PAGBASA I
Ef 2:12-22
Pagbasa tikang han Surat ni San Pablo ngadto han mga taga Efeso.
Mga kabutoan: Bulag kamo kan Cristo hadto nga panahon. Mga lumalangyaw la kamo ngan diri kamo sakop han pinili nga mga tawo han Dyos. Waray kamo labot han mga ginsaaran nga natikang han mga saad han Dyos han iya mga tawo. Nag-ukoy kamo dinhe hini nga kalibutan hin waray paglaom ngan waray Dyos. Kundi yana ha pakig-usa kan Cristo Jesus, kamo nga hadto anay nahirayo han Dyos, nahirani na pinaagi han kamatayon ni Cristo.
Kay hi Cristo ngahaw an nagdara nganhi ha aton han kalinaw pinaagi hin paghimoa han mga Judiyo ngan han mga Hentil nga usa la nga mga tawo han Dyos. Pinaagi han iya kalugaringon nga lawas ginbungkag niya an bungbong nga nagbulag ngan naghimo ha ira nga magkaaway. Ginpara niya an Balaod han mga Judiyo, upod an mga sugo ngan mga turumanon basi maghimo tikang han mga Judiyo ngan mga Hentil hin usa nga bag-o nga mga tawo nga kausa niya ngahaw, ngan tungod hini ihahatag an kalinaw. Pinaagi han iya kamatayon ha kros ginbungkag ni Cristo an ira pagkaaway; pinaagi han kros gintig-ob niya an duha nga katawhan ngadto hin usa la nga lawas, ngan iginpahioli hira ngadto sa Dyos. Sanglit inmabot hi Cristo ngan nagwali han Maupay nga Sumat han kalinaw ha ngatanan—ha iyo nga mga Hentil nga hirayo ha Dyos ngan ha iyo nga mga Judiyo nga hirani ha iya. Pinaagi kan Cristo kita ngatanan, an mga Judiyo ngan mga Hentil, makakadangop na kita, dida hin usa la nga Espiritu, ha atubangan han Amay.
Sanglit diri na mga lumalangyaw o mga dumuruong kamo nga mga Hentil; mga igkasi mga tuminungnong na kamo han mga tawo han Dyos, ngan mga kaapi na han panimalay han Dyos. Gintukod na liwat kamo ha patukoranan nga iginpahimutang han mga apostoles ngan mga manaragna, nga hi Cristo Jesus ngahaw amo an puno nga patukoranan. Amo hiya an nahawid han bug-os nga balay, ngan nagpapadako ngadto hin usa nga templo nga baraan han Ginoo. Ha pakig-usa ha iya, kaupod an ngatanan nga mga magtinuohon, gintitindog liwat kamo nga usa nga balay diin nag-uokoy an Dyos pinaagi han iya Espiritu.
An Pulong han Ginoo.
SALMO RESPONSORIO
Sal 85:9ab-10, 11-12, 13-14
℟. Nagyayakan an Ginoo hin kalinaw ha iya bungto.
1. Namamati ako han kanan Dyos mga pulong,
nga nasaad hin kalinaw ug kadait ha aton.
Waray ruhaduha hin pagtalwas hiya andam,
hadton nahatag ha iya hin kadungganan;
ngan aanhi an iya katalwasan,
magpapabilin ha aton katunaan.
℟. Nagyayakan an Ginoo hin kalinaw ha iya bungto.
2. Magtatapo an gugma ug an kamatinumanon,
maghahangkopay an kalinaw ug an kamatadong;
Tikang ha tuna an kamatinumanon,
tikang ha langit an pagpamatadong.
℟. Nagyayakan an Ginoo hin kalinaw ha iya bungto.
3. An Ginoo an magpapauswag ha aton,
ngan mahatag an tuna hin hura nga aranihon.
Mag-uuna han Ginoo an pagkamatadong,
ngan mag-aandam han dalan para ha aton.
℟. Nagyayakan an Ginoo hin kalinaw ha iya bungto.
EBANGHELYO
Lc 12:35-38
Pagbasa tikang han santos nga Ebanghelyo sumala kan Lucas.
Nagsiring hi Jesus ha iya mga tinun-an, “Pag-andam dayuday kamo han bisan ano nga maabot, nga daan hinugtan ha hawak an iyo mga panapton, ngan daan dinagkotan an iyo mga suga, sugad hin mga surugoon nga naghuhulat han ira agaron pagbalik tikang hin kombite han pagkasal. Aabrehan nira dayon an porta para ha iya, kon umabot ngan magtuktok hiya. Palaran adton mga surugoon nga hiabtan han agaron nga nagmamata ngan andam han iya pagbalik! Susumatan ko kamo, magbabakos hiya, palilingkoron niya hira ha pangaraonan, ngan pagdudurotan hira. Palaran hira kon hiabtan hira nga andam, bisan kon umabot hiya ha katutnga, o ha kaagahon na!”
An Ebanghelyo han Ginoo.