PAGHALAD

​

O Ginoo Jesukristo, upod hin mahinulsulon nga kasingkasing, bubuhaton namon ini nga Via Crucis basi manumdum ug mamalandong kami han mga kasakit nga imo gin-antos tungod han gugma Mo ha amon.

An imo mga pagsakit, pagkamatay ug pagkabanhaw amo an paglaum ug katalwasa. Pinaagi hini nga Via Crucis makarawat unta namon an hingpit nga pagsantop han gugma nga nagdara han imo pagkamatay ha krus para ha amon.

O Baraan nga Manunubos, nagsaad Ka nga kon babayawon Ka tikang ha tuna, kakabigon Mo an ngatanan nga mga kasingkasing ha Imo, kabiga an amon mga kasingkasing ha Imo, kabiga an amon mga kasingkasing yana, basi mabuhi ug mamatay kami tungod han gugma namon ha Imo. Ikaw nga nag-antos ug nagpakamatay tungod han gugma Mo ha amon.

​

AN SYAHAN NGA ESTASYON

"An Katapusan nga Panihapon"

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

Pamalandong

Ha pag-abot han iya oras, linmingkod hi Jesus Hin pakigsaro ha iya napulo kagduha nga mga apostoles. Nagsering hiya: "Karuyag ko gud hin pakigsaro ha iyo hini nga Paglabay nga Panihapon san-o mag-antos". (Lk 22:15) Dida ha Katapusan nga Panihapon, pinaagi han pagpinitpinit han tinapay ug pagpaangbit han bino, ginpahayag ni Jesus an kahulogan han iya tiarabot nga kamatayon. An tinapay nga iya ginpinitpinit amo an iya lawas nga ighahatag para han ngatanan, ug an kupa nga iya ginpaangbit amo an iya Dugo nga gin-ula para han kadam-an. Nagserin hiya, "Buhata ini niyo nga hinumduman ha akon" (Lk 22:19).

Pag-ampo

O mahigugmaon nga Jesus, kadako ug kapuno han katingalahan han imo gugma. Tungod han gugma mo ha akon, ginpili mo an pag-antus ug pagkamatay basi ako mabuhi. Tungod han gugma ha akon, magpabilin Ka dida ha Eukaristiya basi mahimo nga akon Kaupod ug kusog dida han akon kinabuhi. Dida ha celebrasyon han kada Eukaristiya, ihalad ko unta an akon kalugaringon ha Imo, ikaw nga naghalad han imo kalugaringon para ha akon. Tutdo-i ako, Ginoo, hin pagsunod han imo susgaranan, nga maghimusa ako han tiil han akon igkasitawo upod hin malimpiyo nga tubig han gugma.

P: O Ginoo Jesukristo, ginraysang ha krus

B: Kalooyi kami!

​

Amay namon…

Maghimaya ka Maria…

Himaya sa Amay…

 AN IKADUHA NGA ESTASYON

"An Pag-ampo ni Jesus didto ha Getsemani"

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

Pamalandong

Nagkanta hira hin usa nga imno ngan kinadto ha tanaman han Getsemani. Didto nag-ampo hi Jesus. Mabug-at an iya kasing-kasing! Ha dako nga kasakit ug kaguol, nag-ampo gud hi Jesus ngan an iya balhas sugad na hin dugo nga naturo ha tuna. "Amay ko, kon imo pagbuot, kuhaa gad ini nga kupa ha akon. Diri an akon, kundi an imo pagbuot an matuman" (Lk 2242). Binalik hiya ngadto han iya mga tinun-an, ngan iya hira hin-agian nga nangangaturog na. Pero hiya, may-ada na kalinaw ha kasingkasing, kay sininugot hiya hin usa nga gugma nga diri na gud mabaya ha Iya, bisan ha butnga han iya kasakit.

