A. Introduction

Santigaman sa Santa Cruz etc.

• Act of Contrition

Diyos nga makagarahum, kaupayan nga waray sukol, malolooyon hin labi ngan hirigugmaon, ako an makasasala nga taramayon ug matalapason han imo santos nga batasan; nagbabasul ako han akon mga sayop, tungod lamang kay han ngatanan, an mga sala ko kontra ha imo. Nakasala ako Ginoo, pagperdonahan mo ako. Nagsasaad na ako ha bug-os nga kasingkasing ko hin pagbaya han akon mga sala ngatanan ug paglilikayan ko man an mga katigayunan nga hirani ug katahapan ha pagkasala, magpapaubos ako ha hukmanan ha kumpisalan, ug pagtutumanon ko man ha maupay nga buot an ngatanan nga igsugo ha akon han mga santos Padres kay mga liwan sa Diyos dinhi ha kalibutan. Hatagan mo ko hin grasya, basi pag-upayan ko an kabatasan ko; ngan basi ngan tungod han imo santos nga pagkasakit ug pagkamatay ha Krus hi-aguman ko an kahimayaan ha langit. Amen.

B. Mga Pag-Ampo ha Kada-Adlaw

1. SIYAPA KA ADLAW

O Iroy nga matuod ha Dios, hadi ha mga kalangitan, arayopan han mga magpakasasala, bitoon nga mapawa ha kaagahon, an kamasirak mo nga nakakalipay ha mga katamsihan hin paghuni, nga daw pag-awit ha Ginoo nga harangdon, nga nagpapasirang han adlaw nga nakakalamrag ha kalibutan, nakikimalooy kami ha Imo ha ubos nga mga pangamaya, nga panirakan mo an amon mga hunahuna ha Diosnon nga grasya, nga ikakarig-on han amon mga kasingkasing hin pagdayeg ug pagdayaw ha imo gihapon, ngan hin pagsingba ug paghigugma ha Imo, kay ginawas Ka ha Ginoo nga labaw nga makagarahum han sala nga oray ug han iba pa daman nga mga sala, ngan tungod hini nga orosahon nga kalooy ug paghigugma han Dios, panabangan mo inin Imo mga oripon nga nanlolohud ha Imo Santos nga atubangan ug nangangaro han Imo mahal nga bendisyon, agud magmakusog kami dinhi hinin tuna ug mahagawas kami ha mga karautan nga tikang han sala. Kalooyan Mo kami, Virgen Santa Maria, kay napasakop kami ha Imo gahum, ug tinutuyo man namon an diri na pakasala, itugot Mo man ha amon an mga kaupayan nga pinan-ngangaro namon ha Imo hini nga novena kun baga uyon ha Santos nga buot han Dios ug makakaupay man han amon kalag. Amen.

Mag-uruna:

Mangadi kita hin tulo nga Maghimaya ka Maria ug usa nga Himaya sa Amay ngan ihalad ta ha mahal nga Birhen agud kalooyan kita niya.

Maghimaya ka Maria… (3x)

Himaya sa Amay… (1x)

​

____________________________

2. IKADUHA KA ADLAW

Baraan nga gayud nga Virgen Maria, Iroy han kalooy, arayupan han mga magpakasasala nga nagbabasul han ira mga ginsaypan, kasirak nga mapawa han amon mga kasingkasing nga ginlalauman namon, tungod hadton ginmamahal nga mga grasya nga itinubyan sa Dios ha Imo han pinanamkon Imo gi-uuraye nga tiyan an Anak han Dios ha larang ug gahum han Espirito Santo, nakikimalooy ha Imo ha ubos nga mga pangamaya nga ipangaro Mo kami kan Jesus nga Imo Santos nga Ana khan Iya mahal nga grasya nga makabawi ha amon ha kabihag han sala ugh an kauripon han yawa. Ha inanak nga paghigugma nangangaro kami ha Imo santos nga bendisyon, basi diri na kami makasala na liwat, kay tinutuyo na namon an paghigugma sa Dios hin labi han ngatanan, ug tinotoohan man namon an mga mahal nga misteryo ha relihiyon nga santa nga itinutdo ni Jesucristo ha mga tawo ngatanan, ngan itugot Mo man ha amon an mga kaupayan nga pinanngangaro namon ha Imo hini nga novena kun baga oyun ha santos nga buot sa Dios ug makakalipay man ha amon mga kalag. Amen.

