PAGBASA I
Ex 22:20-26
Pagbasa tikang han Basahan han Exodo.
Nagsiring an Ginoo: “Pataya niyo an bisan hin-o nga maghalad ngadto hin bisan ano nga diyos labot ha akon nga Ginoo. “Ayaw niyo pagtalimpigosa o pagraogdaoga in lumalangyaw; panumdom nga mga lumalangyaw kamo hadto anay didto ha Ehipto. Ayaw niyo pagraogdaoga an bisan hin-o nga balo nga babaye o ilo. Kon pagbuhaton niyo ini, mabaton ha ira ako nga Ginoo kon magtawag hira ha akon hin pakibulig, ngan masisina ako ngan pamamatayon ko kamo didto ha pag-awayan. Mababalo an iyo kaasaw-an, ngan maiilo an iyo mga anak.
“Kon mapahuram kamo hin kwarta ngadto hin bisan hin-o nga kablas han akon mga tawo, ayaw kamo pagsugad hin usa nga parapautang, ngan ayaw hiya pagsukti hin patubo. Kon an bisan hin-o kuhaan niyo in kurugpos nga garantiya hin iya utang, kinahanglan ig-uli niyo ini ha iya nga diri pa matutunod an adlaw, kay amo gudla ito an iya igkukurugpos basi hiya kapasoan. Ano pa man an iya ighihigda? Kon magtawag hiya ha akon hin pakibulig, babatonon ko hiya, kay maloloy-on ako.”
An Pulong han Ginoo.
SALMO RESPONSORiO
Sal 18:2-3, 3-4, 47 & 51
℟. Nahigugma ako ha imo, Ginoo, an akon kusog.
1. Pagkadako han akon gugma ha imo,
kay ikaw an panalipod ko, Ginoo!
An Ginoo an naalinsakob ha akon,
makusog nga arayopan ngan madig-on.
℟. Nahigugma ako ha imo, Ginoo, an akon kusog.
2. An Dyos an akon sinasalirongan,
kon upod ha iya waray kahadlokan.
Sukad hin taming iya ako sinasalipdan,
ngan dida ha iya waray kabarak-an.
Dayawon an Ginoo nga gintawag nakon,
kay ha mga kaaway ako tatalwason.
℟. Nahigugma ako ha imo, Ginoo, an akon kusog.
3. Ginoo nga Dyos mabuhi ka hin dayon,
akon panalipod hiya pagdayawon;
Igsasangyaw gud an iya kagamhanan,
an naghatag ha akon hin katalwasan.
Ginpadaog gud han Dyos an iya hadi,
ginpakita in gugma han iya ginpili;
ngadto kan David nga iya gindihogan,
ngan ha iya tulin ha kadayonan.
℟. Nahigugma ako ha imo, Ginoo, an akon kusog.
PAGBASA II
1 Tes 1:5c-10
Pagbasa tikang han Syahan nga Surat ni San Pablo ngadto han mga taga Tesalonica.
Mga kabugtoan: Maaram kamo kon ginunan-o namon hin pag-ukoy han nakada pa kami ha iyo; para adto han iyo kaupayan. Ginsubad niyo kami ngan an Ginoo; ngan bisan kon nag-antos gud kamo, ginkarawat niyo gihapon an mensahe, upod an kalipay nga natikang han Espiritu Santo. Sanglit nahimo kamo nga susbaranan han ngatanan nga mga magtinuohon ha Macedonia ngan ha Acaya. Kay diri la nga nagsarang tikang ha iyo an mensahe mahitungod han Ginoo didto ha Macedonia ngan ha Acaya, kundi nahibantog liwat ha ngatanan nga dapit an sumat mahitungod han iyo pagtoo han Dyos. Sanglit, diri na kinahanglan nga magyakan pa kami hini. Nagsusumat an mga tawo ngahaw kon ginunan-o niyo pagkarawat ha amon han pagduaw namon ha iyo, ngan pagbaya niyo tikang han mga diyosdiyos ngadto han Dyos, pag-alagad han matuod ngan buhi nga Dyos. Nagsusumat liwat hira nga naghuhulat kamo han iya Anak nga makanhi tikang ha langit—an iya Anak nga hi Jesus, nga ginbanhaw niya, ngan amo an naglulukat ha aton tikang han tiarabot nga kapungot han Dyos.
An Pulong han Ginoo.
EBANGHELYO
Mt 22:34-40
Pagbasa tikang han santos nga Ebanghelyo sumala kan Mateo.
Nagkausa nga hugpo an mga Parisiyo han pakabati nira nga ginpahilom ni Jesus an mga Sadusiyo. Ngan in usa ha ira nga magturutdo han Balaod karuyag magbitik kan Jesus pinaagi hin pakiana. Nagpakiana hiya, “Magturutdo, ano an gidadakoi nga sugo han Balaod?” Binaton hi Jesus, “‘Kinahanglan higugmaon mo an Ginoo nga imo Dyos ha bug-os mo nga kasingkasing, ha bug-os mo nga kalag, ngan ha bug-os mo nga hunahuna.’ Amo ini an gidadakoi ngan labi ka importante nga sugo. Sugad hini an ikaduha hin ka importante nga sugo: ‘Kinahanglan higugmaon mo an igkasi tawo sugad han imo kalugaringon.’ Dida hini nga duha nga sugo nasandig an bug-os nga Balaod ni Moises ngan an mga pagturon-an han mga manaragna.”
An Ebanghelyo han Ginoo.