I. PAG-AMPO HA IKINAADLAW
O Señor Santo Niño, hi ikaw gud la an amon Hadi ug Dyos Nagdadayaw kami ha imo, kay ikaw an amon Magtaralwas. Nadangop kami yana ha imo. Hi ikaw an amon Patrono dinhi ha amon parokya. Nadaraon kami ha imo. Nagbuhat ka hin mga urusahon nga butang pinaagi han imo santos nga ladawan. Hinumdumi kami. Tamdi inin imo ubos nga mga surugoon nga nadangop ha imo pangaro hin tambulig. Pag-unhi kami pinaagi han imo kinaadman. Tuhaya an amon kinabuhi pinaagi han imo kamatuoran. Lipaya kami pinaagi han imo kama-aghopon. Panalipdi kami pinaagi han imo kusog.
Aanhi kami yana naghahalad han amon hunahuna. An amon mga pulong, ma-ikaw la unta an luwason. An amon mga pagsakit maihalad unta namon tungod gudla ha imo. Nanginginyupo kami ha imo, Señor Santo Niño, nga lamragan mo an amon hunahuna, palagaha an amon kaburut-on, linisi an amon lawasnon nga kinabuhi, santosa an amon kalag. Igbuot nga an amo paghingyapon amo gud la an imo ginhihingyap para han tagsa ha amon.
Nangangamuyo kami, Señor Santo Niño, nga paabaton nimo kami han imo naglalaga nga gugma basi humigugrna kami ha imo, nga magin tangkod kami hin pagtuhay han amon kalugaringon; nga magin mainugupon kami han amon igkasitawo; ngan mahibaro kami hin pagsalikway han mga tunan-on nga mga butang. Buligi kami hin pag-ato han lawasnon nga karuyagon pinaagi hin pagdisiplina han amon kalugaringon, pag-ato han amon kahakog pinaagi hin pagin mahinatagon, pag-ato han amon kangalas pinaagi hin pagin malumo, han amon kahubya pinaagi hin pagin maduroto ha trabaho. Hatagi kami hin igo nga hibaro dida han amon paghatag hin sagdon, hin igo nga kusog ha atubangan han peligro, hin pasensya ha panahon han pag-antos, ngan hin pagpaubos ha panahon hin kahuraan.
Tutdo-i kami, hinigugma nga Señor Santo Niño, nga waray pulos han kalibutan kon itatanding han himaya han langit, ngan hin kahalipot han panahon dinhi ha tuna kon ikukumpara han kadayunan didto ha langit. Ha katapusan, itugot gad, Señor Santo Niño, nga dayuday ka namon hinumduman, nga dayuday ka namon pagsingbahon, higugmaon, ngan, ngan pagserbihan, basi mahingpit an amon kalipay kaupod nimo didto ha langit ha kadayunan. Amen
II. IKINAADLAW NGA PAG-AMPO
SYAHAN NGA ADLAW
O harangdon nga Jesus, tungod han imo pagbuot ug kinaadman, nagpadara ka hin mga misyonaryo nganhi ha amon basi magpasangyaw han Maupay nga Sumat han amon katalwasan, syahan, ngadto han amon kaapoy-apoyan basi ira hibaruan ngan karawaton inin Katoliko nga Toloohan. Ha dako nga pagpaubos nangangamuyo kami ha imo nga hatagan nimo kami hin dugang pa nga buhi nga pagtoo, basi ha dayuday makalipay kami ha imo ha pulong ug buhat. Ini amon pinangangaro ha imo nga buhi ug naghahadi upod han Amay ug han Espiritu Santo, usa nga Dyos ha dayon nga mga katuigan. Amen.
IKADUHA KA ADLAW
O mahigugmaon nga Jesus, nga nagpahayag ka han imo dako nga paghigugma ha amon pinaagi ha imo kamatayon ha Krus tungod ha amon, ug pinaagi han paghalad nimo han Imo kalugaringon dida han Santos nga Misa.
Nangangamuyo kami ha imo nga dayuday nimo kami paangbiton han imo nagdidilaab nga gugma basi mahibaro kami hin paghigugma ha imo ha bug-os namon nga kasing-kasing, ha bug-os namon nga kusog ug kalag, ngan basi humigugma kami han amon igkasitawo sugad han amon paghigugma han amon kalugaringon. Ini amon pinangangaro ha imo nga buhi ug naghahadi upod han Amay ug han Espiritu Santo, usa nga Dyos ha dayon nga mga katuigan. Amen.