Pag-ampo

Makuri gud pagkarawat an diri naton nasasantop dida han aton kinabuhi, sakit, kamatayon o mga problema ha kinabuhi – kamakuri hini! O Ginoo Jesus, an pagtubyan mo han imo kalugaringon ha mga kamut han Dios nga Amay didto ha Getsemani, nagpapahayag han imo dako nga pagsarig sa Dios Amay, an imo diri mabantad nga pagsarig han Iya gugma. An imo pag-ampo didto ha Getsemani maghatag unta ha akon hin kusog dida han akon mga problema ug kakurian ha kinabuhi. Himoa an imo pag-ampo didto ha Getsemani nga akon kusog, akon paglaum ha dayuday. Dida ha pagkarawat ko han kanan Dios gugma para ha akon, mahibaroan ko unta an pagbiling ug pagsunod pirme han imo pagbuot.

​

P: O Ginoo Jesukristo, ginraysang ha krus

B: Kalooye kami!

Amay namon…

Maghimaya ka Maria…

Himaya sa Amay…

​

AN IKATULO NGA ESTASYON

"Gindara hi Jesus ngadto kan Pilato"

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

Pamalandong

Hi Jesus natindog ha atubangan ni Pilato, ginapos sugad hin usa nga kriminal. Hi Pilato, nga karuyag buhian hi Jesus, nagpakiana ha mga tawo, "Ano nga sala an iya nabuhat?" Kundi nagtikadugang la lugod an ira paggoliat: "Igraysang ha krus." Nagdoda hi Pilato, pero ha katapusan, nagdaug an gahum han ira pangguliat. Nagsakit an matadong nga tawo para han mga salaan.

Pag-ampo

Ginoo Jesukristo, waray ka magbuhat hin sala, waray ka magyakan hin maraut; pero ginhukman ka han kamatayon ha krus. Ikaw, an tuburan han ngatanan nga kinabuhi, ginhukman hin kamatayon para ha akon! Buligi ako hin paglikay ha paghukom ug panhimaraot han iba. Abrehi an akon kasing-kasing ug huna-huna, ha pagkarawat nga mapasalamaton, han kinabuhi han grasya nga imo ginpadangat ha akon. Makatunan ako unta tikang ha Imo an pag-ukoy han akon pagtoo ug han imo Ebanghelyo ha atubangan han ngatanan nga mga tawo ug han ngatanan nga lugar. Diri unta ako mag-alang tungod hin kahadlok o kaawod pagpakita han akon pagtoo; kundi tumubo unta ako ha dayuday ngada hin mas mahingpit pa nga kinabuhi dida ha Imo.

​

P: O Ginoo Jesukristo, ginraysang ha krus

B: Kalooye kami!

Amay namon…

Maghimaya ka Maria…

Himaya sa Amay…

AN IKAUPAT NGA ESTASYON

"Hi Jesus ginhampakan ug ginpudongpudongan hin tunok"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Katapus han pagsiroti kan Jesus hin kamatayon, ginpalatob hiya ni Pilato. Ngan samtang ginaandam nira an mga butang para han pagraysang ha krus, gindara hi Jesus han mga sundalo ngadto ha bungsaran han palasyo. Didto ginhubo-an hiya han iya panapton ngan ginsul-otan hiya hin hilawig nga pula nga hado. Naghimo hira hin tunokan nga korona ug iginbutang ha iya ulo. Nagluhod-luhod hira ha atubangan niya ngan nag-ooyan-oyan hira ha iya. Ha pagkatinuod, "Natambal kita pinaagi han kastigo nga iya ginantus; nag-upay kita pinaagi han mga hampak nga iya kinarawat." (Is 53:5)

​

Pag-ampo

Piimagi han paghampak nga imo gin-antus, Ginoo, tungod ha akon, mahibaroan ko unta nga diri ako magmaraut ha iba pinaagi han akon mga pulong o buhat. Tagi ako hin kusog, ha paglikay han mga sala kontra han kaputli ug kasadangan. Talwasa ako tikang han akon kamapahitas-on, han akon karuyag hin paghadihadi. Ha pagkatinuod, ginbuhat han mga sundalo an paghampak ha imo diri tungod han ira pagdumot, kundi tungod kay ginsunod nira an sugo ha ira. Ayaw itugot nga basulon ko an iba tungod han akon kalugaringon nga mga sala, kundi tutdoi ako hin pagkarawat han responsibilidad para han akon kristohanon nga kinabuhi.

​

P: O Ginoo Jesukristo, ginraysang ha krus

B: Kalooye kami!

