PAGBASA I
Is 45:1, 4-6
Pagbasa tikang han Basahan ni Isaias nga manaragna.
Ginpile han Ginoo nga magin hadi hi Ciro. Gintudlok hiya basi pagsakopon niya in mga nasod; ginsugo hiya basi kahukasan an kahadian han ira gahom; bubuksan han Ginoo an mga ganghaan hin mga syudad para ha iya. Nagsiring kan Ciro an Ginoo, Gintutudlok ko ikaw hin pagbulig han Israel nga akon surugoon, an mga tawo nga akon ginpili. Ginpasidunggan ko gud ikaw, bisan kon diri ka nakilala ha akon. “Amo ako an Ginoo; waray na iba nga diyos, tatagan ko ikaw han kusog nga imo kinahanglan, bisan kon diri ka nakilala ha akon. Ginbubuhat ko ini basi mahibaro an ngatanan tikang ha usa nga kataposan han kalibutan ngadto ha luyo, nga ako amo an Ginoo, ngan waray na gud iba nga diyos.”
An Pulong han Ginoo.
SALMO RESPONSORiO
Sal 96:1 & 3, 4-5, 7-8, 9-10
℟. Ihatag ha Ginoo an himaya ug gahum.
1. Kanta ha Ginoo hin bag-o nga kanta!
Kanta ha Ginoo, an bug-os nga tuna!
Ha kanasoran iyo igpakilala
iya pagkaharangdon, iya himaya,
ngan an mga gamhanan nga buhat niya
ha ngatanan nga katawhan han tuna.
℟. Ihatag ha Ginoo an himaya ug gahum.
2. An Ginoo dako nga pagkaharangdon,
ngan kinahanglan gud hiya pagdayawon.
Angay gudman hiya nga pagpasidunggan
labaw han ngatanan gud nga kadiyosan.
Mga ladawan gud la an kadiyosan
han ngatanan gud nga kanasoran.
Kundi an Ginoo hiya amo gudman
an naghimo han bug-os nga kalangitan.
℟. Ihatag ha Ginoo an himaya ug gahum.
3. Dayawa’n Ginoo, katawhan ha tuna,
dayawa an iya gahom ug himaya.
Dayawa’n mahimayaon ngaran niya,
didto han iya Templo paghalaran ta.
℟. Ihatag ha Ginoo an himaya ug gahum.
4. Yukbo kamo ha iya gud atubangan,
kon pumakita an Labi Kabaraan;
panngurog ha iya kamo gud ngatanan,
ngatanan nga katawhan ha kalibutan.
Sidnga’n kanasoran, “Ginoo hadi na!
An kalibutan ginpahimutang niya.
Diri mabantad kay iya ginparig-on,
katawhan paghuhukman gud hin matadong.”
℟. Ihatag ha Ginoo an himaya ug gahum.
PAGBASA II
1 Tes 1:1-5b
Pagbasa tikang han Syahan nga Surat ni San Pablo ngadto han mga taga Tesalonica.
Tikang kan Pablo, Silas ug Timoteo—Ngadto han mga kaapi han singbahan ha Tesalonica, nga mga sakop han Dyos nga Amay ngan han Ginoo Jesu-Cristo: Maiyo unta an grasya ngan an kamurayaw. Dayuday nagpapasalamat kami han Dyos tungod ha iyo ngatanan, ngan dayuday ilinalakip kamo namon dida ha amon mga pag-ampo. Kay gindudumdom namon ha atubangan han aton Dyos ngan Amay an ginpapakita han iyo mga mag-upay nga buhat tungod han iyo pagtoo, an kamaduruto niyo tungod han mapaso niyo nga gugma, ngan an karig-on han iyo paglaom dida han aton Ginoo Jesu-Cristo. Kabugtoan, maaram kami nga an Dyos nahigugma ha iyo ngan ginpili kamo nga magin iya kalugaringon. Kay gindara namon ha iyo an Maupay nga Sumat, diri pinaagi hin mga pulong la, kundi pinaagi liwat hin gahom ngan han Espiritu Santo, ngan upod an bug-os nga pagsarig han iya kamatuoran.
An Pulong han Ginoo.
EBANGHELYO
Mt 22:15-21
Pagbasa tikang han santos nga Ebanghelyo sumala kan Mateo.
Linakat an mga Parisiyo ngan naghunahuna hira hin pagbitik kan Jesus pinaagi hin mga pakiana. Nagsugo hira ngadto kan Jesus hin pira han ira mga tinun-an ngan pira han mga sakop ni Herodes. Nagsiring hira, “Magturutdo, maaram kami nga nagsusumat ka han kamatuoran; gintututdo mo an kamaturoan mahitungod han kanan Dyos kaburut-on para han mga tawo, hin waray kabaraka kon ano an ginhuhunahuna han mga tawo, kay diri ka nagtatagad han kahimtang han mga tawo. Sanglit pagsumati daw kami kon ano an imo paghunahuna: supak ba ha aton Balaod o diri an pagbayad hin buhis ngadto han Emperador han Roma?” Kundi nakasabot hi Jesus han ira maraot nga panhunahuna, sanglit nagsiring hiya, “Mga salingkapaw! Kay ano nga nagtatalingoha kamo hin pagbitik ha akon? Pakitaa daw ako hin kwarta nga ibinabayad para hin buhis!” Gindad-an hiya nira hin kwarta nga salapi. Ngan nagpakiana hiya ha ira, “Kanay bayhon ug ngaran inin aanhi?” “Kanan Emperador,” binaton hira. Sanglit nagsiring hi Jesus ha ira, “Kon amo ito, ibayad ngadto han Emperador an kanan Emperador, ngan ibayad man ngadto han Dyos an kanan Dyos.”
An Ebanghelyo han Ginoo.