PAGBASA I
Job 9:1-12, 14-16
Pagbasa tikang han Basahan ni Job.
Tinuod, hinbatian ko na ito ngatanan hadto pa. Kundi uunanhon hin pakadaog hin usa ka tawo han iya sumbong kontra han Dyos? Uunanhon hin usa ka tawo hin pakiglantugi ha iya? Han yinukot nga iya pakiana waray gud tawo nga makakabaton ha iya. Makinaadmananon ngan gamhanan gud an Dyos; waray tawo nga makakaato ha iya.
Binabalhin niya an kabukiran hin diri hiya nagpapahibaro, ngan tungod han iya kasina binubungkag ini niya. Nagpapadara hin mga linog an Dyos ngan binabay-og an tuna; inuuy-og niya an mga harigi nga tinutungtongan han tuna. Makakagpugong hiya han pagsirang han adlaw ngan hin pagsanag han mga bitoon ha gab-i.
Waray may binmulig han Dyos hin pagbitad han kalangitan, o hin pagtamak han taludtod han higante nga mananap ha dagat. Gintaod han Dyos didto ha langit an mga bitoon—an Kabo, an Orion, an Pleyades, ngan an mga bitoon han timogan. Diri kita nakakasabot han dagko nga mga butang nga iya ginbubuhat, ngan waray pagkatapos an iya mga milagro.
Nalabay an Dyos, kundi diri ako nakita ha iya. Nakuha hiya han iya kinaruruyag, ngan waray nakakapugong ha iya; waray nangangahas hin pagpakiana ha iya, “Ano an imo ginbubuhat?”
An Pulong han Ginoo.
SALMO RESPONSORIO
Sal 88:10bc-11, 12-13, 14-15
℟. Dumangat unta ngada ha imo,
Ginoo, an akon pag-ampo.
1. O Ginoo, nagtatawag ako ha imo kada adlaw,
ngan inaalsa ko an akon mga kamot ngadto ha imo ha pag-ampo!
Nagbubuhat ka ba hin mga milagro para han mga patay?
Nabangon ba hira ngan nagdadayaw ha imo?
℟. Dumangat unta ngada ha imo,
Ginoo, an akon pag-ampo.
2. Ginhihimangraw ba ha lubnganan an imo dayuday nga paghigugma,
o an imo kamatinumanon ha dapit han kabungkagan?
Hinkikit-an ba didto hito nga dapit han kasisidman an imo mga milagro,
o an imo pagkamaupay ha tuna han kamatayon?
℟. Dumangat unta ngada ha imo,
Ginoo, an akon pag-ampo.
3. O Ginoo, nagtatawag ako ha imo hin pakibulig;
nag-aampo ako ha imo kada aga.
Kay ano nga iginsisikway mo ako, Ginoo?
Kay ano nga tinatagoan mo ako?
℟. Dumangat unta ngada ha imo,
Ginoo, an akon pag-ampo.
EBANGHELYO
Lc 9:57-62
Pagbasa tikang han santos nga Ebanghelyo sumala kan Lucas.
Samtang naglalakat hira ha dalan, nagsiring in usa ka tawo kan Jesus, “Masunod ako ha imo bisan ngain.” Ginsiring hiya ni Jesus, “May mga buho an mga miro ngan may mga salag an katamsihan, kundi waray ngani dapit nga sadang kapahuwayan an Anak han Tawo.” Nagsiring hi Jesus ha lain nga tawo, “Sunod ha akon.” Kundi nagsiring adto nga tawo, “Tugoti ako anay hin pag-uli ngan paglubong han akon amay.” Binaton hi Jesus, “Asay papaglubnga an mga patay han ira kalugaringon nga minatay. Kundi ikaw, lakat ngan igwali an Ginhadian han Dyos.” Nagsiring in usa pa nga tawo, “Masunod ako ha imo; kundi tugoti ako anay pagkadto ngan pagpanamilit han akon panimalay.” Nagsiring hi Jesus ha iya, “Diri angay han Ginhadian han Dyos an bisan hin-o nga kinapot na han arado ngan nagliliningi pa.”
An Ebanghelyo han Ginoo.