Amay namon…

Maghimaya ka Maria…

Himaya sa Amay…

​

AN IKALIMA NGA ESTASYON

"An Pagpas-an han krus"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Gingawas nira an krus. Ginkarawat ni Jesus an krus tungod han iya mapaso nga gugma para ha aton. Gin-ilob niya an pag-antus nga aton unta arantoson, an kasakit nga kita unta an magdadara. Ginkuha Hiya han mga sundalo nga Romano ngan ginbutang hiya ha butnga nira. Ngan ha hinay-hinay nagtikang hi Jesus han iya paglakat pinaagi han halipot ngan batoon nga dalan tikadto ha kalbaryo. Waray niya kaligdong o katahum nga makaaghat ha aton hin pagtan-aw ha iya. Waray gud ano man nga makakakabig ha aton ngada ha iya.

​

Pag-ampo

O mainantuson nga Manunubos, kinarawat Mo an krus ha imo kalugaringon nga kaburot-on. Ikaw an nagdara han akon pinas-an nga mga sala ug kaluyahon. Diri ako mahihimo nga matuod mo nga sumurunod kon dumiri ako hin pagpas-an han akon krus: an krus han akon adlaw-adlaw nga mga buruhaton ug responsibilidad; an krus ha pagsaksi ha Imo pinaagi han akon Kristohanon nga kinabuhi; an krus han akon pagkamatinumanon ha imo. Tutdoi ako nga an krus amo an magpakilala ha akon nga imo ako sumurunod, ngan bilngon ko pirme an imo kaburut-on diri la an akon karuyagon.

​

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

​

AN IKAUNOM NGA ESTASYON

"An Paghiparakup ni Jesus"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Han ira pagtikadto ha Kalbaryo mahinay na an paglakat ni Jesus ug ha tigda natumba Hiya ha tuna. An iya maluya nga lawas ngan an iya makusog nga tinguha nga magpadayon, naperdi han kabug-at han aton mga sala ngan nalinop Hiya ha ilarum han krus. Nagtinguha hiya pamiling hin kalooy ug pagpaid, pero waray hiya pakatara. Pero waray gihapon mawara an iya tinguha hin pagpadayon. Waray pagpapas an iya gugma ha aton. Kay an iya gugma ha aton, darodako kontra han kabug-at han aton mga sala. Naghinayhinay hi Jesus pagbuhat ngan nagpadayon paglakat ngadto ha kalbaryo.

​

Pag-ampo

Tikang han imo paghiparakup ha tuna, O Jesus ko, nahibaroan ko an kamaraut han sala ug an kinahanglanon ha  waray-undang nga pagbasul ug pagbag-o dida han akon kinabuhi. Pasabta ako han akon kalugaringon nga mga kaluyahon ug mga kasaypanan. Ayaw itugot nga magmatig-a an akon kasingkasing tungod han sala, kundi buligi ako nga ha dayuday makabangon ako tikang han akon mga sala ngan mag-ukoy pirme upod ha Imo. Ikaw, Ginoo, amo unta an akon kusog ug paglaum!

​

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

​

AN IKAPITO NGA ESTASYON

"Ginbuligan hi Jesus ni Simon Cyreneo"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Linmuya hi Jesus pinaagi han makaharadlok nga paghampaki ngan han pagpudong-pudongi ha iya hin mga tunok. An mga Sundalo nga Romano nahadlok nga bangin mamatay hi Jesus dida ha agi-an. Liningi hira ha mga tawo ngan ginkaptan hi Simon nga taga-Cyreneo. Ginpirit hiya pagpapas-an han krus ni Jesus. Dako an pagpasalamat ni Jesus hini nga pagbulig nga tikang han iya igkasitawo.

Pag-ampo

Makadamo na ako makakita ng nagkinahanglan ka hin bulig, Ginoo, pero waray ako bumulig. Nahinumdom ako han imo mga pulong, "kada pagbuhat niyo hini para han usa han giuubosi hini nga akon kabugtoan, ginbuhat niyo ini para ha akon" (Mt 25: 40). Tutdo-i ako paghigugma ha imo, Ginoo, pinaagi han paghigugma ko han akon igkasitawo: pinaagi   han paghigugma ko han kapikas han akon kinabuhi, han bugto ko, han sangkay ko, han kaupod ha trabaho – mga tawo nga ikaw an nagpakada ha akon ligid. Diri unta ako magraug-daug han akon igkasitawo o pagdiwara han ira mga katungod. Himoa ako nga imo suruguon basi maipakita an imo kalooy ug gugma.

