PAGBASA I
Dar 31:10-13, 19-20, 30-31
Pagbasa tikang han Basahan han Darahonon.
Hin kamakuri hiagian in katataporan nga asawa! Labaw pa gud hin mga alahas an kamahal niya! Tinataporan hiya han iya bana, ngan diri gud mapapobre an iya bana. Samtang hiya buhi pa ginbubuhat niya an maupay, ngan diri an maraot para han iya bana. Naduruto hiya hin paghimo hin lino ngan delana nga panapton. Nalugaring hiya hin paghimo hin mga inulang, ngan naghahablon hiya han iya kalugaringon nga panapton. Mahinatagon hiya han mga kablas ngan magpakalolooy. Malimbong an kamaanyag ngan nalubad an kamahusay kundi an babaye nga nagpapasidungog han Ginoo angay gud pagdayawon. Pasidunggi hiya tungod han ngatanan nga iya ginbubuhat. Angay hiya pagtahoron han ngatanan.
An Pulong han Ginoo.
SALMO RESPONSORIO
Sal 128:1-2, 3, 4-5
℟. Palaran adton nahadlok han Ginoo.
1. Palaran adton nahadlok han Ginoo,
an nagtutuman han iya mga sugo!
Maaangkon mo an ginkinahanglan mo,
may kalipay ngan kauswagan pa nimo.
℟. Palaran adton nahadlok han Ginoo.
2. Magigin-pareho an imo asawa
hin ubas ha balay, damo gud an bunga.
Mga anak mo mapapareho hira,
hin olibo palibot han imo lamesa.
℟. Palaran adton nahadlok han Ginoo.
3. Sugad hini an kaupayan hin tawo,
kon nahahadlok gud hiya an Ginoo.
Paglilipayon gud hiya hin tutoo.
Ha Sion an Dyos maglipay gud ha imo!
Kauswagan hadton Jerusalem unta
tanan nga adlaw mo imo makikita!
℟. Palaran adton nahadlok han Ginoo.
PAGBASA II
1 Tes 5:1-6
Pagbasa tikang han Syahan nga Surat ni San Pablo ngadto han mga taga Tesalonica.
Kabugtoan, waray na kinahanglan nga magsurat pa ako ha iyo mahitungod han mga takna ngan mga panahon, kon san-o mahinanabo ini nga mga butang. Kay maaram gud kamo ngahaw nga maabot an Adlaw han Ginoo sugad hin pag-abot hin kawatan ha kagab-ihon. Samtang nasiring an mga tawo, “Malinaw na an ngatanan ngan waray na kataragman,” tigda la nga maabot ha ira an pagkapukan! Diri hira makakalikay; kay sugad ini han kamasakit nga naabot hin babaye nga tipag-aranak. Kundi, kabugtoan, diri na kamo aada ha kasisidman, sanglit diri na kamo hikakalitan hito nga Adlaw nga maabot sugad hin kawatan. Kamo ngatanan nga mga tawo nga sakop han kapawa, ngan sakop han adlaw; diri kita sakop han kagab-ihon o han kasisidman. Sanglit kinahanglan diri kita mangaturog sugad han iba; kundi kinahanglan mag-agma kita ngan magmalinaw an panhunahuna.
An Pulong han Ginoo.
EBANGHELYO
Mt 25:14-30
Pagbasa tikang han santos nga Ebanghelyo sumala kan Mateo.
Ginsiring ni Jesus an iya mga tinun-an hini nga pananglitan, “An Ginhadian han Langit masusugad hini: may-ada hadto usa ka tawo nga nakahunahuna hin paglakat ngadto hin langyaw nga dapit. Gintawag niya an iya mga surugoon ngan igintapod ha ira an iya mga hiagi. Gintagan niya an tagsa ha ira hin puhonan sumala han iya pagkatakos: gintagan niya hin singko mil pesos an usa, dos mil pesos an ikaduha, ngan mil pesos an ikatulo. Kahuman, linakat hiya. Linakat dayon an surugoon nga kinarawat hin singko mil pesos ngan iginpatigayon an iya kwarta, ngan nakadugang pa hiya hin singko mil pesos. Ha amo man nga paagi, nakadugang pa hin dos mil pesos an kinarawat hin dos mil pesos. Kundi linakat an surugoon nga kinarawat hin mil pesos, nagbuho hiya ngan tagoon an kwarta han iya agaron.
“Paghagos hin maiha nga panahon, inoli an agaron hini nga mga surugoon ngan nakigtuhay ha ira. Dinaop an surugoon nga kinarawat hin singko mil pesos dara an dugang nga singko mil pesos pa. Nagsiring hiya, ‘Agaron, naghatag ka ha akon hin singko mil pesos. Kitaa! Aadi liwat in lain nga singko mil pesos nga akon pinakabuhian.’ Nagsiring an iya agaron, ‘Maupay an imo ginbuhat, ikaw nga maupay ngan katataporan nga surugoon! Tungod kay nasasarigan ka hin pagpakabuhi hin gutiay nga kwarta, itatapod ko ha imo in damo nga salapi. Pakadi ha sulod ngan pakiangbit han akon kalipayan!’ Niyan sinulod an surugoon nga gintagan hin dos mil pesos ngan nagsiring, ‘Agaron, gintagan mo ako hin dos mil pesos. Kitaa! Aadi liwat in dugang nga dos mil pesos nga akon pinakabuhian.’ Nagsiring an iya agaron, ‘Maupay an imo ginbuhat, ikaw nga maupay ngan katataporan nga surugoon! Tungod kay nasasarigan ka hin pagpakabuhi hin gutiay nga kwarta, itatapod ko ha imo in damo nga salapi. Pakadi ha sulod ngan pakiangbit han akon kalipayan!’ Niyan sinulod an surugoon nga kinarawat hin mil pesos ngan nagsiring, ‘Agaron, maaram ako nga makuri ka nga tawo: nag-aani ka han waray mo igtanom, ngan nagtitirok ka han abot han uma nga waray mo igpugas. Nahadlok ako, sanglit linakat ako ngan gintago ko ha tuna an imo kwarta. Kitaa, iini an kwarta. Waray ito kaibani.’ Nagsiring an iya agaron, ‘Maraot ngan hubya ka nga surugoon! Maaram ka man kunta nga nag-aani ako han waray ko igtanom, ngan nagtitirok ako han abot han uma nga waray ko igpugas, kay ano man nga waray mo igbutang ha bangko an akon kwarta, basi ha akon pag-oli, karawton ko an puhonan, upod an patubo? Yana, kuhaa niyo an kwarta ha iya ngan ihatag ngadto han surugoon nga may napulo ka yukot ka pesos. Kay tatagan hin labaw pa an ngatanan nga may-ada na, ngan mamamay-ada hiya labaw han kasadangan; kundi kukuhaon tikang ha iya nga waray bisan pa an gutiay nga aada ha iya. Mahitungod hini nga waray gamit nga surugoon—ilabog hiya ngadto ha kasisidman ha gawas; didto magtatangis hiya ngan manliligot hiya han iya mga ngipon.’”
An Ebanghelyo han Ginoo.