Lunes katima han Domingo han Pentecostes

PAGBASA I 

Gen 3:9-15, 20

Pagbasa tikang han Basahan han Genesis.

Kahuman han lalake pagkaon han bunga han kahoy, gintawag hiya han Ginoo nga Dyos ngan nagpakiana, “Hain ka?” Binaton hiya, “Hinbatian ko ikaw dinhe han tanaman; nahadlok ako ngan tinago ako ha imo, kay hubo ako.” “Hin-o an nagsumat ha imo nga hubo ka?” nagpakiana an Dyos. “Kinaon ka ba han bunga nga igindiri ko ha imo?” Binaton an lalake, “Gintagan ako han babaye nga imo iginbutang dinhe nga kaupod nakon, ngan kinaon ako.” Ginpakianhan han Ginoo nga Dyos an babaye, “Kay ano nga ginbuhat mo ini?” Binaton hiya, “Ginlimbongan ako han halas hin pagkaon hini.” Niyan ginsiring han Ginoo nga Dyos an halas, “Tungod hini pagsisirotan ko ikaw; han ngatanan nga kamanampan ikaw la mag-aantos hini nga gaba: tikang yana ha imo tiyan magdadanas ka ngan tapotapo an imo kakaonon samtang buhi ka pa. Hihimoon ko nga magkaaway kamo—hi ikaw ngan han babaye; dayuday magkaaway an iya ngan an imo mga tulin. An iya mga tulin amo an madugmok han imo ulo, ngan pagtutukbon man nimo an iya tikod.” Ginngaranan ni Adan an iya asawa nga Eva kay amo hiya an iroy han ngatanan nga mga tawo.

An Pulong han Ginoo.

SALMO RESPONSORIO

Jdt 13: 18,19

(b) Ikaw an gihahataasi nga dungog han aton tulin.

1. Minahal nga anak nga babaye,

ginpakaupay ka han Gilalabawi nga Dyos

labaw han bisan hin-o nga babaye ha tuna.

Angay pagdayawon an Ginoo nga Dyos

nga nagtuha han langit han tuna! (b)

2. An imo pagsarig han Dyos

diri gud hingangalimtan

hadton magpasangyaw han gahom han Dyos. (b)

Kon di’ man, ini salmo responsorio:

Sal 87:1-2, 3 and 5, 6-7

(b) Mga butang nga urusahon an iginyakan tungod ha imo, O syudad han Ginoo.

1. An Dyos an nagtindog hadton syudad niya,

ha baraan nga bukid ini pagtindoga.

Syudad Jerusalem iya hinigugma,

labaw bis’ diin ha Israel nga tuna. (b)

2. Syudad han Dyos, imo na nga pamatian,

Mga butang ur’sahon iya ginyakan.

Hiunong han Sion ini’n igyayakan:

tanan nasod maiiya ginsakopan;

ngan an Dyos nga amo'n Labaw han ngatanan,

mahatag gud ha iya hin karig-onan. (b)

3. Malista’n Ginoo han mga katawhan,

Bas’ magin taga-Jerusalem an tanan.

An ngatanan nga didto’n iya urokyan,

magkakaranta ngan magsasarayaw man. (b)

PAGBASA II

Jn 19:25-34

Pagbasa tikang han santos nga ebanghelyo sumala kan Juan.

Natukdaw hirani han kros ni Jesus hira iya nanay, an bugto nga babaye ni iya nanay, hi Maria nga asawa ni Cleopas, ngan hi Maria Magdalena. Hinkit-an ni Jesus hi iya nanay ngan an tinun-an nga iya hinigugma nga natukdaw harani han kros; sanglit nagsiring hiya kan iya nanay, “Babaye, iini an imo anak.” Ngan nagsiring hiya ngadto han tinun-an, “Iini an imo nanay.” Ngan tikang hadto gindara hiya han tinun-an hin pag-ukoy tampo han iya panimalay. Maaram hi Jesus nga natuman na an ngatanan, ngan basi matuman an kasuratan, nagsiring hiya, “Inuuhaw ako.”

May surudlan didto nga puno hin maaslom nga bino. Ginhumog nira an espongha hin bino, igintaod ha kataposan hin sanga hin isopo, ngan iginhungit ha iya. Dinimdim hi Jesus han bino ngan nagsiring hiya, “Natuman na!” Ngan dinuko hiya ngan nabunoson hiya han iya kinabuhi. Ngan naghangyo kan Pilato an mga Judiyo nga barion na la an mga bitiis han mga tawo nga iginraysang, ngan tanggalon na hira ha kros. Ginbuhat ini nira, kay Viernes na adto ngan nadiri hira nga magpabilin ha kros an lawas ha Adlaw nga Iparahuway, kay baraan kaupay an tiarabot nga Adlaw nga Iparahuway. Sanglit kinadto an mga sondalo ngan ginbari an mga bitiis han syahan nga tawo ngan han usa pa nga tawo nga iginraysang upod kan Jesus. Kundi han pag-abot na nira kan Jesus, hinkit-an nira nga patay na hiya, sanglit waray na la nira baria an iya mga bitiis. Kundi ginbangkaw an iya kagiliran hin usa han mga sondalo, ngan inawas dayon in dugo ug tubig.

An Ebanghelyo han Ginoo.