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

​

AN IKAWALO NGA ESTASYON

"Hi Jesus nakigkayakan ngada han mga kababayen-an"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Han iya pagkadto ha kalbaryo gin-updan hi Jesus hin pipira nga kababayen-an mga nagtitinangis tungod ha iya. Diri hira nakakasantop kon kay-ano nga usa ka matadong ug buotan nga tawo ginsirotan hin pagkamatay ha krus. An ira pagtinangis kunta magpapagaan han kan Jesus paghihimakuri. Hi Jesus, han paglingi ha ira, nanginyupo ha ira nga diri hiya an pagtangisan, kundi tangisan unta nira an ngatanan nga mga tawo nga nagsasakit tungod han ira pagsalikway ha iya han ginbuhat sa Diyos dida ha iya. 

​

Pag-ampo

O mainantuson nga Manunubus, pinaagi han imo kalugaringon nga kinabuhi, gintutdoan ako nga an matadong ug maupay nga kinabuhi, diri pirme babalosan hin pagtahud ug pagdayeg han iba. Ha kasagaran ginpapahimuslan an buotan ngan ginsasalikway han iba, sugad han nahitabo ha Imo. Pinaagi han imo mga pag-antus, ipadangat ha akon an grasya hin pagtangis tungod han akon mga sala ug an grasya ha pagdayon pag-ukoy sumala han imo mga sugo han paghigugma, bisan kon ini nga gugma waray hatagi hin maupay nga pagtagad.

​

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

​

AN IKASIYAM NGA ESTASYON

"Hi Jesus iginraysang ha krus"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Inmabut hira ha dapit nga ginngangaranan nga Golgota. Didto ginpahigda hi Jesus dida ha krus ngan gintikangan nira an pagraysang ha iya ha krus. Gintagan hiya hin bino nga sinalaktan hin apdo basi niya imnon; Pagkatapus gin-alsa nira an krus ngan gintindog dida han gin-andam nga buho. Ngan iginraysang liwat in duha nga mga tulisan upod kan Jesus, an usa ha iya tuo ngan usa ha iya wala.

​

Pag-ampo

O mainantoson nga Manunubos ko, ha waray ruhaduha, gin-ilob Mo an pag-antus nga akon unta arantoson, an kasakit nga akon unta an magdadara. Kamaluya ko ha atubangan hin mga pag-antus ug pagsakripisyo! Raysangi an salaan nakon nga mga karuyagon han akon lawas, limpyohi an akon kasingkasing ha ngatanan nga magraut nga mga tinguha; putli-a an akon kasingkasing basi mag-ukoy ako ha dayuday dida ha imo Espiritu. Ayaw itugot nga makarag para ha akon an pag-gawas han imo mahal nga dugo.

​

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

​

AN IKANAPULO NGA ESTASYON

"An Tulisan nga Binasulan"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

An usa han mga tulisan nga iginraysang upod kan Jesus nagbiay-biay ha Iya hin pagsering, “Diri ka ba amo an Mesiyas? Talwasa an imo kalugaringon ngan talwasa kami!” Kundi an usa inabat hin kalooy ug pagbasul ngan tikang hin usa nga kasingkasing nga napuno hin pagbasul ug bag-o nga pagtoo nagsering kan Jesus. “Jesus, hinumdomi gad man ako kon kumadto ka na han imo ginhadian.” Ngan tikang han kihaladman han iya kasingkasing nagbaton hi Jesus, “Susumatan ko ikaw, yana ngahaw nga adlaw maupod ka ha akon ngadto ha Paraiso”. (Lk 23:42-43)

​

​

Pag-ampo

O Mahigugmaon nga Ginoo, nalipay an imo kasingkasing tungod han pagbasul hin usa nga makasasala! Ayaw itugot nga magmatig-a an akon kasingkasing tungod han sala, kundi ha dayuday magin-andam ako pagkarawat han imo grasya, labi na an grasya han pagbasul. Limpyohi an akon kasingkasing ha ngatanan nga mga magraut nga tinguha basi waray iba nga pamilngon kundi an imo la gugma. Diri unta ako mabuta han mga sayup ug sala han iba, kundi, sugad ha imo, magpabilin ako nga maloloy-on ug mapinasaylo-on hadton nakasala ha akon.