3. IKATULO KA ADLAW

Gisasantosi nga Virgen Maria, bisan hiniyasan Ka hin langitnon nga kaudganan nga magin Iroy han Dios, waray gud kaibani an kamapainobsanon Mo. Kay han pagpahibaro ha Imo han anghel nga magiging Iroy ka han Diyos, ginsumatan Ka liwat nga an Imo patud nga hi Santa Isabel in may unom na ka bulan nga burod. Ngan bisan Iroy kana han Dios, nga Hadi ha langit ug tuna, nagpaubos Ka la gihapon ha atubangan han Ginoo. Tikang ha Nazaret kinmadto ka ha kabukiran ha Judea hin pagbisita han Imo patud nga hi Santa Isabel, ngan han pagabot Mo ha iya balay, sinmaka Ka ngan naghatag hin katalahoran ha iya, ngan han pakabati la hini ni Santa Isabel nagkiwa an bata ha sulod han iya tiyan hin dako nga pagkalipay. Ug hadto ngahaw napuno ni Santa Isabel han Espiritu Santo ngan nagyakan hin dako nga tingog: “Ikaw an labi nga kabaraan han ngatanan nga kababayen-an, ngan baraan an bata nga gindadara nimo ha Imo tiyan! Kay ano nga itinugot man ini nga makanhi hin pagduaw ha akon an Iroy han akon Ginoo? Kay han pakabati ko han Imo mga pulong, linmukso hin kalipay an bata ha akon tiyan. Hin kabaraan niya nga natoo nga matutuman an ginpamolong ha iya han Ginoo.”

Sanglit, O Virgen nga hamili, nakikimalooy kami ha imo ha obus nga mga pangamaya nga paglaoyon Mo unta an amon mga kasingkasing, basi mahibaro kami magpa-ubos, kay an Ginoo namamati han pag-ampo han tawo nga mapainobsanon, ngan itugot mo man ha amon an mga kaupayan nga pinangangaro namon dinhi hini nga novena kun baga oyun ha santos nga buot han Dios ug makakaupay amon kalag. Amen.

4. IKAUPAT KA ADLAW

Gi-uurugi nga Virgen Maria, nga hiniyasan ka han Dios hin damo nga mga kaudganan, ug nasugot Ka gihapon ha Iya ha bug-os nga kasingkasing Mo, an Anak sa Dios nga pinanamkon ha Imo gi-uuraye nga tiyan ha bungto han Nazaret, natawo hiya didto ha bungto han Betlehem sugad han igintakna na nga daan, ngan an bando nga iginpabayabay han usa nga Emperador nagtigayon ha pagtuman hinin tagna, hi Cesar Augusto nagsugo nga magpalista para han sensos an ngatanan nga mga sakop han Imperyo. Sanglit kinmadto hin pagpalista an ngatanan, an kada usa ngadto han iya kalugaringon nga bungto.

Tikang ha bungto han Nazaret ha Galilea, kinmadto hi San Jose ha Judea, ngadto han bungto han Betlehem nga natawhan ni Hadi David, kay tulin man hiya ni David. Kinmadto hiya hin pagpalista upod an Virgen Maria nga sinayoran na ha iya, ngan hingarak na. Samtang  nakadto hira ha Betlehem, inmabot an panahon nga mag-aanak na hi Santa Maria. Nag-anak hiya han iya suhag nga lalake, ginputos niya hin mga lampin, ngan iginhulid ha pasungan, kay waray naman lugar para ha ira didto han balay nga pahuwayan.

