PAGBASA I 

Lev 25:1, 8-17

Pagbasa tikang han basahan han Levitico.

Naghimangraw an Ginoo kan Moises didto ha Bukid Sinai, “Pag-ihap hin pito katagpito ka tuig, nga maabot hin kaupatan kagsiyam (49) ka tuig ngatanan. Niyan dida han ikanapulo nga adlaw han ikapito nga bulan, an Adlaw han Pagtubos, pagsugo hin usa ka tawo hin pagtrompeta ha bug-os nga tuna. Dida hini nga paagi iglalain niyo an ikakalim-an (50) nga tuig ngan igsasangyaw niyo an kagawasan ngadto han ngatanan nga mga umurukoy han tuna. Sulod hini nga tuig ig-ooli ngadto han tunay nga tag-iya o han iya mga tulin an ngatanan nga hiagi nga iginbaligya, ngan igbabalik ngadto han iya panimalay an ngatanan nga iginbaligya nga oripon. Diri niyo pagtatamnan an iyo kaumhan o pag-aanihon an aranihon nga turok la ha iyo uma, o pangunguhaon an mga ubas didto han iyo mga urubasan nga waray niyo paghawani. Magigin baraan gud para ha iyo an bug-os nga tuig; kakaonon la niyo adton mga abot tikang han kaumhan nga waray niyo pagtrabaho-a.

“Dida hini nga tuig ig-ooli ngadto han tunay nga tag-iya an ngatanan nga hiagi nga iginbaligya. Sanglit kon magbaligya kamo hin tuna ngadto han iyo igkasi Israelita o pumalit kamo tikang ha iya hin tuna, ayaw niyo pagbuhata an diri kaangayan. Ipasikad an bayad han tuna dida han kadamo han mga tuig nga pagpupulsan an tuna ngada han pag-abot han Tuig han Pagpahioli. Kon damo pa an mga tuig, marumahal man an bayad, kundi kon gutiay na la an mga tuig, barubarato man an bayad, kay an iginbabaligya amo an kadamo han mga abot nga mahahatag han tuna. Ayaw paglimbong hin iyo igkasi Israelita, kundi kahadloki ngan tahora niyo an Ginoo nga iyo Dyos.”

An Pulong han Ginoo.

SALMO RESPONSORIO

Sal 67:2-3, 5, 7-8

(b) Pagdayawon ka han mga nasud, O Dyos.

1. O Dyos, pagmaloloy-on manggad ha amon,

imo unta kami pagpakaupayon.

Tan-awa kami ha im' kamaloloy-on,

nga sabton han 'tanan imo kaburut-on.

Tanan mga nasod unta mahibaro,

han katalwasan nga natikang ha imo.

(b) Pagdayawon ka han mga nasud, O Dyos.

2. Maglipay na unta adton kanasoran,

ngan magkaranta na nga may kalipayan.

Kay matadong an paghukom mo han tanan,

ngatanan nga nasod im' ginmamandoan.

(b) Pagdayawon ka han mga nasud, O Dyos.

3. Kay an katunaan nanmunga hin duro,

naghatag hin abot, hin ani nga husto.

An Dyos, nga aton Dyos naglipay ha aton,

an Dyos amo an ha aton nagbendisyon.

Katawhan ha tanan dapit mag-uruyon

pagyukbo ha iya hin matinahoron.

(b) Pagdayawon ka han mga nasud, O Dyos.

PAGBASA II          

Mt 14:1-12

Pagbasa tikang han santos nga ebanghelyo sumala kan Mateo.

Hadto nga panahon nakabati hi Herodes, nga hadi ha Galilea mahitungod kan Jesus. “Amo gud hiya hi Juan nga Parabunyag nga nabanhaw,” ginsiring niya an iya mga sakop. “Sanglit may-ada niya hini nga gahom hin pagbuhat hin mga milagro.”

Kay iginpadakop, iginpagapos, ngan iginpapriso ni Herodes hi Juan. Ginbuhat niya ini tungod kan Herodias nga asawa han iya ngahaw bugto nga hi Felipe. Ginsiniring hi Herodes ni Juan nga Parabunyag, “Diri tugot nga pangasaw-on mo an asawa han imo bugto!” Karuyag ni Herodes patayon hi Juan, kundi nahadlok hiya han mga Judiyo, kay gin-isip nira nga manaragna hi Juan. Dida han kaadlawan ni Herodes sinayaw an anak nga babaye ni Herodias ha atubangan han ngatanan. Duro an kalipay ni Herodes, sanglit nagsaad hiya ha iya: “Nagsusumpa ako nga akon ihahatag ha imo an bisan ano nga imo pangaroon!” Ha paglarang han iroy niya, nagsiring hiya kan Herodes, “Ihatag ha akon yana dayon sinalod ha plato an ulo ni Juan nga Parabunyag!” Nabido an hadi, kundi tungod han panumpa nga ginhimo niya ha atubangan han iya mga dinapit, nagsugo hiya nga tumanon an pinangangaro han daragita. Sanglit pinapugotan niya hi Juan didto ha bilanggoan. Gindara an ulo nga sinalod ha plato ngan iginhatag ngadto han daragita, ngan gindara han daragita ngadto han iroy niya. Niyan inabot an mga tinun-an ni Juan, ginkuha nira an iya lawas, ngan iginlubong; pagkatapos, napakadto hira hin pagsumat kan Jesus.

An Ebanghelyo han Ginoo.