IKATULO NGA ADLAW
O Ginoo Jesus, nga nagsering ka, “Kadi kamo ngan pagtuon ha akon kay malumo ug mapa-inubsanon ako ha kasing-kasing.” Igbuot nga maangkon namon an mga virtud hin pagkamalumo ug kamapainubsanon basi tumubo kami dida ha amon espirituhanon nga kinabuhi ngan basi kitaon han amon igkasitawo an imo harangdon nga imahen didi ha amon. Ini amon pinangangaro ha imo nga buhi ug naghahadi upod han Amay ug han Espiritu Santo, usa nga Dyos ha dayon nga mga katuigan. Amen.
IKA-UPAT NGA ADLAW
O maloloy-on nga Jesus, Imo ginpasaylo adton nagraysang ha Imo ha krus. Nangangamuyo kami ha imo nga hatagan mo kami hin mapinasayloon nga kasingkasing basi amon mapasaylo adton hin-o man nga makakasala ha amon ha pulong ug buhat. Ini amon pinangangaro ha imo nga buhi ug naghahadi upod han Amay ug han Espiritu Santo, usa nga Dyos ha dayon nga mga katuigan. Amen.
IKALIMA NGA ADLAW
O maloloy-on nga Jesus, nga nagsering ka nga may durudako nga pagrayhak didto ha langit kon may usa nga makasasala in magbasol, kontra hin napulo-kagsiyam nga diri nanginginahanglan hin pagbasol. Nangangamuyo kami ha imo nga hatagan nimo kami han grasya han pagbasol basi pagbasulan namon an amon mga sala ngan mag-ukoy kami hin kinabuhi para gud la ha imo. Ini amon pinangangaro ha imo nga buhi ug naghahadi upod han Amay ug han Espiritu Santo, usa nga Dyos ha dayon nga mga katuigan. Amen.
IKA-UNOM NGA ADLAW
O mahigugmaon nga gayud nga Jesus, iginhatag nimo ha amon in susgaranan hin pag-ukoy hin malinis nga kinabuhi dida han imo pag-ukoy han Imo kinabuhi dinhe ha tuna. Nangangamuyo kami ha Imo nga hatagan nimo kami hin sugad nga virtud hin pag-ukoy hin malinis nga kinabuhi dida han amon pag-ukoy han amon ginpili nga klase nga kinabuhi subay han Imo kaburut-on ha amon. Ini amon pinangangaro ha imo nga buhi ug naghahadi upod han Amay ug han Espiritu Santo, usa nga Dyos ha dayon nga mga katuigan. Amen.
IKAPITO KA ADLAW
O maloloy-on nga Jesus, nagin masinugtanon ka han langitnon nga Amay tubtob ha kamatayon. Nangangamuyo kami ha imo nga hatagan Nimo kami han grasya nga makakapahimo ha amon nga mainlagdon han tawag han Espiritu Santo basi dayuday maghimaya ha imo nga buhi ug naghahadi upod han Amay ug han Espiritu Santo, usa nga Dyos ha dayon nga mga katuigan. Amen.
IKAWALO NGA ADLAW
O maloloy-on nga Jesus, Imo ginbuksan an ganghaan han langit tungod ha amon pinaagi han Imo kamatayon ug pagkabanhaw. Nangangamuyo kami ha Imo nga hatagan Nimo kami han kinabuhi nga Dayon kahuman namon pagsusog han Imo dalan dinhi ha tuna. Ini amon pinangangaro ha Imo nga buhi ug naghahadi upod han Amay ug han Espiritu Santo, usa nga Dyos ha dayon nga mga katuigan. Amen.
IKASIYAM NGA ADLAW
O maloloy-on nga Jesus, nagsering ka: “Hi ako an dalan, an kamatuoran, ug an kinabuhi.” Nangangamuyo kami ha Imo nga pag-unhan nimo kami dida han dalan tipakadto ha langit, basi higawas kami han ano man nga kakurian o maka-urulang nga amon aagian dinhi hinin malimbong nga kalibutan. Hatagi liwat kami hin igo nga paglaum, basi dayuday mag-ungara kami han langitnon nga mga butang ngan han imo himaya. Ini amon pinangangaro ha Imo nga buhi ug naghahadi upod han Amay ug han Espiritu Santo, usa nga Dyos ha dayon nga mga katuigan. Amen.
