PAGBASA I
Ecc 11:9—12:8
Pagbasa tikang han Basahan han Ecclesiastes.
Mga batan-on, pagpahimulosi an iyo pagkabatan-on. Pagmalipayon samtang batan-on ka pa. Buhata an iyo karuyag ngan tumana an ungara han iyo kasingkasing. Kundi panumdom kamo nga huhukman kamo han Dyos pinaagi han bisan ano nga ginbubuhat niyo. Ayaw itugot nga may-ada butang nga makapaguol o makapasakit ha iyo. Diri gud mag-iiha an iyo pagkabatan-on.
Sanglit hinumdomi an iyo Magburuhat samtang nga batan-on pa kamo, nga diri pa naabot adton magsulob-on nga mga adlaw ngan mga tuig, nga masiring kamo, “Waray ako makagpahimulos han kinabuhi.” Amo ito nga panahon nga magmamadulom ha iyo an kapawa han adlaw, han bulan, ngan han mga bitoon, ngan diri na gud magpapapas an magdakmol nga mga dampog. Niyan mangungurog an iyo mga butkon nga nagpanalipod ha iyo, ngan manluluya an iyo mga bitiis nga magkusog pa yana. Kulang na an iyo mga ngipon hin pagsamsam han iyo kinakaon, ngan magmamadaparap an pagkita han iyo mga mata. Diri na mabati an iyo mga durunggan han aringasa ha kalsada. Makuri na kamo makabati han aringasa han gilingan o han tokar han mga turonggan, kundi mapupukaw kamo ha iyo pagkaturog bisan la han honi hin tamsi. Mahalawhaw para ha iyo an higtaas nga mga dapit ngan makuri na an iyo paglakat. Pag-uubanon na kamo; magsasagodsod na an iyo pagpitad, ngan mawawaray na an ngatanan nga mga hingyap. Mauli kita ha aton kataposan nga pahuwayan, ngan niyan magkakamay-ada pagkasubo ha mga kadalanan. Mauutod an kadena nga salapi, ngan mahuhulog ngan mabubuong an suga nga bulawan; mauutod an pisi ha atabay ngan mabubuong an biso hin tubig. Mabalik ha tapotapo han tuna an aton mga lawas, ngan mabalik an aton espiritu ngadto sa Dyos nga naghatag hini ha aton. Waray la kapulsanan, waray la kapulsanan, nagsiring an Magwarali. Waray la kapulsanan ini ngatanan!
An Pulong han Ginoo.
SALMO RESPONSORIO
Sal 90:3-4, 5-6, 12-13, 14 & 17
℟. Ha ngatanan nga panahon,
ikaw Ginoo, an amon darangpan.
1. Imo ginsugo pagpabalik an mga tawo,
ha daan niya nga kahimtang nga tapotapo.
Yukot nga mga tuig ha imo pagtan-aw,
sugad la hira hin usa ka adlaw.
Sugad hin kakulop nga linmabay na,
sugad hin takna ha gab-i nga pag-agma.
℟. Ha ngatanan nga panahon,
ikaw Ginoo, an amon darangpan.
2. Imo mga tawo dinhe kinukuha,
gin-aanod kami sugad la hin baha;
kinabuhi namon diri nag-iiha,
sugad la hin inop kon naaga na.
Sugad la kami hadton mga banwa,
nga natumos dida hiton aga.
Natubo, nabuswak, ngan nabukad hira,
ha pagkagab-i narapdag, nalalaya.
℟. Ha ngatanan nga panahon,
ikaw Ginoo, an amon darangpan.
3. Itutdo nga lumalabay la an kinabuhi,
basi mamay-ada kinaadman kami.
Tubtob san-o an imo kasina ha amon, Ginoo,
kalooyi an mga surugoon nimo.
℟. Ha ngatanan nga panahon,
ikaw Ginoo, an amon darangpan.
4. Kada aga pun-a kami han imo gugma,
basi kami ha imo dayuday magkanta.
Ginoo, amon Dyos, ibilin an imo bendisyon,
basi an amon mga buhat magmainuswagon.
℟. Ha ngatanan nga panahon,
ikaw Ginoo, an amon darangpan.
EBANGHELYO
Lc 9:43b-45
Pagbasa tikang han santos nga Ebanghelyo sumala kan Lucas.
Dako pa an paghipausa han mga tawo han ngatanan nga ginbuhat ni Jesus, han pagsiring niya ha iya mga tinun-an, “Ayaw hingalimti ini nga akon iginsusumat ha iyo: itutubyan an Anak han Tawo ngadto ha gahom han mga tawo.” Kundi waray hira makasabot kon ano an kahulugan hini, ngan nahadlok hira hin pagpakiana ha iya mahitungod hini nga butang.
An Ebanghelyo han Ginoo.