Sa tigaman sa Santa Cruz...

I. ACTO DE CONTRICION

 Makagagahum, ug waray katapusan nga Dios, nga akon magburuhat, akon Mamamawi;  tungud han imo diri matukib nga kaupay, nahegugma ako ha imo ha bug-os nga kasingkasing ko, busa ha daku nga pagpaubos naluhod ako ha imo mahal nga atubangan. Dios ug Ginoo ko! Pasaylo-a ako han ngatanan nga mga sala nga akon gin buhat ha bug-os ko nga kinabuhi, ngan nagsasaad na ako ha diri na pagbalik: dungga Ginoo inin akon pinangangaro tungud han mga pahanungdan ni Maria Santisima, han putli ug uray nga pagpanamkon ha iya, calooyi inin ubos nga binuhat mo nga hatagan mo ako han gracia. Amen.

II. PAG-AMPO HAN NGATANAN NGA ADLAW

 O labi ka putli nga Birhen Maria, nga tikang han pagpanamkonan ha imo, da-an ka na ginpuno hin grasya. An imo kalag gindagkutan han gugma nga Diosnon, basi dayuday humigugma ka han Dios ug han mga kalag ngatanan. Nangangamoyo kami ha imo, iroy namon nga putli, nga dad-on mo kami ha imo hinigugma nga Anak nga amon gino-o, Jesucristo. Buligi kami pagkab-ot han mga grasya nga amon ginkikinahanglan, basi magkasunod kami han imo mapaso nga gugma ug buhi nga pagtinguha han kadungganan ug himaya han Dios, nga amo man an liwat an amon tinguha hini novena. AMEN.

III. PAG-AMPO HAN SYAHAN NGA ADLAW

 O Reyna nga langitnon, putli ka nga waray dum-it, ha lungib ha Massavielle ha Lourdes nagpakita ka hadton usa nga bata nga hi Bernadita. Hiya an imo ginpili basi amo in magbutyag ha imo dungog ug himaya. Ginsugo mo ini nga hamili nga babaye hin pagpahibaro han kapadi-an nga magtindog hin usa nga simbahan kay buot mo himoon an pagpakita han mga kamatuoran dinhi ha tuna. Patilawa kami, Mahal nga Senyora, han imo kalo-oy. Tan-awa an kahiladman han amon mga kasingkasing mga puno hin dako nga tinguha ha pagdangat ha imo han amon mga kinahanglan   ha kalag ug lawas. AMEN.

(Dinhi mamamalandong hin madali-ay, mangaro kita ha Mahal nga Birhen han tagsa-tagsa nga kinhanglan.)

O Maria nga iginpanamkon ka hin waray sala nga panurundon.

Ig-ampo mo kami nga nadangop ha imo.

Maghimaya ka Maria

Himaya sa Amay

IV. KATAPUSAN NGA PAG-AMPO

O labi ka putli nga Birhen Maria, Iroy sa Dios ug Iroy man namon, himo-a nga an amon panhuna-huna, mga buhat ug pangiwa, mahi-uyon han Santos nga mga sugo sa Dios, ug diri kami mahibulag han dayuday nga paghigugma, pagserbe, ug pag-alagad kan Jesukristo, ngan ha imo man, Birhen nga labi hin kauray. AMEN.

V. GOZOS HAN BIRHEN HAN LOURDEShan birhen han Lourdes

An panabang mo ha kalooy

Birhen namon nga iroy

//Gindadayeg ka han mga angeles

Mahamot nga Birhen ha Lourdes//

Ha lungib ha Massavielle

Inulpot ka ha usa nga babaye

Nga hi Bernadito an ngaran

Ha mga kaupayan imo ginsaaran.

//Gindadayeg ka…

Ginsugo mo ha mga kapadian

nga natindog in usa nga simbahan

ha amo ngahaw nga tuna

han inolpotan kan Bernardita.

//Gindadayeg ka…

Waray dayon tuora han padi nga kura

An mga pulong han babaye nga bata

Kay buot niya hikit-an

An dayag nga kamatuoran.

