PAGBASA I
Ef 2:1-10
Pagbasa tikang han Surat ni San Pablo ngadto han mga taga Efeso.
Mga kabugtoan: Hadto anay mga patay kamo ha espiritu tungod han iyo mga pagtalapas ngan mga sala. Ginsunod niyo hadto an maraot nga paagi han kalibutan; nagsugot kamo han punoan han espirituhanon nga mga gahom ha kahiluagan ha kahitas-an, an espiritu nga naghahadi han mga tawo nga nalaris han Dyos. Sugad kita ngatanan ha ira hadto anay, ngan nag-ukoy kita sumala han aton lawasnon nga mga karuyagon ngan asay naton ginbuhat an naangay han mga karuyagon han aton kalugaringon nga mga lawas ngan hunahuna. Sugad han iba, dida hini nga aton hin-aaraan nga kamutangan, aton kapalaran an pag-antos han kapungot han Dyos. Kundi labis an pagkalooy han Dyos ha aton, ngan labi na an iya paghigugma ha aton, nga samtang mga patay pa kita ha espiritu tungod han aton mga pagtalapas, ginbanhaw kita niya upod kan Cristo. Natalwas kamo tungod han grasya han Dyos. Ha aton pakig-usa kan Cristo Jesus, ginbanhaw kita upod ha iya basi maghadi kita kaupod niya didto ha langit. Ginbuhat ini niya ha pagpakita ha ngatanan nga tiarabot nga panahon han labi nga pagkadako han iya grasya, dida han gugma nga iginpakita niya ha aton pinaagi kan Cristo Jesus. Kay pinaagi hin pagtoo, natalwas kamo tungod han grasya han Dyos. Diri ini iyo kalugaringon nga buhat, kundi hatag gud la ini han Dyos. Waray gud niyo dinhe sadang ipanhambog, tungod nga diri ini bunga han iyo kalugaringon nga mga buhat. An Dyos amo an aton Magburuhat, ngan ha aton pakig-usa kan Cristo Jesus, ginhimo kita niya para hin kinabuhi nga mag-upay an mga binuhatan, nga gin-aandam na niya nga aton pagtutumanon.
An Pulong han Ginoo.
SALMO RESPONSORIO
Sal 100:1b-2, 3, 4ab, 4c-5
℟. Ginhimo kita han Dyos; hiya an tag-iya ha aton.
1. Pagrayhak ha Ginoo, bug-os nga tuna.
Hin malipayon an Ginoo singbaha;
ngan pumakada ha atubangan niya,
upod in malipayon nga mga kanta!
℟. Ginhimo kita han Dyos; hiya an tag-iya ha aton.
2. Ayaw gud kalimot nga Dyos an Ginoo!
Amo hiya adton ha aton naghimo.
Hiya an tag-iya ha aton nga tawo,
katawhan kita niya, iya karnero.
℟. Ginhimo kita han Dyos; hiya an tag-iya ha aton.
3. Sulod kita ngadto hadton Templo niya,
upod adton mga pagpasalamat ta.
℟. Ginhimo kita han Dyos; hiya an tag-iya ha aton.
4. Upod an pagdayaw in' nga dapit sudla!
Pagpasalamat ngan pagdayawa hiya!
An Ginoo hin pagkamaupay gudman,
buhi an iya gugma ha kadayonan;
amo man an iya kamatinumanon,
ha kagihaponan gud nagpapadayon.
℟. Ginhimo kita han Dyos; hiya an tag-iya ha aton.
EBANGHELYO
Lc 12:13-21
Pagbasa tikang han santos nga Ebanghelyo sumala kan Lucas.
Nagsiring ha iya in tawo dida han kadam-an, “Magturutdo, sidnga gad an akon bugto pakigbahin ha akon han malon nga iginbilin han amon amay.” Binaton hi Jesus ha iya, “Hin-o in naghatag ha akon hin katungod hin paghukom o pagbahin han malon niyo nga duha?” Ngan nagpadayon hiya pagsiring ha ira ngatanan: “Pagbantay, ngan paglikay kamo han bisan ano nga kahalot; kay an matuod nga kinabuhi han tawo diri la aada han mga butang nga iya gintatag-iya, bisan magkadiano hin kariko niya.” Niyan iginsumat ha ira ni Jesus ini nga pananglitan: “May usa ka tawo nga riko nga may-ada uma nga kinuha hin damo nga abot. Naghunahuna hiya, ‘Waray ko na dapit nga hihimosan han ngatanan nga akon mga abot. Ano ba an akon bubuhaton? Amo ini an akon bubuhaton,’ nagsiring hiya ha iya la ngahaw, ‘gugub-on ko an akon mga kamalig ngan magtitindog ako hin mga darudako, diin akon hihimoson an akon mga abot ngan an ngatanan nga akon mga hiagi. Katapos, masiring ako ha akon ngahaw: palaran ka nga tawo! Naangkon mo na an ngatanan nga mag-upay nga mga butang, nga imo kinahanglan para hin damo nga katuigan. Pahuway na, kaon, inom, ngan paglipay na la!’ Kundi nagsiring ha iya an Dyos, ‘Lurong ka! Kukuhaon na ha imo an imo kinabuhi hini gud nga gab-i; niyan, hin-o man in mag-aangkon hini ngatanan nga mga butang nga imo gintirok para ha imo kalugaringon?’” Ngan gintapos ni Jesus hin pagsiring, “Masusugad hini adton mga nagtitirok hin mga manggad para la ha ira kalugaringon, kundi diri mga riko ha atubangan han Dyos.”
An Ebanghelyo han Ginoo.