III. LETANIA KAN SEÑOR SANTO NIÑO
· Ginoo, kalooyi kami
· Kristo, kalooyi kami
· Ginoo, kalooyi kami
· Hesus, pamatia kami
· Hesus, dungga kami
· Nga mahibaro kami pagdangop ha Imo dida han amon pagkinahanglan
Baton: SEÑOR SANTO NIÑO, TABANGI KAMI.
· Dida han amon pagruhaduha, kagupong ug mga pagsulay
· Ha panahon han pagkabido, pagkabutlaw, ngan mga pagpruybya
· Ha panahon han kapakyasan ug kawaray paglaum.
· Dida han amon kabaraka ngan kasamok.
· Ha takna nga an imo gud la grasya an amon puydi kasarigan.
· Ha takna nga hi ikaw gud la an amon darangpan.
· Ha takna nga an amon kasingkasing puno hin kasubo tungod han kapakyasan.
· Ha takna nga nag-aantos kami hin kasakitan ngan waray namon nahihimo
· Ha takna nga nauubos an amon pasensya ug an krus nahihimo nga makauruIang
· Ha ngatanan nga panahon nga hi kami nahuhulog hin pakasala.
· Kodero sa Dyos nga nagkukuha ka han mga sala han kalibutan,
TALWASA KAMI, GINOO
· Kodero sa Dyos nga nagkukuha ka han mga sala han kalibutan,
DUNGGA KAMI, GINOO.
· Kodero sa Dyos nga nagkukuha ka han mga sala han kalibutan,
KALOOYI KAMI
IV. KATAPUSAN NGA PAG-AMPO
O Señor Santo Niño, nayukbo kami ha imo atubangan. Tamdi an amon nagugupong nga kasingkasing. Pamati-an unta han imo maaghupon nga kasingkasing an amon mga pag-ampo, basi matagamtaman namon an mga grasya nga amon gin-uungara. Kuhaa didi ha amon an ano man nga diri namon maiilob nga arantuson ug kawaray paglaum. Tungod han imo kahimo nga usa nga bata, maka-angbit unta kami han kalipay ug kamurayaw, basi magdayaw kami ha imo, upod han Dyos Amay ug han Espiriru Santo nga nabubuhi ha dayon nga mga katuigan. Amen.
V. GOZOS KAN SEÑOR SANTO NIÑO
Matahum nga bata, Jesus harangdon,
hi kami lingi-a sakupa gihapon.
Gintuha han Dyos an tawo ha tuna,
hinmatag ha iya hin sugo nga usa.
Nakasala an tawo, waray pagtumana,
an sugo nga Diyosnon nga usa lamang.
An iya hin sal-an an Dyos harangdon,
waray pa ipakabayad kairo tawo kon di kalooyan.
Natalapas han tawo an sugo nga Dyosnon,
kundi sinaaran hin Manunubos.
Asay makabayad han aton sala,
kay mangangako han makasasala.
Inaawilan daw han katawohan,
kinahihidlawan han Santa Iglesya.
Palaran nga adlaw an ikinanhi,
ha kalibutan hini mamamawi.
Nasingba ako nahatud hinin mangangako,
ug han liwan Mo, an Santo Papa.
Ay Santo Niño, hi ako tabangan,
kay daw ako bata nga diri na malaris.
Malara an sala, makahihilo,
han kalag han tawo nga malaris dimo.
Mahal an grasya, hiyas han kalag,
totoo nga tigaman hin kapalaran.
Igtutdo mo dakon an kamasugot,
an kamaupay, an pagpaubos.
An akon kalag ug hunahuna,
nadayaw ha imo natunaw hin gugma.
Natawo an Dyos han hadi nga bata,
nalipay an langit ug an kanaypan.
Ha pagkatawo han hadi nga bata,
nalipay an langit ug an kanaypan.
Nagkakahadlok an mga malaris,
hinin Sto. Niño dida ha Santisimo.
Iglikay ta an sala, an buhat maraot,
kay larang han yawa, malimbong han tawo.
Aalagdon ta an Dyos ngan hihigugmaon,
kay hiya an tag-ada, aton man hukom.
An Dyosnon nga bata tatahuron naton,
ulo han kristiyanos pagdadayawon.
Kalooyan mo inin bungto
kay an gugma ihalad namon dimo.
An kasingkasing nalaga hin gugma,
nalaum na, Jesus ngan sakramento.
___________________________________________
Ini nga Novena ni Sr. Sto. Niño amo an novena nga ginagamit ha Parokyo ni Sr. Sto. Niño, Lawaan, Eastern Samar
Kun may-ada mga sayop dida hini nga novena alayon pag-email: pagampokita@gmail.com