O Virgen nga Iroy han Dios, nga naghatag ka ha amon hin maupay nga panundugan han pagkamasugot, nakikimalooy kami ha imo ha ubos nga mga pangamaya nga idangat Mo kami kan Jesus hin maupay ug marig-on nga buot ha pagsugot gihapon sa Dios ugh an mga punoan man, ngan mahigawas kami ha kapalabilabi nga patus han buot han Dios ug magapil kami han pagkamasugot, ngan itugot Mo man ha amon an mga kaupayan nga pinnanngangaro namon ha Imo hini nga novena kon baga oyun ha santos nga buot sa Dios ngan makakaupay man ha amon kalag. Amen.

5. IKALIMA KA ADLAW

Gimamahali nga Virgen Maria, Iroy nga matuod sa Dios, nga hinmatag ka ha amon hin matuod nga kalipayan, kay ha kaupat ka yukot ka tuig tikang gintuha han Dios an kalibutan, ha ikakapatan ka tuig ha pagka-emperador ni Octaviano Augusto han husay nga guilkup an pagkadaet ug kamurayao han bug-os nga kalibutan sugad han iguintakna nga daan, hi Jesucristo nga Dayon nga Diyos, ug Anak sa Diyos nga Dayon, han ayao na an siyam kabulan tikang pinanamkon Hiya ha Imo guiuuraye nga tiyan, nagpakatawo Hiya ha ikakaruhaan kaglima ka adlaw han bulan han Disyembre ha pagkakatunga han gab-I, ug hadton ngahaw nga oras han panumduman, nanganak Ka ha Imo Diosnon nga Anak, kay tungod nga waray Nimo inabat an kasakit ug kakurian nga inaabat han iba nga mga iroy, naglugaring ka hin pag-ataman han Imo hirigugmaon nga Anak, ug natuman Mo man an tungud han labi nga mahipuanguron ngan mahigugmaon nga iroy, kinugos Hiya ha Imo butkon ha dako nga kalipay han kasingkasing Mo, hinadkan han Imo uray nga im-im an iya Diosnon nga bayhon, guinlampinan Mo Hiya ug pinaso-an ha Imo mahal nga dughan, ngan Imo gatas an nakakabuhi ha kalibutan ha Iya pulong, ngan kay waray man nimo katre o duyan nga hirigdaan, aguinhulid Mo la Hiya ha usa nga balalong nga karan-an hin mga hayop, ug dida guinsingba Nimo, kay Anak Hiya sa Dios, ngan Imo inogayan, kay Anak man ha imo kasingkasing.

Sanglit, O mahigugmaon nga Iroy, nakikimalooy kami ha Imo ha obus nga mga pangamaya nga ipangaro Mo kami kan Jesus nga higugmaon Mo nga Ana khan matuod nga kalipay nga tikanghan maupay nga pagtuman han iya santos nga mga sugo, ngan itugot Mo man ha amon an mga kaupayan nga pinangangaro namon hini nga novena kun baga oyun ha santos nga buot sa Dios ug makakaupay man ha amon kalag. Amen.

6. IKAUNOM KA ADLAW

Guisasantosi nga Virgen Maria, nga Virgen ka guihapon, kay Virgen Ka han waray pa pag-anak, Virgen ha pag-anak, ug Virgen man han human na mag-anak. Virgen ka nga uray han waray ka pag-anak, kay imo isinaad sa Dios an Imo pagkavirgen nga bug-os hin marig-on kaupay nga saad, nga natuman Mo ha bug-os nga kasingkasing. Virgen ka ha pag-anak. Kay hi Jesucristo hinmatag ha Iya lawas han kaudganan nga mahimayaon hin kamatahun, ngan tungod hini iguinanak Mo Hiya hin waray gud kaano an pagkavirgen nimo, masugad han pagkaguwa Niya ha linobngan nga bato hin waray kahalin ug waray man kaboong an takop nga bato. Virgen ka man han tapos na mag-anak kay kahuman honongan han Anak sa Dios an Imo santos nga tiyan, diri na paglalabtan hin bisan hin-o, kay ikaw an natumanan hinin masunod nga tagna, inin sada diri abrihan, diri agi-an hin tawo, kay an Ginoo nga Dios ha Israel naaguri ha Iya.