​

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

​

AN IKANAPULO KAG-USA NGA ESTASYON

"Hi Santa Maria ug San Juan"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Natukdaw hirani han krus ni Jesus hira iya Nanay an bugto nga babaye ni iya nanay, hi Maria nga asawa ni Cleopas, ngan hi Maria Magdalena. Hi Maria waray makasantop kon kay ano nga kinahanglan mag-antus ug mamatay ha krus an iya Anak. Pero an iya kasingkasing naglalaga hin gugma nga diri makapag-bulag ha iya han iya Anak, usa nga gugma nga nakadaug han ngatanan nga kahadlok. Hinkit-an ni Jesus hi iya Nanay ngan an tinun-an nga iya hinigugma. Nagsering hi Jesus han iya Nanay, “Babaye, aadi an imo anak.” Pagkatapos, nagsering hiya han iya tinun-an, “Aadi an imo Iroy” (Jn 19:26-27) Ngan tikang hadto nga takna, nanimangno hi Juan kan Maria hin miembro han iya panimalay.

​

Pag-ampo

Kadako han kasakit ngan nagdulot han kasing-kasing ni Maria Santisima samtang natindog hiya ha tiilan han krus han iya hinigugma nga anak! Nakada la hiya nga waray nahimo, waray tingog; kundi kaupod hiya han iya Anak dinhi hini nga katapusan nga takna. O Baraan nga Maria, akon Iroy nga langitnon, pun-a an akon kasingkasing hin tinuod nga pagbasul han mga sala ug buligi ako han ngatanan nga mga kakurian, labi na ha oras han akon pagkamatay.

​

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

​

AN IKANAPULO KAGDUHA NGA ESTASYON

"An Pagkamatay ni Jesus"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Han pagkaudto na nagsirom an bug-os nga tuna sulod hin tulo ka oras. May surudlan didto nga puno hin maaslom nga bino. Ginhumog nira an espongha hin bino, igintaod ha katapusan hin sanga hin isopo ngan iginhungit ha iya. Pagkadimdim ni Jesus han bino nagsering hiya, “Natuman na!” “Ngan dinmuko hiya ngan nabugtoan hiya han iya kinabuhi. “Natuman na!” ... mga pulong ini diri han pagkapirde, o pagkahulop, kundi mga pulong ini hin usa nga nakatuman nga manilampuson han iya misyon, an buruhaton nga iya turumanon tungod han gugma ha aton, iya gintuman ngan yana, may-ada Hiya hin kalinaw.

​

Pag-ampo

O gugma nga diri masantop! Nga nagpakamatay Ka para han mga makasasala! Ginpa-antus Ka tungod han akon mga sala, ngan natambal ako pinaagi han kastigo nga imo gin-antus. Ha waray ruhaduha, an imo gugma amo an nagbalhin han krus tikang han tigaman han kinabuhi ug paglaum Ha imo. Ginoo, ihahalad ko an akon waray katapusan nga pagpasalamat! Mag-ukoy na unta ako diri na dida han kasisidman han sala, kundi dida han kapawa han imo gugma.

​

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

​

AN IKANAPULO KAGTULO NGA ESTASYON

"An Paglubong kan Jesus"

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Vespera na han Adlaw nga Iparahuway han mga Judiyo. Sanglit ginpaspasan nira an pagtanggal han lawas ha krus ug an pag-andam han paglubong. Usa ka tawo, hi Jose nga taga-Arimatea, pinmalit hin busag nga dugnit, Hi Nicodemo, an tawo nga nakigkita hi Jesus ha usa ka gab-i, may dara nga kwarenta ka kilo nga pahamot nga may simalakot nga mira. Ginputos nira an lawas ngan iginsulod ha lubnganan nga inukab ha bato. Ginkaliding nira in dako nga bato hin pagsada han lubnganan. Binmunyog kan Jose an kababayen-an ngan nakakita kon ginunan-o hin pagbutang an lawas ni Jesus.