//Gindadayeg ka...

Ha waray langan ipinakita mo

An damo nga milagro

Inulpot burabod nga urusahon

Tambal kadam-an nga masakiton.

//Gindadayeg ka…

Hi Bernardita imo ginsayoran

Ha imo matam-is nga ngaran

Ako anPurisima Concepcion

Ginawas han sala nga panurundon.

//Gindadayeg ka…

An Lourdes an imo ginpili

Lugar nga ibinantug kahamili

Basi mo ipakita didto

An kadam-an nga milagro.

//Gindadayeg ka…

Waray mag-iha ginhimo

Usa nga matahum nga templo

ha dayuday ginhahalaran

Han kadam-an nga katawhan.

//Gindadayeg ka…

Kalooyan mo Berhin ha Lourdes

An amon pagdayeg ug pag-awit

Ha mga karat-an amo kami gawson

Hasta ha oras ha kamatayon.

//Gindadayeg ka…

An panabang mo ha kalooy

Birhen namon nga Iroy

Gindadayeg ka han mga angeles

Mahamot nag Birhen ha Lourdes.

//Gindadayeg ka…

​

​​

PAG-AMPO HA IKADUHA KA ADLAW

O Maria, Bulan ha kaputli nga Maanyag! Nalilipay kami upod ha imo kay mesterio han uray nga pagpanamkon amo an tinikangan han katalwasan han katawhan ug kalipay han bug-os nga kalibutan. Nagdadayeg kami ha imo, kay han imo pagpakita didto ha lungib ha Massavielle ha Lourdes, iginpahayag mo kan Bernardita Soubirous nga mag-ampo basi bumalik na sa Dios an mga makasasala. Kay amo ini an tuyo han imo pagpakita: an imo paninguha tungod han amon katalwasan.  Busa nangangamoyo kami ha imo nga hatagan mo kami han grasya nga himurulsan ha imo pagpakita. Itugot mo ha amon an mga kaupayan ha kalag ug lawas, nga amo an pinangangaro namon ha imo hini nga novena. AMEN.

PAG-AMPO HA IKATULO KA ADLAW

O Bitoon nga nalabaw ha kasirak han kaputli, uray nga Maria an kalipay namon naduyog ha imo, kay an misterio ha uray nga pagpanamkon ha imo an nakalipay han ngatanan nga mga Angel ha Paraiso. Nagpapasalamat kami han Santisima Trinidad nga ngarayandayan ha imo han mga grasya. Ginpili mo an bungto ha Lourdes basi arayupan han mga tawo ha pagpalandong han Mahal nga misterio han uray nga pagpanamkom ha imo. Ngan dida inginpakita an  tigaman han imo panabang ug kalooy, hadton tubig nga matin-aw nga nakaupay hinkadam-an nga mga irapa. Paangbiton mo kami han imo mga kalooy basi makahugas han amon mga kasal-anan, ngan isangpit mo kami han Ginoo, ha usa nga matuod nga paghinulsol nga amo an tinguha nam hinin Santos nga novena. AMEN.

​

PAG-AMPO HA IKAUPAT KA ADLAW

O Kapapaw-on nga mahayag putli nga maria, nga linmarag ka ha lungib ha Massavielle, ngan didto imo kami gin tutdu-an han misteryo han Purisima Concepcion nga pinahayagan mop adton hamili nga Benardita, nga amo an karuyag mo nga mamalik sa Dios an nmga makasasala, nga gin pahayagan mo liwat nga mag-antos hini nga kinabuhi, basi mahi-agum unina didto han mga kalipay ha langit. Nag-ampo ako ha imo nga imo ako tutduan ha paghuput  han kinabuhi nga uray, ngan masulsog ko an dalan ha mga pag-antos ha pagsunod sa Dios ngan ha imo man nga amo an akon gintitinguha hini nga novena. Amen.