Sanglit, O giuurayi nga Virgen Maria, nakikimalooy kami ha Imo ha ubos nga mga pangamaya nga idangat Mo kami kan Jesus han mahal nga virtud han pagkavirgen, pagkasantos ug pagkamahawan ha kalag, nga guintitinguha namon kun Imo kami bubuligan, ngan paglilikyan man namon tikang ha amon pagkabata an ngatanan nga mga buhat nga mahugaw nga patuk han pagkasantos ug pagkamahawan ha kalag ug ha lawas namon, nga itugot Mo man ha amon an mga kaupayan nga pinangangaro namon ha Imo hini nga novena kun baga oyun  ha santos nga buot ha Dios ug makakaupay man ha amon kalag. Amen.

​

​

7. IKA-PITO KA ADLAW

Bulahan nga gayud nga Virgen Maria, Iroy matuod sa Dios, tungog hadton dako nga kalipay nga inabat Nimo ha imo mahal nga kasingkasing han pagbisita han mga pastores kan Jesus nga Imo higugmaon nga Anak, nakikimalooy kami ha imo ha obus nga mga pangamaya nga pahayagan kunta an amon mga kasingkasing basi agsubon namon an paglaoy kan Jesus nga Manunubos dida han singbahan nga iya santos nga balay, kay aada nga gayud hiya ha guisasantosi nga Sacramento ha altar. Tabangan kunta kun masugad kami  hadton mga pastores nga mga tangkud ug magpainobsanon nga mga tawo, basi karawaton man han Ginoo an mga pag-ampo nga ihinahalad namon ha Iya, natoo kami Jesus nga Dios nga matood, nga tawo man nga matuod, naglalaum kami ha Iya han amon kalag, han amon kasingkasing, han amon kinabuhi ugh an amon mga buhat. Ipakimalooy Mo kami kan Jesus, malolooyon nga Iroy namon, pasayloon an amon mga sala, ngan igawas kami Niya han ngatanan nga mga karautan, kay tinutuyo gud namon an pagsingba ha Iya, an pagalagad ha Iya ug an pagtuman han mga iguinsusugo Niya ha amon, basi matakus kami kumarawat han Iya santos ug mahal nga bendisyon, ngan itugot Mo man ha amon an mga kaupayan nga pinangangaro namon ha Imo hini nga novena kun baga oyun ha santos nga buot sa Dios ug makakaupay man ha amon kalag. Amen.

8. IKAWALO KA ADLAW

Gimamahali nga Virgen Maria, Iroy nga matuod sa Dios, natahud kami ha imo ug nasingba kami kan Jesus nga imo higugmaon nga Anak, kay ginsingba man hiya hadton tolo nga kahadian nga igin-asoy han Santos nga Surat, kay kinita nira ha sinirangan an bitoon nga mapawa ug nagpakadto hira ha Jerusalem hin pagbiling han Hadi nga bag-o pala nga natawo, pag-abot nira ha mao nga bungto, natago an bitoon nga nagmamando ha ira, nanginginsayod hira kon hain ba an natawo nga Hadi han mga Hudiyo, binmaton man an mga magkinaadmanon ha Jerusalem nga ha bungto ha Bethlehem ha Juda. Ginmuwa hira han bungto ngan pakaguwa la nira, iiton na liwat an bitoon nga nagmamando ha ira, pag-abot la nira ha Bethlehem, inmukoy an bitoon yungod han kamalig nga inuukyan nira Maria Santissima, nagkasulod hira ug bisan dako nga kasungkuan an ira ginkukulawan, nakakilala hira, kay hinayagan man sa Dios, nga adton Bata nga gintakgong hin makalolooy nga panapton ug isinandig hin balalong, amo an Anak han Dios nga dayon. Nagkaluhod hira ha dako nga paghipausa ha iya santos nga atubangan ug naghalad man ha iya hin mga mahal nga mga halad, nga amo an bulawan, an mahamut nga insenso ngan mira.

