PAGBASA I 

Gal 5:1-6

Pagbasa tikang han Surat ni San Pablo ngadto han mga taga Galacia.

Mga kabugtoan: Aton na an kagawasan; hi Cristo an nagtalwas ha aton! Sanglit tindog nga marig-on kamo sugad hin talwas nga mga tawo ngan ayaw na gud kamo pagpaoripon. Pamati! Ako, hi Pablo, nagsusumat ha iyo hini: kon magpatori kamo, karuyag sidngon nga waray na gud pulos hi Cristo ha iyo. Liliwaton ko pagpahinumdom han tawo nga mapatori, nga napipirit hiya hin pagtuman han bug-os nga Balaod. Kamo nga karuyag magmatadong ha atubangan han Dyos pinaagi hin pagtuman han Balaod, nahimulag na kamo kan Cristo, ngan nahigawas na kamo han grasya han Dyos. Kay para ha amon naglalaom kami nga iisipon kami han Dyos nga matadong ha iya atubangan. Amo ini an amon ginhuhulat pinaagi han gahom han Espiritu han Dyos nga nagbubuhat dinhe ha amon pinaagi han amon pagtoo. Kay kon nakig-usa na kita kan Cristo Jesus, ma tinori ka o diri, diri ini kinahanglan; an ginkikinahanglan amo an buhi nga pagtoo pinaagi hin gugma.

An Pulong han Ginoo.

SALMO RESPONSORIO

Sal 119:41, 43, 44, 45, 47, 48

℟. Ipakita, Ginoo, an imo gugma ha akon.

1. Ipakita, O Ginoo, an imo gugma ha akon,

sugad han imo siring nga ako tatalwason.

℟. Ipakita, Ginoo, an imo gugma ha akon.

2. Payakna ako han imo kamatuoran,

kay imo mga paghukom akon ginlalauman.

℟. Ipakita, Ginoo, an imo gugma ha akon.

3. Han imo balaod ako pirme nagtutuman,

hin kadayonan ngan waray kataposan.

℟. Ipakita, Ginoo, an imo gugma ha akon.

4. Mag-uokoy ako ha hingpit nga kagawasan,

kay akon ginsusugot an imo pagturon-an.

℟. Ipakita, Ginoo, an imo gugma ha akon.

5. Hiaagian ko an akon kalipayan,

dida han imo mga sugo pagtuman.

℟. Ipakita, Ginoo, an imo gugma ha akon.

6. Kay ako hinmigugma han imo mga sugo,

papalandongon ko an imo mga igintutdo.

℟. Ipakita, Ginoo, an imo gugma ha akon.

EBANGHELYO

Lc 11:37-41

Pagbasa tikang han santos nga Ebanghelyo sumala kan Lucas.

Katapos gud ni Jesus magyakan, gindapit hiya hin usa nga Parisiyo hin pagkaon upod ha iya; sanglit sinulod hiya ngan liningkod hin pagkaon. Nahipausa an Parisiyo han pakakita niya, nga waray anay manhunaw hi Jesus san-o kumaon. Sanglit nagsiring ha iya an Ginoo, “Yana, naghuhugas kamo nga mga Parisiyo han gawas han kupa ngan han plato, kundi puno kamo hin mga panlupig ngan karat-an ha sulod niyo. Mga lurong! Diri ba an Dyos nga naghimo han gawas, amo liwat an naghimo han sakob? Kundi ihatag ha mga kablas an sulod han iyo mga tasa ug plato ngan magmamalinis an ngatanan para ha iyo.”

An Ebanghelyo han Ginoo.