PAGBASA I
Job 19:21-27
Pagbasa tikang han Basahan ni Job.
Nagsiring hi Job:
Akon kamo kasangkayan! Kaluoyi gad ako niyo! Ginhampak ako han kamot han Dyos. Kay ano nga pagpapakurian man ako niyo sugad han pagpakurii ha akon han Dyos? Diri pa ba igo an pagsakita niyo ha akon?
Karuyag ko unta nga may-ada manumdom han akon mga pulong ngan igsurat ini dida hin basahan! O pinaagi hin tigib iguhit an akon mga pulong dida hin bato, ngan igsurat ini basi diri hingalimtan ha kadayunan. Kundi maaram ako nga may-ada usa didto ha langit nga maabot ha kataposan hin pagpanalipod ha akon. Bisan kon ginkaon na hin sakit an akon panit, samtang aanhi pa ako hini nga lawas makita ako han Dyos. Makita ako ha iya pinaagi han akon kalugaringon nga mga mata, ngan diri na hiya usa nga diri kinikilala.
An Pulong han Ginoo.
SALMO RESPONSORIO
Sal 27:7-8A, 8b-9abc, 13-14
℟. Natoo ako han mag-upay nga mga butang
han Ginoo didto han tuna han mga buhi.
1. Pamatii, ako nga natawag, Ginoo.
Kalooyi ngan batona intawon ako!
8Pagsiring nimo, “Magsingba ka ha akon,”
binaton ako, “Akon ka dadaopon.”
℟. Natoo ako han mag-upay nga mga butang
han Ginoo didto han tuna han mga buhi.
2. Ayaw gad tago ha akon atubangan!
Ayaw hin kasina ha akon pagpahamtang;
ayaw isikway an imo surugoon,
kay hi ikaw man la an panabang nakon.
Ayaw ako bulagi, ayaw bayai.
℟. Natoo ako han mag-upay nga mga butang
han Ginoo didto han tuna han mga buhi.
3. Maaram ako nga hikikit-an ko pa,
an pagkamaupay han Ginoo yana;
Pagtapod ug paglaom han Ginoo,
ayaw pagturaw, lugod, ha iya tuo.
℟. Natoo ako han mag-upay nga mga butang
han Ginoo didto han tuna han mga buhi.
EBANGHELYO
Lc 10:1-12
Pagbasa tikang han santos nga Ebanghelyo sumala kan Lucas.
Katapos hini nagpili an Ginoo hin iba nga kapiton kagduha (72) nga kalalaken-an ngan ginsugo hira, padis padis, hin pag-una ha iya ngadto ha tagsa nga bungto ug dapit nga iya ngahaw kakadtoan. Nagsiring hiya ha ira, “Damo an aranihon, kundi gutiay la an mga mag-arani. Sanglit pag-ampo kamo han tag-iya han aranihon nga magpadara hiya hin mga mag-arani ngadto han iya aranihon. Kadto na! Ginsusugo ta kamo sugad hin mga karnero ha butnga hin mga lubo. Ayaw kamo pagdara hin supot o surudlan hin limos o sandalyas; ayaw kamo pakigbali bisan kan kanay dida ha dalan. Pagsulod niyo hin balay, siring anay, ‘An kalinaw maada hini nga balay.’ Kon naukoy didto in tawo nga murayaw an kinabuhi, ibilin ha iya an iyo ginpamulong nga kamurayaw; kon diri, bakwia an iyo ginpamulong nga kamurayaw. Pabilin dida hito ngahaw nga balay; kaon ngan inom han ira idudurot ha iyo, kay an magburudlay takos han iya suhol. Ayaw kamo pagbinurobalhin hin urokyan. Kon makadto kamo hin bungto ngan karawton kamo, kaon han igdudurot ha iyo, tambala niyo an mga magsakit didto hito nga bungto, ngan sidnga an mga tawo, ‘Haraniay na ha iyo an Ginhadian han Dyos.’ Kundi kon sumulod kamo hin bungto ngan diri kamo karawaton, kadto kamo ha kadalanan ngan siring, ‘Ginpapadpad namon kontra ha iyo bisan an tapotapo han iyo bungto nga nadukot ha amon mga tiil; kundi tigamni ini, haraniay na ha iyo an Ginhadian han Dyos!’ Susumatan ko kamo nga ha Adlaw han Paghukom, mas kalolooyan pa han Dyos an Sodoma kay hito nga bungto!
An Ebanghelyo han Ginoo.