Sanglit, O maloloy-on nga Virgen Maria, nakikimalooy kami ha imo ha ubos nga pangamaya nga ig-ampo mo kami kan Jesus nga Manunubos basi karawaton man niya an mga makalolooy nga mga halad nga ihinahalad namon ha iya tikang ha kasingkasing namon, agud matakus kami kumarawat han iya mahal nga grasya nga makakasantos ha amon, ngan itugot mo man ha amon an mga kaupayan nga pinangangaro namon ha imo hini nga novena kon baga uyon han santos nga buot sa Dios ug makakaupay man han amon kalag. Amen.

9. IKASIYAM KA ADLAW

Gipuputlii nga Virgen Maria, matuod nga Iroy sa Dios, nga natuman mo gihapon ha bug-os nga kasingkasing an mga sugo han Ginoo nga harangdon, ha pag-aram namon han maupay nga pagsugot, kay ha ika-kap-atan ka adlaw tikang han imo kahinglaw, pinmakadto ka ha Jerusalem ha pagtuman han nababatasan nga isinugo nga paghamis han iroy ug an paghalad han bata.

Matuod man gud nga waray ikaw katungdanan hin paglimpyo, kay ikaw man an pagka-uray ug pagka-putli, nga nanganak ka kan Jesus ug nadayon ka nga bug-os nga Virgen tikang ka nag-anak. Waray man kasurok-an nga ihahalad an gisasantosi mo nga Anak, kay nahalad na hiya ha iya Amay nga dayon tikang pinanamkon hiya. Kundi an Anak ug Iroy nagbuot nga magtuman hira hinin batasan ha pagtutdo ha aton han kaangayan nga pagtahud ug pagsugot ngan basi diri mausa an bungto ha Israel nga diri pa sayod nga hi Jesus ug hi Maria Santissima gawas hini nga sugo. An gisasantosi nga Virgen nagkukugos ha iya Diosnon nga bata, ug pag-abot la niya ha portahan han Singbahan hinmataghiya han sacerdote han iya halad nga mao in duha nga sarapati kon duha nga tokmo, sugad han sugo han balaud ni Moises, ngan tungod kay pobres an Virgen, waray ighahalad nga hayop nga kordero, kundi an iya higugmaon nga Anak.

Sanglit, O guimamahali nga Virgen Maria, nakikimalooy kami ha Imo ha ubos nga mga pangamaya nga hatagan Mo kami hin matadong nga kasingkasing ngan hin marig-on nga buot basi makatuman kami guihapon han mga sugo han Guinoo hin waray ano man baribad ngan makalikay kami han ngatanan nga mga pakasala, agud matakos kami kalooyan han Guinoo, ngan itugot Mo man ha amon an kaupayan nga pinangangaro namon ha Imo hini nga novena kun baga oyun ha santos nga buot sa Dios ug makakupay man ha amon kalag. Amen.

____________________________

D. PAG-AMPO HA IKINAADLAW NGA PAGNOVENA

Alayon pagkaluhod.

Gimamahali nga Virgen Maria, anak nga pinalangga han Dios Amay, Iroy nga matood han Dios Anak, Esposa nga higugmaon han Dios Espiritu Santo, Rayna han mga kaanghelesan, kalipayan han mga matinumanon, tambal nga mahamot han amon mga kasakitan, Iroy han kalooy, arayopan ug larauman namon, kalipay han mga magsurub-on, Rayna han mga kasantosan, ha bug-os nga katalahuran ug ungod nga kalipay han amon mga kasingkasing, natahud ug nagsisingba kami ha imo dida hiton makalolooy nga kamalig nga natawohan ni Jesus nga imo higugmaon nga Anak, kay waray kamo pahapita ha mga belenanon.