​

Pag-ampo

Waray pa maglapus an usa ka oras tikang han imo pagkamatay natuman na an imo kalugaringon nga pulong nga nasering, “Kakabigon nganhi ha akon an ngatanan nga mga tawo, kon isahon na ako ha tuna” (Jn 12:32). Kay an gahum han imo pagkamatay, an gahum han imo gugma nagkabig han kasingkasing hadton duha nga secreto mo nga mga tinunan hin pagpasamwak han ira pagtoo ha Imo. Nawara na an ira kahadlok, an ira pagkatalawan! An imo magpinasayloon nga gugma makahatag liwat ha akon hin kusog ha pag-ukoy hin dayag han akon pagtoo basi maginsaksi ako ha imo dida han akon adlaw-adlaw nga kinabuhi.

​

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

AN IKANAPULO KAG-UPAT NGA ESTASYON

"An Pagkabanhaw"

​

P: Nagsisingba ug nagdadayeg kami ha Imo, Jesukristo.

B: Kay tungod han Imo Santa Krus gintubos Mo an kalibutan.

​

Pamalandong

Maagahon pa gud han Domingo kinmadto na ha lubnganan an kababayen-an dara an mga pahamot nga ira gin-andam. Nahipausa ug nalisang hira! Ira nakita nga winaring na an dako nga bato han lubnganan! Sinmulod hira ha lubnganan pero waray nira hikit-an lawas han Ginoo. Samtang natindog hira didto nga nagugupong mahitungod hini, nakita hira in olitawohay ha may tuo. Ngan inalpan hira hin kakulba. Nagsering hiya ha ira, “Ayaw kamo kahadlok; maaram ako nga nagbibiling kamo kan Jesus nga taga-Nazaret nga iginraysang ha krus. Waray Hiya dinhi kay nabanhaw na Hiya!” (Mt 28:5)

​

Pag-ampo

O mahimayaon ug buhi nga Manunubos ko, Kristo Jesus! An imo pagkabanhaw ha ikatulo ka adlaw amo an nakadaug han sala ug han kamatayon! An imo pagkabanhaw amo an akon kinabuhi! An imo pagkabanhaw amo an akon paglaum! Ha kinabuhi kon ha kamatayon, imo ako. Buligi ako nga mag-ukoy ako diri la para han akon kalugarinon, kundi para liwat han kaupayan han akon igkasitawo, Ngan diri unta mahisangit an akon kasing-kasing han mga manggad dinhi ha kalibutan, kay waray ako permanente nga puruy-anan dinhi hini nga kinabuhi. Mag-ukoy ako unta tungod han gugma ko ha Imo, ikaw nga nagpakamatay tungod ha gugma Mo ha akon.

​

P: O Ginoo Jesukristo, ginraysang ha krus

B: Kalooye kami!

​

Amay namon…

Maghimaya ka Maria…

Himaya sa Amay…

​

​

KATAPUSAN NGA PAG-AMPO

​

“Labis an pagkalooy han Dios ha aton, ngan labi na an iya paghigugma ha aton, nga samtang mga patay pa kita ha esperitu tungod an aton mga pagtalapas, gin-banhaw kita Niya upod kan Kristo.” (Efesp 2:4-5)

​

Waray-katapusan nga pagpasalamat ha Imo, O mahigugumaon nga Manunubos, para han ngatanan nga mga kasakit nga Imo gin-antus tungod han gugma Mo ha amon; para liwat han bag-o nga kinabuhi nga Imo ginpadangat hin waray undang nga pagbubo ha amon. Karawata inin haliput nga pamalandong han Imo kasakit ug kamatay daw tigaman han akon paghigugma ha Imo. Tungod han imo grasya ug kusog makabangon unta kami tikang han amon pagkahalot ug mga kasal-anan ngan mahibaro kami hin paglakat, ha adlaw ngatanan, dida hin paglakat, ha adlaw ngatanan, dida hin bag-o ug hurohingpit nga kinabuhi upod ha Imo ug upod liwat han amon igkasitawo.

Daygon Ka, Ginoo namon nga Dios!

​