PAGBASA I
Is 63:16b-17, 19b; 64:2-7
Pagbasa tikang han Basahan ni Isaias nga manaragna.
Ikaw, O Ginoo, amo an amon amay nga dayuday nagtutubos ha amon. Kay ano nga itinugot mo man nga mahisalaag kami tikang han imo mga paagi? Kay ano nga ginpatig-a mo hin duro an amon mga ulo sanglit nabulag kami ha imo? Balik gad, tungod hadton mga nag-aalagad ha imo, tungod han mga tawo nga dayuday mo na gin-angkon. Kay ano nga diri mo ginririksi hin pag-abre han langit ngan lumusad ka? Kon nakita ha imo an kabukiran, nababay-og ini hira hin kahadlok! Nangungurog ini sugad hin tubig nga nagkakaladkad ha bawbaw hin mapaso nga kalayo. Kadi ngan ipadayag an imo gahom ngadto han imo mga kaaway, ngan pakuroga an mga nasod dida ha imo atubangan! May panahon hadto nga kinmanhi ka ngan nagbuhat hin magpakaharadlok nga mga butang nga waray namon pagpaabota; hinkit-an ka han kabukiran ngan nagkababay-og ini tungod hin kahadlok. Waray pa may nakakita o nakabati hin Dyos nga sugad ha imo, nga nagbubuhat hin sugad nga mga binuhatan para hadton mga naglalaom ha iya. Kinakarawat mo adton mga nalilipay hin pagbuhat hin matadong, adton mga nahinunumdom han imo karuyag para han ira kinabuhi. Nasina ka ha amon, kundi nagpadayon kami hin pagpinakasala; bisan pa ha imo dako nga kasina nagpadayon kami hin pagbuhat hin sayop tikang pa han kadaan nga mga panahon. Nagin salaan kami ngatanan; mahugaw gud bisan pa an amon gimamag-upayi nga mga binuhatan. Tungod han amon mga sala sugad la kami hin mga dahon nga laya ngan iginpapalid han hangin. Waray gud nag-aampo ngada ha imo; waray gud nadangop ha imo hin pakibulig. Tinmago ka tikang ha amon ngan ginpabay-an mo kami tungod han amon mga sala. Kundi ikaw, O Ginoo, amo an amon amay. Sugad kami hin lapok ngan ikaw sugad hin parahimo hin daba. Ginhimo mo kami,
An Pulong han Ginoo.
SALMO RESPONSORIO
Sal 80:2-3, 15-16, 18-19
℟. Pakadaa kami ha imo Ginoo; pakitaa kami han imo bayhon ngan matatalwas kami.
1. Pamatii kami, O Magmarangno han Israel;
dungga kami, pangulo han imo panon.
O ikaw nga nalingkod han imo trono dida han kerubim,
ipadayag an imo gugma han mga tribo ni Efraim, Benjamin, ug Manases!
Ipakita ha amon an imo kusog;
kadi ngan talwasa kami!
℟. Pakadaa kami ha imo Ginoo; pakitaa kami han imo bayhon ngan matatalwas kami.
2. Lingia kami, O Dyos nga Labi Kamakagarahum!
Tamdi kami tikang ha langit;
kadi ngan panimangnoa an imo balagon hin ubas!
Kadi ngan panimangnoa ini nga balagon nga ikaw ngahaw an nagtanom,
ini nga luyat nga balagon nga imo ginpakusog hin duro!
℟. Pakadaa kami ha imo Ginoo; pakitaa kami han imo bayhon ngan matatalwas kami.
3. Panalipdi ngan bantayi an katawhan nga imo ginpili,
an nasod nga imo ginpakusog hin duro!
Diri na gud kami matalikod ha imo;
buhia kami, ngan pagdadayawon ka namon.
℟. Pakadaa kami ha imo Ginoo; pakitaa kami han imo bayhon ngan matatalwas kami.
PAGBASA II
1 Cor 1:3-9
Pagbasa tikang han Syahan nga Surat ni San Pablo ngadto han mga taga Corinto.
Mga kabugtoan: An Dyos nga aton Amay ngan an aton Ginoo Jesu-Cristo maghatag unta ha iyo han grasya ug kamurayaw.
Dayuday nagpapasalamat ako han akon Dyos para ha iyo tungod han grasya nga iginhatag niya ha iyo pinaagi kan Jesu-Cristo. Kay dida ha pakig-usa kan Cristo nahura kamo han ngatanan nga mga butang, upod an ngatanan nga pagpamulong ngan ngatanan nga hibaro. Nagmarig-on dida ha iyo an mensahe mahitungod kan Cristo: tungod hini nakarawat niyo an ngatanan nga kaupayan samtang naghuhulat kamo han pagpadayag han aton Ginoo Jesu-Cristo. Paririg-onon liwat kamo niya tubtob ha kataposan, basi hiagian kamo nga waray kasaypanan ha Adlaw pagbalik han aton Ginoo Jesu-Cristo. Sarig kamo sa Dyos nga nagtawag ha iyo, basi kamo magin kausa han iya Anak nga hi Jesu-Cristo nga aton Ginoo.
An Pulong han Ginoo.
EBANGHELYO
Mc 13:33-37
Pagbasa tikang han santos nga Ebanghelyo sumala kan Marcos.
Nagsiring hi Jesus ha iya mga tinun-an, “Pagbantay ngan pag-ikmat kamo kay diri kamo maaram kon san-o ini mahinanabo. Sugad ini hin tawo nga binaya han iya panimalay ngan linakat ha kahigrayoan. Igintapod niya an pagdumara han iya panimalay ha iya mga surugoon, an tagsa ha iya kalugaringon nga buruhaton; ngan gintugon niya an bantay han portahan nga dayuday mag-ikmat hiya. Sanglit pagbantay man kamo kay diri kamo maaram kon san-o aabot an agaron han balay—kon ha kagab-ihon o ha katutnga ba, kon ha panugaok han manok o ha kaagahon na ba. Kon umabot hiya hin tigda, kinahanglan diri kamo hiabotan nga nangangaturog. Sanglit kon ano an igsisiring ko ha iyo, igsisiring ko liwat ha ngatanan: pagbantay kamo!”
An Ebanghelyo han Ginoo.