Pagdayegon ta an Santos nga pagkatawo han aton Ginoo: hi Jesukristo nga dayon nga Dios, Anak han Dios nga dayon, han katapos han siyam ka bulan tikang han pagpanamkonan ha iya, dida han giuurayi nga tiyan ni Maria Santissima, nagpakatawo hiya ha ikakaruhaan kaglima ka adlaw ha bulan han Disyembre, ha pagkatutnga han gab-i. Nagkalilipay an mga Kristyanos kay natawo na hi Jesus nga Manunubos. Ngadto kita ha Belen pagsingba han Diosnon nga bata, nga matatawo nga Hadi han Israel, nga ginsisingba han mga kaanghelesan ug han mga pastores.

Ha kabukiran ha Belen, pulong ni San Lukas, may mga pastores nga nagbabantay ha ira mga hayop ug nagaaligmata hira, ngan nagpakita ha ira hadto in usa nga anghel, ug dungan man hadto pinahayagan hira hin Diyosnon nga kalamragan, ngan nagkakahadlok hira nga gayud; kundi pinakraig-on hira han anghel ha pagsiring ha ira: “Ayaw kamo kahadlok, kay an akon pagkanhi pagpahibaro (diyo) ha iyo? hin bag-o nga bantug nga makalilipay ha bug-os nga bungto, kay pagkatawo pa la yana han iyo Manunubos, ha bungto ni David. Pagmatuod kamo ha akon ug an tigaman nga kikilalahon niyo ha iya amo ini: iyo kikitaon an bata nga gin takgonghin makalolooy nga panapton, nga nahigda ha balalong karan-an hin kahayopan. Katapos pamulong han anghel, mabunyog pa ha iya in kadam-an nga urupod nga ka-anghelisan nga nagdadyeg sa Diyos hin sugad hine: “Paghimaya sa Diyos ha kahitaasan ug kamurayawan ha tuna han mga tawo nga maupay an kaburut-on.” An mga pastores hin-ulian han ira panhiusa ug nagkayakan hin pagsiring: “pakadto la kita ha Belen, basi masayud kita hinin urosahon nga ipinahibaro yana ha aton.” Nandadlagan hira ngadto ug ira hinkit-an an gisasantosi nga Birhen Maria ngan hi San Jose ug an bata nga Diyosnon, nanluhod hira ug naningba han Diyosnon nga Bata ug ira man hinalaran han ira mga halad nga makalolooy tikang han pagtahud ug paghigugma han bug-os nira nga kasingkasing nga tangkud.

Tikangi ta hini nga paglaoy ha mga pastores, igin-asoy man hi San Lukas an masool nga pagturi han Diyosnon nga bata, kay bisan gawas hiya nga gayud hinin sugo nga makuri ngatungod lamang ha mga nakakasala, nabuot man hiya magtuman, kay manunubos hiya han makasasala, nagtikang na hiya pag-ula han birilhon nga dugo tikang ha iya pagka-bata kay iya man uugaron in pag-ula didto ha krus.

Ha ika-walo ka adlaw tikang natawo an Diyosnon nga bata, ginturi hiya ha pagtuman han sugo ha Batasan ni Moises, ug gin-ngaranan hiya nga Hesus, sugad han pulong han anghel han Birhen nga gisasantosi han waray paagpanamkuna ha iya an birilhon nga tiyan kay kuno an anghel tatagan ha hin anak nga imo pagngangaranan nga Hesus, nga manunubos an kahulugan. Ha ika-lima ka adlaw tikang han pagturi han bata nga Diyosnon, may tulo nga kahadian tikang ha sinirangan ngan gin mamanduan hin bituon, nagkadatong hira Jerusalem ug nanginginsayud kun hain ba an natawo nga Hadi ha mga Judeo? Kay amon kinita, nga nira, an iya bitoon nga mapawa didto ha sinirangan ug nakanhi kami hin pagsingba ha iya. Kinalasan ngan kinulbaan hi Herodes, ug layon pinapagtirok niya an mga puno-an nga mga sacerdote, an mga escriba, ug mga magturutdo han Batasan, ngan ginpakianhan hira niya, kun diin matatawo hi Kristo. Binmaton man hira nga sa Belen ha Juda: Hi Herodes nagpakiana ha hilit han tulo nga kahadian, kun kakan-o nira pagtan-awa an bitoon, ug nagtugon ha ira hin sugad hini: “Kadto kamo, ngalaong, iyo pamimilngon an Bata, ngan kuniyo hiagi-an, baliki ako niyo, kay kakadtoon ko ug sisingbahon ko man.”

