PAGBASA I
Is 40:1-5, 9-11
Pagbasa tikang han Basahan ni Isaias nga manaragna.
“Pagliawa an akon mga tawo,” nasiring an aton Dyos, “Pagliawa hira! Dasiga an mga tawo han Jerusalem. Sumati hira nga igo na an ira pag-antos, ngan ginpasaylo na an ira mga sala. Ginkastigo ko na hira hin igo tungod han ngatanan nira nga mga sala.”
Nagoliat in usa nga tingog, “Andama didto han kamingawan an dalan para han Ginoo! Tadonga an mahawan nga dalan didto han kamingawan para han aton Dyos! Tak-opi an tagsa nga kahamub-an, panasa an tagsa nga bukid. Pataga an kapungtoran; ngan hamisa an batoon nga tuna. Niyan igpapadayag an himaya han Ginoo, ngan hikikit-an ini han ngatanan nga katawhan. An Ginoo ngahaw an nagyakan hini.”
Jerusalem, sagka ngadto hin hitaas nga bukid, ngan igsangyaw an maupay nga sumat! Goliat hin dako nga tingog, Sion; ipahibaro an maupay nga sumat! Pagyakan ngan ayaw kahadlok, Sumati an mga bungto han Juda, nga maabot na an ira Dyos! Maabot na an Ginoo nga Dyos paghadi makagarahum hiya nga hadi, ngan dara niya an mga tawo nga iya gintalwas. Pagmamangnoan niya an iya panon sugad hin magmarangno han mga karnero; pagtitirokon niya an nati nga mga karnero, ngan iya hira kukugoson; ngan iya aagakon adton anakan nga mga karnero.
An Pulong han Ginoo.
SALMO RESPONSORIO
Sal 85:9-10-11-12, 13-14
℟. Ha amon ipakita an imo gugma, Ginoo, ngan ihatag ha amon an imo pagtalwas.
1. Namamati ako han kanan Dyos mga pulong,
nga nasaad hin kalinaw ug kadait ha aton;
kon kita diri han maraot nga paagi magpadayon.
Waray ruhaduha hin pagtalwas hiya andam,
hadton nahatag ha iya hin kadungganan;
ngan aanhi an iya katalwasan,
magpapabilin ha aton katunaan.
℟. Ha amon ipakita an imo gugma, Ginoo, ngan ihatag ha amon an imo pagtalwas.
2. Magtatapo an gugma ug an kamatinumanon,
maghahangkopay an kalinaw ug an kamatadong;
Tikang ha tuna an kamatinumanon,
tikang ha langit an pagpamatadong.
℟. Ha amon ipakita an imo gugma, Ginoo, ngan ihatag ha amon an imo pagtalwas.
3. An Ginoo an magpapauswag ha aton,
ngan mahatag an tuna hin hura nga aranihon.
Mag-uuna han Ginoo an pagkamatadong,
ngan mag-aandam han dalan para ha aton.
℟. Ha amon ipakita an imo gugma, Ginoo, ngan ihatag ha amon an imo pagtalwas.
PAGBASA II
2 Ped 3:8-14
Pagbasa tikang han Ikaduha nga Surat ni San Pedro.
Hinigugma ko nga kasangkayan, ayaw niyo hingalimti ini nga butang: para han Ginoo an usa ka adlaw sugad la hin usa ka yukot ka tuig; ngan an usa ka yukot ka tuig sugad la hin usa ka adlaw. Diri maglalangan hin pagtuman an Ginoo han iya iginsaad, sumala han hunahuna han iba. Lugaring, mapinailobon gud hiya ha iyo, kay diri niya karuyag nga mapuo kamo kundi karuyag niya nga bumaya kamo an ngatanan han iyo mga sala. Kundi maabot an Adlaw han Ginoo sugad han pag-abot hin kawatan. Hito nga Adlaw magpapapas an kalangitan upod in makusog nga aringasa. Masusunog ngan mabubungkag an mga planeta ngan mga bitoon, ngan maaanaw an tuna ngan an ngatanan nga aanhi ha tuna. Tungod nga pagbubungkagon an ngatanan nga mga butang hin sugad hini nga paagi, ano man an angay niyo buhaton? Kinahanglan magmabaraan kamo ngan ihalad sa Dyos an iyo kinabuhi, samtang naghuhulat kamo han Adlaw han Dyos, ngan talinguhaa tubtob han iyo mahimo nga mahinabo ini dayon—ito nga Adlaw nga an kalangitan susunogon ngan bubungkagon ngan matutunaw an mga planeta ngan mga bitoon tungod han kapaso. Kundi maghuhulat kita han iginsaad han Dyos: an bag-o nga kalangitan ngan bag-o nga tuna, diin naghahadi an pagkamatadong. Sanglit, kasangkayan ko, talinguhaa gud an kaputli ngan kawaray dum-it ha atubangan han Dyos ngan an pakigdaet ha iya, samtang naghuhulat kamo hito nga Adlaw.
An Pulong han Ginoo.
EBANGHELYO
Mc 1:1-8
Pagbasa tikang han santos nga Ebanghelyo sumala kan Marcos.
Amo ini an Maupay nga Sumat mahitungod kan Jesu-Cristo nga Anak han Dyos. Nagtikang ini sumala han iginsurat ni Isaias nga manaragna: “Nagsiring an Dyos, ‘Iini an akon magsarangyaw, nga akon ipadadara hin pag-una ha imo, basi andamon niya an imo aagian.’ May-ada usa nga naggiginoliat ha kamingawan, ‘Andama an dalan para han Ginoo; ngan tadonga an iya aagian!’” Pinakita hi Juan didto ha kamingawan, diin namunyag hiya hin mga tawo ngan nagwali. Ginsiring niya an mga tawo, “Bayai an iyo mga sala ngan pabunyag kamo, ngan mapasaylo an Dyos ha iyo.” Kinadto an ngatanan nga mga tawo tikang ha katunaan han Judea ngan ha syudad han Jerusalem pamati kan Juan. Nagkompisal hira han ira mga sala ngan nabunyagan hira didto han Salog Jordan. Hinimo hin buhok hin kamelyo an bado ni Juan, ngan anit an iya bakos ha hawak. Mga duron ug dugos ha kagurangan an pagkaon niya. Ginsiring niya an mga tawo, “Labaw pa hin gahom ha akon an tawo nga masunod ha akon. Diri ngani ako takos maghubad han higot han iya mga sandalyas. Nagbubunyag ako ha iyo hin tubig, kundi magbubunyag hiya ha iyo han Espiritu Santo.”
An Ebanghelyo han Ginoo.