PAGBASA I

Ecc 1:2; 2:21-23

Pagbasa tikang han Basahan han Ecclesiastes.

Waray la kapulsanan, waray kapulsanan, nasiring an Magwarali. Waray kapulsanan an kinabuhi. An ngatanan waray la kapulsanan.

Nagkakabudlay ka hin butang ha bug-os mo nga kinaadman, hibaro, ug sarabutan, ngan katapos ibibilin mo ini ngatanan hin tawo nga waray gud pagkabudlay hini. Waray la ini pulos ngan diri gud angay buhaton! Nagkakabudlay ngan nababaraka ka ha bug-os mo nga kinabuhi, ngan ano man an imo makukuha hini? Samtang buhi ka pa, kabaraka ug kasakit la ha kasingkasing an gindadara han ngatanan nga imo binubuhat. Bisan ha kagab-ihon diri nakakapahuway an imo hunahuna. Waray gudla kapulsanan ini ngatanan.

An Pulong han Ginoo.

SALMO RESPONSORiO          

Sal 90:3-4, 5-6, 12-13, 14 & 17

(b) Kon yana namamati kamo han iya tingog

ayaw pagtig-aha an iyo kasingkasing.

1. Imo ginsugo pagpabalik an mga tawo,

ha daan niya nga kahimtang nga tapotapo.

Yukot nga mga tuig ha imo pagtan-aw,

sugad la hira hin usa ka adlaw.

Sugad hin kakulop nga linmabay na,

sugad hin takna ha gab-i nga pag-agma.

(b) Kon yana namamati kamo han iya tingog

ayaw pagtig-aha an iyo kasingkasing.

2. Imo mga tawo dinhe kinukuha,

gin-aanod kami sugad la hin baha;

kinabuhi namon diri nag-iiha,

sugad la hin inop kon naaga na.

Sugad la kami hadton mga banwa,

nga natumos dida hiton aga.

Natubo, nabuswak, ngan nabukad hira,

ha pagkagab-i narapdag, nalalaya.

(b) Kon yana namamati kamo han iya tingog

ayaw pagtig-aha an iyo kasingkasing.

3. Itutdo nga lumalabay la an kinabuhi,

basi mamay-ada kinaadman kami.

Tubtob san-o an imo kasina ha amon, Ginoo,

kalooyi an mga surugoon nimo.

(b) Kon yana namamati kamo han iya tingog

ayaw pagtig-aha an iyo kasingkasing.

4. Kada aga pun-a kami han imo gugma,

basi kami ha imo dayuday magkanta.

Ginoo, amon Dyos, ibilin an imo bendisyon,

basi an amon mga buhat magmainuswagon.

(b) Kon yana namamati kamo han iya tingog

ayaw pagtig-aha an iyo kasingkasing.

PAGBASA II

Col 3:1-5, 9-11

Pagbasa tikang han Surat ni San Pablo ngadto han mga taga Colosas.

Mga kabugtoan: Ginbanhaw na kamo upod kan Cristo, sanglit pangitaa niyo an mga butang nga aadto ha langit, diin nalingkod hi Cristo han iya trono, ha tuo han Dyos. Ikadto an iyo hunahuna han mga butang didto ha langit, diri han mga butang dinhe ha tuna. Kay namatay na kamo, ngan an iyo kinabuhi natatago upod kan Cristo dida ha Dyos. An iyo matuod nga kinabuhi amo hi Cristo, ngan kon magpahayag na hiya, magpapahayag man liwat kamo upod ha iya ngan maangbit kamo han iya himaya!

Sanglit, kinahanglan ilubong na niyo an tunan-on nga mga karuyagon nga nagdudumara ha iyo, sugad han pagkamalaw-ay, pagkamahilas, pagkaipa, maraot nga mga balatian, ngan kahalot (kay usa nga paagi hin pagsingba hin mga diyosdiyos an kahalot). Diri kamo maggipabuwabuwa, kay ginlubas na niyo an iyo daan nga pagkatawo upod an iya mga ginawian, ngan nagsul-ot na kamo han bag-o nga pagkatawo. Amo ini an bag-o nga pagkatawo nga kanunay ginbabag-o han Dyos, an Magburuhat, sugad han iya kalugaringon nga ladawan, basi mahingpit an iyo pagkilala ha iya. Tungod hini, waray na mga Hentil ngan mga Judiyo, mga tinori ngan diri mga tinori, mga langyaw, mga tapang, mga oripon o talwas nga mga tawo, kundi hi Cristo an ngatanan, ngan hi Cristo aada han ngatanan.

An Pulong han Ginoo.

EBANGHELYO

Lc 12:13-21

Pagbasa tikang han santos nga ebanghelyo sumala kan Lucas.

Nagsiring ha iya in tawo dida han kadam-an, “Magturutdo, sidnga gad an akon bugto pakigbahin ha akon han malon nga iginbilin han amon amay.” Binaton hi Jesus ha iya, “Hin-o in naghatag ha akon hin katungod hin paghukom o pagbahin han malon niyo nga duha?” Ngan nagpadayon hiya pagsiring ha ira ngatanan: “Pagbantay, ngan paglikay kamo han bisan ano nga kahalot; kay an matuod nga kinabuhi han tawo diri la aada han mga butang nga iya gintatag-iya, bisan magkadiano hin kariko niya.”

Niyan iginsumat ha ira ni Jesus ini nga pananglitan: “May usa ka tawo nga riko nga may-ada uma nga kinuha hin damo nga abot. Naghunahuna hiya, ‘Waray ko na dapit nga hihimosan han ngatanan nga akon mga abot. Ano ba an akon bubuhaton? Amo ini an akon bubuhaton,’ nagsiring hiya ha iya la ngahaw, ‘gugub-on ko an akon mga kamalig ngan magtitindog ako hin mga darudako, diin akon hihimoson an akon mga abot ngan an ngatanan nga akon mga hiagi. Katapos, masiring ako ha akon ngahaw: palaran ka nga tawo! Naangkon mo na an ngatanan nga mag-upay nga mga butang, nga imo kinahanglan para hin damo nga katuigan. Pahuway na, kaon, inom, ngan paglipay na la!’ Kundi nagsiring ha iya an Dyos, ‘Lurong ka! Kukuhaon na ha imo an imo kinabuhi hini gud nga gab-i; niyan, hin-o man in mag-aangkon hini ngatanan nga mga butang nga imo gintirok para ha imo kalugaringon?’” Ngan gintapos ni Jesus hin pagsiring, “Masusugad hini adton mga nagtitirok hin mga manggad para la ha ira kalugaringon, kundi diri mga riko ha atubangan han Dyos.”

An Ebanghelyo han Ginoo.