PAGBASA I
Job 42:1-3, 5-6, 12-17
Pagbasa tikang han Basahan ni Job.
Binaton han Ginoo hi Job. Maaram ako, Ginoo, nga labi ka hin kagamhanan; nga makakahimo ka han ngatanan nga imo karuyag. Napakiana ka kon ano nga sinususnan ko an imo kinaadman, nga usa man la ako nga tawo nga waray hibaro. Naghimangraw ako hiunong hin mga butang nga waray nakon hisabti, hiunong hin mga urosahon nga makuri ko hin duro matukib. Hadto anay hinbaroan ko la an iginsumat ha akon han iba, kundi yana hinkit-an ko na ikaw han akon kalugaringon nga mga mata. Sanglit naaawod ako han ngatanan nga akon iginyakan, ngan nagbabasol ako nga nahigda ha tapotapo ngan ha mga agbon.
Ginpakaupay han Ginoo an kataposan nga mga tuig ni Job labaw pa han pagpakaupay niya han una. Nagtag-iya pa hi Job hin napulo kag-upat kayukot (14,000) nga mga karnero, unom kayukot (6,000) nga mga kamelyo, duha kayukot (2,000) nga mga baka, ngan usa kayukot (1,000) nga mga asno. Nagin amay pa hiya hin pito nga mga anak nga kalalaken-an ngan tulo nga kababayen-an. Ginngaranan niya kan Jemima an suhag nga babaye, Kesiya an ikaduha, ngan Keren-hapuc an puto. Waray na iba nga kababayen-an ha bug-os nga kalibutan nga sugad kamaghusay han mga anak nga kababayen-an ni Job. Gintagan hira han ira amay hin bahin han panurundon kaupod han ira kabugtoan nga kalalaken-an. Katapos hini nakaabot pa hi Job hin panuigon nga usa kagatos ngan kap-atan (140), igo nga kaiha hin pakakita han iya mga apo, ngan mga apo han iya mga apo. Ngan namatay hiya nga lagas na gud hin duro.
An Pulong han Ginoo.
SALMO RESPONSORIO
Sal 119:66, 71, 75, 91, 125, 130
℟. Ginoo, pasiranga an imo bayhon dinhi ha akon.
1. Tagi hin kinaadman ug hibaro,
kay han imo mga sugo, natapod ako.
℟. Ginoo, pasiranga an imo bayhon dinhi ha akon.
2. Nakaupay ha akon an imo mga kastigo,
kay han imo mga sugo natutdoan ako.
℟. Ginoo, pasiranga an imo bayhon dinhi ha akon.
3. Magtadong, Ginoo, an imo mga paghukom,
imo ako ginsirotan kay ikaw matinumanon.
℟. Ginoo, pasiranga an imo bayhon dinhi ha akon.
4. Ngada yana nagpabilin an mga butang,
kay imo man ini pagburot-an;
kay surogoon man an ngatanan.
℟. Ginoo, pasiranga an imo bayhon dinhi ha akon.
5. Imo ako oripon, tagi hin sarabotan,
basi hisabotan ko an imo pagturon-an.
℟. Ginoo, pasiranga an imo bayhon dinhi ha akon.
6. Nahatag hin kapawa an dayag nga pagturon-an,
an mga tapang natatagan hin kinaadman.
℟. Ginoo, pasiranga an imo bayhon dinhi ha akon.
EBANGHELYO
Lc 10:17-24
Pagbasa tikang han santos nga Ebanghelyo sumala kan Lucas.
Binalik nga puno hin kalipay an kapitoan kagduha (72) nga kalalaken-an ngan nagsiring, “Ginoo, sinugot ha amon bisan an mga yawa, han pagsugoa namon ha imo ngaran!” Ginbaton hira ni Jesus, “Hinkit-an ko hi Satanas nga nahulog sugad hin kikidlat tikang ha langit. Pamati! Gintagan ko kamo hin gahom, basi tamakan niyo an mga halas ngan mga bungad, ngan an ngatanan nga gahom han kaaway, ngan waray bisan ano nga makakadaot ha iyo. Kundi pagkalipay kamo, diri tungod nga sinusugot kamo han magraot nga espiritu; kundi lugod pagkalipay kamo, kay nahisurat na an iyo mga ngaran didto ha langit.”
Hito ngahaw nga panahon nalipay hi Jesus pinaagi han Espiritu Santo, ngan nagsiring, “Amay, Ginoo han langit ug tuna! Nagpapasalamat ako ha imo, kay iginpakita mo ha mga diri mag-aram an imo gintago tikang han mga may-ada aram ug hibaro. Oo, Amay ko, natuman ini, kay amo man an imo karuyag ug pagbuot. “Iginhatag ha akon han akon Amay an ngatanan nga mga butang. Waray nakilala han Anak labot han Amay, ngan waray nakilala han Amay labot han Anak ngan hadton mga ginpili han Anak hin pagpahayag ha iya.”
Kahuman, inatubang hi Jesus ha mga tinun-an ngan ginhilit hira hin pagsiring, “Kapalaran niyo hin pagkita han mga butang nga iyo hinkit-an! Susumatan ko kamo nga damo nga mga manaragna ngan mga hadi an karuyag kumita han iyo hinkit-an, kundi waray hira makakita, ngan mamati han iyo hinbabatian, kundi waray hira makabati.”
An Ebanghelyo han Ginoo.