Ginmikan an tulo nga kahadian, ngan pagkaguwa la nira ha Jerusalem, nagpakita na liwat ha ira an bitoon nga nagmando han ira pagbaktas kay natago han pagdatong nira ha Jerusalem. An pakakita nira liwat han bitoon, naglipay nga gayud hira ug ira susundon tub-tub nga naukoy iyungod han kamalig nga hinohongonan ha Diyosnon nga bata. Nahapit hira ha kamalig nga natawohan han Hadi han langit, ug ira kinita nga gintakgung hin makalolooy nga panapton ug nasanding han balalong, ngan waray niya iba nga kaurupdan labut la an masaho nga Iroy niya nga talahuron nga lalaki nga baga amay niya. An tulo nga kahadian pinahayagan ha Diyos, ug nakilala hira nga yadton bata amo an Anak han Diyos nga dayon. Nagkaluhod hira ha dako nga pagkabanicug ha atubangan niya ug naghalad ha iya hin mga mahal nga halad nga bulawan, insenso ngan hin mira; an bulawan kay Hadi Hiya; an insenso kay Diyos man Hiya; ug an Mira kay tawo man Hiya. Nalipay an ira mga kasingkasing han pakaagi han bata nga Diyos, ngan han human na an ira pagsingba ug paghalad, ngan han human na amn an labi nga baraan nga paglaoy nga gintuman han kahadian, naghuna-huna na hira hin pagbalik ha ira banwa, ug tihapit kunta hira ha Jerusalem, kundi gintugon hira han anghel nga diri hira magpakita kan Herodes, ngan lain nga dalan an gin-agi-an nira han pag-uli ngadto ha ira banwa.

Pag-odgon, pagtahuron ug pagsingbahon ta man an Diyosnon nga bata, kay gin-irog gintahud ug ginsingba man ni Santa Maria, ni San Jose, ha mga angheles, mga pastores ug mga hadi. Ihalad ta ha iya an aton kalag, an aton kasingkasing ug al lawas ta. Pasakop kita ha iya gahum ug kalooy. Pakitabang kita kan Santa Maria nga Iroy ni Jesus, basi katagan kita han mga kaupayan nga gintutuyo naton hini nga pagnovena kun baga uyon ha santos nga buot han Diyos ug makakaupay man ha aton kalag. Amen.

E. Pakimalooy kan San Jose

Marahalon nga Santos nga hi San Jose, esposo nga higugmaon ni Maria Santisima, nga tinubyanan ka han Diyos hin damo nga mga Kaudnganan; nakikimalooy kamo tikang ha ubos nga mga panagamaya na ipangaro mo kami kan Jesus nga Manonobus hin grasya ngan hin kalooy nga ikakapawa ug ikakarig-on ha amon mga kasingkasing han pagkilala ug pagsingba man ha iya nga Diyos nga matuod ug tawo man nga matuod. Panabangan mo kami, San Jose nga bendito, agud makatultol kami gihapon han dalan nga kaupayan nga igintutdo ni Jesukristo ha amon. Diri mo kami bayaan ha amon igkamatay basi diri kami pagdag-on han mga panulay. Panakopa kami gihapon han kamananabang mo agud matakus kami pagbalsan ha paghimaya ha langtit. Amen.

