PAGBASA I
Is 55:6-9
Pagbasa tikang han Basahan ni Isaias nga manaragna.
Balik kamo ngadto han Ginoo ngan pag-ampo kamo ha iya yana nga hirani hiya. Sidnga an mga magraot nga bayaan nira an ira maraot nga pagkinabuhi, ngan balhinon na nira an ira maraot nga panhunahuna. Pabalika hira ngadto han Ginoo nga aton Dyos; malolooyon hiya ngan madagmit magpasaylo. Nasiring an Ginoo, “Diri sugad han iyo panhunahuna an akon panhunahuna, ngan lain han iyo mga paagi an akon mga paagi. Sugad nga hitaas an kalangitan ha igbaw han tuna, hitaas man han iyo mga paagi ngan panhunahuna an akon mga paagi ngan panhunahuna.
An Pulong han Ginoo.
SALMO RESPONSORiO
Sal 145:2-3, 8-9, 17-18
℟. Haraniay an Dyos hadton nasangpit ha iya.
1. Adlaw-adlaw magpapasalamat ako,
hin waray paghunong ikaw dayawon ko.
Pagkadako gudman niya nga Ginoo,
angay hiya pagdayawon hin tutoo.
Diri gud masantop iya pagkadako,
labaw pa gud han ngatanan kahibaro.
℟. Haraniay an Dyos hadton nasangpit ha iya.
2. Ginoo mahigugmaon, maloloy-on,
mahinay masina, may gugma nga dayon.
Maupay ha tanan hiya nga Ginoo,
ha tanan binuhat napaid hin husto.
℟. Haraniay an Dyos hadton nasangpit ha iya.
3. Ginoo matadong iya binuhatan,
tanan nga buhat niya maloloy-on man.
Duok h'ya han tanan natawag ha iya,
kon kinasingkasing an pagtawag nira.
℟. Haraniay an Dyos hadton nasangpit ha iya.
PAGBASA II
Flp 1:20c-24, 27a
Pagbasa tikang han Surat ni San Pablo ngadto han mga taga Filipo.
Mga kabugtoan: An akon bug-os nga kinabuhi makahatag hin dungog kan Cristo ha kinabuhi ug ha kamatayon. Ano an kinabuhi? Para ha akon, hi Cristo an kinabuhi. An kamatayon makakadugang pa ha akon hin damo nga kaupayan. Kundi makakahimo ako hin mapulsanon nga buhat kon ipadayon ko ini nga kinabuhi, nagugupong ako kon hain an akon pipilion. Ambot kon mag-aano ako. Karuyag ko na bumaya hini nga kinabuhi ngan makig-usa kan Cristo, ngan bangin amo ini an mauruupay; kundi tungod ha iyo maupay ada nga mabuhi pa ako. Ngan yana, an importante nga butang amo nga mag-ukoy kamo hin kinabuhi nga subay han Maupay nga Sumat ni Cristo.
An Pulong han Ginoo.
EBANGHELYO
Mt 20:1-16a
Pagbasa tikang han santos nga Ebanghelyo sumala kan Mateo.
Nagsiring hi Jesus han iya mga tinun-an hini nga pananglitan, “An Ginhadian han langit sugad han tag-iya hin uma hin mga ubas nga timprano pa ha aga linakat pangita hin mga tawo nga iya susuholan hin pagtrabaho ha iya urubasan. Nakigsabot hiya pagbayad ha ira han nahiaaraan nga suhol nga usa ka salapi an usa ka adlaw, ngan ginsugo hira ngadto han iya urubasan. Ginawas liwat hiya ngadto ha merkado ha may alas nuybe han aga ngan nakakita hiya hin mga tawo nga nagkakatukdaw didto ngan waray mga trabaho. Sanglit ginsiring niya hira, ‘Pagtrabaho man kamo ha akon urubasan, ngan tatagan ko kamo hin angay nga suhol.’ Ngan kinadto hira. Niyan ha pagka-alas dose, ngan liwat ha alas tres, amo gihapon an ginbuhat niya. May mga alas singko na han kulop han pagkadto niya liwat ha merkado. Hinkit-an niya in iba pa nga mga tawo nga nagkakatukdaw la gihapon didto. ‘Kay ano nga kinakaragan niyo an bug-os nga adlaw dinhe nga waray ginbubuhat?’ nagpakiana hiya ha ira. Binmaton hira, ‘Kay waray man nagpatrabaho ha amon.’ Ginsiring hira niya, ‘Kon amo ito, kadto liwat kamo pagtrabaho ha akon urubasan.’ “Han pagkakulop na, ginsiring han tag-iya an iya tinaporan, ‘Tawga an mga nagtrabaho ngan tagi hira han ira suhol. Unaha pagbayad adton mga urhe magtrabaho, ngan urhe adton mga una magtrabaho. Gintagan hin tag-usa ka salapi an mga tawo nga nagtrabaho ha alas singko na han kulop. Sanglit han pagdaop na hin pagkarawat han suhol an mga tawo nga una magtrabaho, naghunahuna hira nga darudako an ira kakarawaton, kundi tinagan liwat hira hin tag-usa ka salapi an kada usa. Ginkarawat nira an ira suhol, ngan nagtikang hira hin pagngurutob kontra han tag-iya han urubasan. Nagsiring hira, ‘Iini nga mga tawo nga orhe magtrabaho, nagtrabaho sulod hin usa ka oras la, samtang kami nagtrabaho ha bug-os nga adlaw, ngan nag-antos han kapaso han adlaw. Kay ano nga gintagan mo hira pareho han iginhatag mo ha amon?’ Ngan ginbaton han tag-iya an usa ha ira, ‘Sangkay, pamati daw! Waray ako maglimbong ha imo. Di' ba inuyon ka hin usa ka salapi nga suhol hin usa ka adlaw nga pagtrabaho? Yana, karawta an imo suhol, ngan oli ha iyo. Karuyag ko tagan an orhe na magtrabaho hin pareho nga suhol han akon iginhatag ha imo. Waray ba ngay-an ako katungod paggamit han akon kwarta sugad han akon karuyag? O nauba ka ba tungod han akon kamahinatagon?’” Ngan gintapos ini ni Jesus hin pagsiring, “Sanglit, mahiuuna adton mga orhe, ngan mauorhe adton mga nahiuna.”
An Ebanghelyo han Ginoo.