PAGBASA I
Dar 21:1-6, 10-13
Pagbasa tikang han Basahan han Darahonon.
Gindudumara han Ginoo an kanan hadi hunahuna, hin sugad kamasayon han iya pagmando han pag-awas hin usa nga sapa.
Mahihimo maghunahuna ka nga matadong an ngatanan nga imo ginbubuhat, kundi hinumdomi nga an Ginoo amo an naghuhukom han imo mga panuyo.
Buhata an matadong ngan maupay; labaw ini nga nakakalipay han Ginoo kay hin paghalad ha iya hin mga tutuboron nga halad.
Ginbubut-an an mga magraot han ira kamapinahitas-on ngan kamalabyaw, ngan sala ini.
Paglarang hin maupay ngan magkakamay-ada ka bahandi; kon inapiki an imo buhat maiimo la an kakablasan.
An karikohan nga naaangkon mo pinaagi hin limbong nawawara dayon; kundi pagdadad-on ka anay hini ngadto ha ganggang han kamatayon.
An mga magraot dayuday la gutom hin karat-an; waray gud tawo nga ira nalolooyan.
Kon kinakastigo an tawo nga mayubiton, bisan an tapang makakakuha dida hini hin pagturon-an. Mahibabaro an makinaadmananon han igintututdo ha iya.
Maaram an matadong nga Dyos han mga nahinanabo didto han mga panimalay han mga magraot ngan iya pagpupukanon hira.
Kon diri mo pamatian an pakibulig han mga kablas, diri man pamamatian an imo tawag hin pakibulig.
An Pulong han Ginoo.
SALMO RESPONSORIO
Sal 119:1, 27, 30, 34, 35, 44
℟. Pag-unhi ako, Ginoo,
dida ha dalan han imo mga sugo.
1. Palaran adton waray kasaypanan,
ngan han balaod han Ginoo nagtutuman.
℟. Pag-unhi ako, Ginoo,
dida ha dalan han imo mga sugo.
2. Buligi ako basi an imo mga balaod akon santapon,
ngan an imo mga pagturon-an akon pamamalandongon.
℟. Pag-unhi ako, Ginoo,
dida ha dalan han imo mga sugo.
3. Igintug-an ko an akon kamasinugtanon,
pinamatian ko an imo mga paghukom.
℟. Pag-unhi ako, Ginoo,
dida ha dalan han imo mga sugo.
4. Igsaysay ha akon an mga balaod nimo,
hin kinasingkasing pagtitipigan ko.
℟. Pag-unhi ako, Ginoo,
dida ha dalan han imo mga sugo.
5. Itugot nga imo mga sugo akon matuman,
kay aada ha ira an akon kalipayan.
℟. Pag-unhi ako, Ginoo,
dida ha dalan han imo mga sugo.
6. Han imo balaod ako pirme nagtutuman,
hin kadayonan ngan waray kataposan.
℟. Pag-unhi ako, Ginoo,
dida ha dalan han imo mga sugo.
EBANGHELYO
Lc 8:19-21
Pagbasa tikang han santos nga Ebanghelyo sumala kan Lucas.
Kinadto kan Jesus an iroy ngan kabugtoan niya, kundi waray makahirani ha iya tungod han damo nga mga tawo. May nagsiring kan Jesus, “Aadto ha gawas an iroy ngan kabugtoan mo, ngan karuyag makigkita ha imo.” Nagsiring hi Jesus ha ira ngatanan, “Adton namamati ngan nagtutuman han pulong han Dyos amo an iroy ngan kabugtoan ko.”
An Ebanghelyo han Ginoo.