​

​

F. Pakimalooy kan San Joaquin ug kan Santa Ana

Mahimayaon nga mga santos nag hi San Joaquin ug hi Santa Ana, talahuron nga mga kag-anak ni Maria Santisima ug mga apoy ni Jesus nga manunubos, nakikimalooy kami ha iyo ha ubos nga mga pangamaya nga idangat kami niyo kan Jesus ug kan Maria Santisima hin dako nga grasya nga makapapas han amon katapang ug makasantos man ha amon, basi diri magapil ha kalibutan, diri kami mapadaog ha amon mga away ug diri na kami maliwat hin pakasala. Pamumuligan kami niyo, kay napasakop kami ha iyo gahum, basi mahigawas kami han mga karat-an ug matakus kami pagbalsan ni Jesus ha paghimaya ha langit. Amen.

(Niyan atubangon ta an Diyos hin madaliay ug hahilum makitabang kita kan Santa Maria nga Birhen agud oyonan niya an aton gintutuyo hinin novena.)

G. GOZOS HAN NUESTRA SEÑORA DE BELEN

Kadi, kadi mga puya

Ngadto kita ha Belen

Pagsingba han Bata

Hadi an Israel

Mahimaya an langit, malipayon an tuna

Natawo hi Cristo, matahum nga puya

Kadi, kadi mga puya, etc…

Bitoon nga ma-inggat, masuna, malamrag

Bitoon man hi Cristo, kapawa han kalag

Kadi, kadi mga puya, etc…

Anak nga Dayon, han Dayon nga Amay

Misteryo urogdon, singbahon ta anay

Kadi, kadi mga puya, etc…

Toohon ta ngani, pag-udgon, andakum

Ini nga Misteryo, han Makagarahum

Kadi, kadi mga puya, etc…

Waray gud baya-I, an pagka-Dios

Nagpakatawo, kay Iya pagbuot

Kadi, kadi mga puya, etc…

Pagtubos ha aton ha kabihagan

Kauripon han yawa, ugh an kasal-anan

Kadi, kadi mga puya, etc…

Iguin-anak han Virgen, an Diosnon nga Bata

Himaya nga dako, kalipay nga waray sama

Kadi, kadi mga puya, etc…

Nagdayao ha Iya an kaanghelisan

Guinsingba hiya han kapastoresan

Kadi, kadi mga puya, etc…

Bulawan, insyenso, sugad man an mira

Adton kahadian, naghalad ha iya

Kadi, kadi mga puya, etc…

An kasingkasing ihalad ta ha iya

Ug an aton kalag ihatag liwat ha iya

Kadi, kadi mga puya, etc…

Kay Hiya ang tag-iya, an Mangangako

An manunubos han mga tawo

Kadi, kadi mga puya, etc…

Pag-udgon, andakun, singbahon ta ngani

An pagkatawo ni Jesus Mamamawi

Kadi, kadi mga puya, etc…

Dayegon ta an Virgen, dayawon gihapon

Kay Iroy ni Kristo, bata nga matahum

Kadi, kadi mga puya, etc…

Hi Santa Maria, aton pag-andakon

Kay Iroy ni Jesus, ug iroy man naton

Kadi, kadi mga puya, etc…

Jesus manunubos, Jesus Mamamawi

Hi kami panakopon, ha paghimaya ha langit

KADI, KADI MGA PUYA

NGADTO KIT HA BELEN

 PAGSINGBA HAN BATA

HADI AN ISRAEL

V. Ig-ampo mo kami, Santos nga Iroy han Dios.

R. Basi kami matakus pagbalsan ha paghimaya ha langit.

H. Pag-ampo

Ginoo nga Diyos, nga nagpili ka han mahal nga Birhen Maria nga magin-iroy kan Jesus nga imo Gisasantosi nga anak, ha paghatag ha amon han mga kaupayan ha dayon nga kinabuhi, nag-aampo kami ha imo nga itugot mo, nga panabangan kami kunta niya, kay tungod ha iya natakus kami kumarawat han tag-iya han kinabuhi nga amo hi Jesucristo nga imo Santos nga Anak nga amon Ginoo. Amon.

​