binayaan kay han babaye nga nag-uokoy upod han iya bana.” Sanglit, kabugtoan ko, diri kita mga anak han oripon nga babaye, kundi han talwas nga babaye.
Aton na an kagawasan; hi Cristo an nagtalwas ha aton! Sanglit tindog nga marig-on kamo sugad hin talwas nga mga tawo ngan ayaw na gud kamo pagpaoripon.
An Pulong han Ginoo.
SALMO RESPONSORIO
Sal 113:1b-2, 3-4, 5a & 6-7
℟. Dayawon an ngaran han Ginoo ha kadayunan.
1. Pagdayawa an Ginoo hin tutoo!
Kamo mga surugoon han Ginoo,
pagdayawa niyo adton iya ngaran,
Pagdayawa yana ngan ha kadayonan!
℟. Dayawon an ngaran han Ginoo ha kadayunan.
2. Tikang ha sinirangan nga’t ha katundan,
pagdayawon gud niyo an iya ngaran!
Ginoo’n naghadi’n tanan kanasoran,
labaw han langit an iya kadungganan.
℟. Dayawon an ngaran han Ginoo ha kadayunan.
3. Waray sugad han aton Dyos nga Ginoo,
kundi tikang didto natangbo man hiya,
pagkita han kalangitan ngan han tuna.
Adton mga pobre iya inaalsa
tikang hadton tapotapo hinin tuna;
adton kablasanon binabangon niya
tikang hadton mga kakurian nira.
℟. Dayawon an ngaran han Ginoo ha kadayunan.
EBANGHELYO
Lc 11:29-32
Pagbasa tikang han santos nga Ebanghelyo sumala kan Lucas.
Han nagdadaisog an mga tawo nga naglilibot kan Jesus, nagpadayon hiya hin pagsiring, “Pagkamaraot han mga tawo hini nga panahon! Nangangaro hira hin milagro, kundi waray ihahatag ha ira labot han milagro ni Jonas. Sugad nga nagin tigaman hi Jonas nga manaragna para han mga tawo ha Ninibe, magigin tigaman man an Anak han Tawo para han mga tawo hini nga panahon. Ha Adlaw han Paghukom, matindog an Rayna ha Seba, ngan isusumbong an mga tawo hini nga panahon, kay nagbaktas hiya tikang han iya natawohan nga tuna hin pamati la han makinaadmananon nga pagtutdo ni Solomon; ngan susumatan ko kamo, aanhi in labaw pa kan Solomon. Ha Adlaw han Paghukom matindog an mga tawo ha Ninibe ngan igsusumbong kamo, kay binmaya hira han ira mga sala han pakabati nira han pagwali ni Jonas; ngan susumatan ko kamo, aanhi in labaw pa kan Jonas!
An Ebanghelyo han Ginoo.