​PAG-AMPO HA IKALIMA KA ADLAW

O kahayag nga Diosnon ug susgaranan han kauray, putli nga waray tanding nga Birhen Maria, ikaw nga ha katapos na igpanamkon nga waray sala nga panurundon, kinilala mo an imo magburuhat kay waray ka i-api han maldisyon han ngatanan nga mga anak ni Adan. Han ikaupat na katuig han pagpasabot ni Santo Papa Pio IX ha bug-os nga kalibutan nga ginpanamkon ka nga waray hidarahigi han sala nga panurundun, nagpakita ka nga uray ug putli ha lungib han Massavielle ha bungto han Lourdes nga sakop han Francia, basi maghi-usa an pagtoo hinin mahal nga misterio, Didto iginbilin mo in tigaman nga pag mamatuoran han ngatanan: usa nga burabod nga nag-uulbo an iya nga matin-aw nga tubig nga nakakatambal han mga sakit han mga tawo. Paso-a an amon mga kasing-kasing basi maglaga hin buhi nga pagtoo ha imo. AMEN.

​

PAG-AMPO HA IKAUNOM KA ADLAW

O Diosnon nga Maria, harangdon nga Senyora, ikaw an amon kalipay dinhi ha kalibutan. Ikaw an tun-og nga langitnon nga nakatam-is ha amon  mga kapaitan. Ikaw an magmarando ha dalan nga amon paglalaktan, an kusug ha amon kaluya, an arayupan ha amon mga kakapoy, ug an balsamo nga nakakatambal ha amon mga kasamdan. Gintawag mo an katawhan ngadto ha Lourdes basi igkita hin mga kaupayan. Katigayunan nga iginpuno ma ha ira han imo grasya ka kalooy. Malooyon nga Senyora, tuguti kami hin pagdayeg ha imo. AMEN.

PAG-AMPO HA IKAPITO KA ADLAW

O Birhen nga gisasantosi, labaw ka ha kasantos han mga santos natanan, makagagahom ug magtiripig han mga grasya nga hugas han amon mga sala. O Iroy nga maluluoyon, hin-o in diri mahigugma ha imo? Ikaw an kahayag ug amon pag laum.  Itinutubyan namon ha imo an amon kalag ug lawas basi imo hugasan han han matin-aw nga tubig han grasya, sugad han tubig ha Massavielle diin an mga masakiton nga nakadto pagkarigo nakadangat han kaupayan ha lawas. Itugot mo man unta nga amon pagdayeg ha imo yana, magmalimpyo an amon kalag ug lawas.  AMEN.

​

PAG-AMPO HA IKAWALO KA ADLAW

O Emperatriz ha kalangitan, harangdon nga Reyna, Esposa ug Iroy ha kahitas-a, kalipay namon duyog ha imo, O Maria, kay an Dios nga makagarahum nalipay ha pagpahitaas han imo bantug ha langit ug ha tuna. Ikaw an himaya ha Israel, ikaw an kalipay ha amon bungto, ikaw an amon kadungganan. Kapti an amon mga butkon, ngan dad-a kami ha atubangan han imo hinigugma nga anak,basi makatuman kami han amon katungdanan nga makadangat han maupay nga kamatayon nga amo an amon gintitinguha hini nga novena. AMEN.

PAG-AMPO HA IKASIYAM KAADLAW

O putli nga Birhen, harangdon nga magmarando ha dalan nga amon ginlalaktan, iini kami naluhod ha ilarum han imo kalooy. Itinutubyan namon ha imo an amon kalag ug lawas, basi ikaw an manalipod ngan amon sarigan. Itinutubyan namon ha imo mga kamot an amon mga paglaum, an amon mga kalipay, an ngatanan namon nga kasakit, ngan sugad man, inin halipot namon nga kinabuhi nga nahibibilin pa ha amon. Tungud han imo labaw nga pagka-uray ug pagpanamkon, niyan ha oras han amon kamatayon, an bug-os namon nga kinabuhi mahi-angay unta ha imo ug kan Jesus nga Anak mo, nga amon gintitinguha hini nga novena. AMEN.