PAGBASA I
Ef 4:32–5:8
Pagbasa tikang han Surat ni San Pablo ngadto han mga taga Efeso.
Lugod magmaloloy-on ngan magmalumo ha kasingkasing para han iba, ngan magpinasayloay kamo sugad han pagpasaylo ha iyo han Dyos pinaagi kan Cristo.
Kay mga hinigugma man kamo nga mga anak han Dyos, kinahanglan magtinguha kamo hin pagsubad ha iya. An gugma kinahanglan maghadi han iyo kinabuhi sugad han paghigugma ni Cristo ha aton, ngan iginhatag an iya kinabuhi tungod ha aton, sugad hin mahamot nga halad nga nakakalipay han Dyos.
Tungod kay mga tawo man kamo han Dyos, diri maupay nga hinabihan dida ha iyo in magraot nga buhat sugad han lawasnon nga kalaw-ayan an kamahilas, ug an kahalot. Ngan diri liwat naangay para ha iyo an paggamit hin maglaw-ay, tinuyaw, o maghugaw nga mga pulong. Gabay lugod magpasalamat kamo han Dyos. Masisiguro ini niyo: waray tawo nga malaw-ay, mahilas, o halot (kay an kahalot usa nga paagi hin pagsingba hin diyosdiyos) nga makarawat hin bahin didto han Ginhadian ni Cristo ngan han Dyos.
Ayaw kamo pagpalimbong bisan kan kanay pinaagi hin tinuyaw nga mga pulong; tungod hini nga mga butang maabot an kapungot han Dyos ha mga diri nagsusugot ha iya. Sanglit likayi niyo an sugad nga mga tawo. Nahigara kamo ngahaw ha pag-ukoy ha kasisidman, kundi tikang kamo mahimo nga mga tawo han Ginoo, aada na kamo ha kapawa. Sanglit kinahanglan mag-ukoy kamo hin kinabuhi sugad hin mga tawo nga sakop na han kapawa.
An Pulong han Ginoo.
SALMO RESPONSORIO
Sal 1:1-2, 3, 4 & 6
℟. Pagtalingoha kamo pagsubad han Ginoo,
sugad hin mga hinigugma nga anak niya.
1. Palaran an tawo nga diri natuod
han sagdon han mga magraot,
nga diri nasunod han susbaranan han mga makasasala
o natampo hadton nagtatamay han Dyos.
Lugod, ikinalilipay niya an pag-aram han balaod han Ginoo,
ngan pamalandong hini ha adlaw ngan ha gab-i.
℟. Pagtalingoha kamo pagsubad han Ginoo,
sugad hin mga hinigugma nga anak niya.
2. Pareho hiya hin kahoy nga naturok ha ligid hin sapa,
nga nabunga ha igo nga panahon,
ngan diri nalalaya an iya mga dahon.
Nauswag hiya han ngatanan nga iya binubuhat.
℟. Pagtalingoha kamo pagsubad han Ginoo,
sugad hin mga hinigugma nga anak niya.
3. Sanglit pagsisirotan han Dyos an mga makasasala
ngan ibubulag hira tikang han mga magtadong.
Kay an Dyos an nagmamangno han iya mga tawo,
kundi mawawara han kadayonan an mga nagbubuhat hin karat-an.
℟. Pagtalingoha kamo pagsubad han Ginoo,
sugad hin mga hinigugma nga anak niya.
EBANGHELYO
Lc 13:10-17
Pagbasa tikang han santos nga Ebanghelyo sumala kan Lucas.
Usa ka Adlaw nga Iparahuway, nagtutdo hi Jesus didto hin usa nga sinagoga. Nakadto in usa nga babaye nga may maraot nga espiritu ngan napulo kagwalo (18) na ka tuig an iya kasakit. Nakaob na gud hiya, ngan makuri na gud hiya makatadong. Han paghikit-i ha iya ni Jesus, ginsiring hiya, “Babaye, talwas ka na han imo sakit!” Idinuon ni Jesus an iya mga kamot ha iya, ngan nakatadong hiya dayon, ngan nagdayaw hiya han Dyos. Nasina an opisyal han sinagoga nga nagtambal hi Jesus ha Adlaw nga Iparahuway, sanglit nagsiring hiya ha mga tawo, “May unom ka adlaw diin kinahanglan magtrabaho kita; sanglit pakanhi kamo hin pagpatambal dida hito nga mga adlaw, kundi diri ha Adlaw nga Iparahuway!” Ginbaton hiya han Ginoo hin pagsiring, “Mga salingkapaw kamo! Bisan hin-o ha iyo maghuhubad han iya baka o asno tikang ha turubongan han hayop, ngan dadad-on ini ngadto ha gawas hin pagpainom ha Adlaw nga Iparahuway. Yana, iini in tulin ni Abraham nga gingapos ni Satanas sulod hin napulo kagwalo (18) na ka tuig; diri ba hiya huhubaran han iya mga gapos ha Adlaw nga Iparahuway?” Tungod hini nga iya baton naawod an mga kaaway ni Jesus, samtang an ngatanan nga mga tawo nalipay tungod han ngatanan nga urosahon nga mga butang nga iya ginbuhat.
An Ebanghelyo han Ginoo.