PAGHALAD

Mahigugmaon nga gayud nga Jesus Manu-nubos, kaupay ug kinabuhi han akon kalag; ihinahalad ko ha imo ini nga akon mga pagpalandong han mga kasakitan nga imo ginantos tikang didto ha hukmanan ni Pilato ngadto ha imo lubnganan. Bulige ako Ginoo, nga magmapulsanon ini nga akon pamalandong ug dida ha pagkilala ko han mga kasakitan nga imo binate tungod han akon mga sala, mahatultol unta ako hin paghinulsol ug mahibaro ako hin hingpit nga paghigugma ha imo. Amen.

Virgen Santisima, Iroy ko nga langitnon, updi ako, nanganganuyo ako ha imo, dida hini nga akon pagsulsog han dalan han kasakitan nga hadto gin-again han imo Anak basi akon pagpulsan hin paghigugma ha iya ha bug-os ko nga kalag. Amen.

​

1. Syahan nga Istasyon

AN KATAPUSAN NGA PANIHAPON

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

Kadam-an ginugutom dida hin pobre nga mga nasod ha bug-os nga kalibutan, tungod kay talagsa la an nahatag hin pagka-on ha ira. An ebanghelyo nagsususmat ha aton hank an Jesus pagpadamo han tinapay ngan isda para pagpaka-on han mga ginugutom. Padayon an Iya pagpakaon ha aton – han Iya kalugaringon dida han Yukaristiya. Hi Jesus an tinapay han kinabuhi. Aton pag-ukyan an kan Jesus ginbuhat pinaagi hin pagpaangbit han aton pagka-on, basi makaka-on an iba ngan magpadayon hin pagkinabuhi.

Amay Namon, Maghimaya ka Maria ug Himaya sa Amay…

​

2. Ikaduha nga Istasyon

AN PAGAMPO DIDTO HA GETSEMANI

​

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

May panahon nga diri naton napupudngan an kamasulob-on kundi kon aton pag-adman an pag-atubang hini, makakadara ini hin dako nga kaupayan. Nahatag ini hin panahon hin pagpamalandong, pagkilala hiton aton kahiladman nga kamaupay ug sugad man han aton paghibaro han aton mga kapakyasan ngan mga sayop. Samtang aton pinamamalandong an kan Jesus pagampo ha Getsemani, aton hibaru-an tikang ha Iya kun paunan-o an pagintrigar ngadto han Amay ug pagsugot ha Iya gud la.

Amay Namon, Maghimaya ka Maria ug Himaya sa Amay…

​

3. Ikatulo nga Istasyon

HI JESUS GINHUKMAN HA KAMATAYON

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

Kadam-an ka beses naghuhukom kita han iba. Aton hira ginhuhukman ha gawas la nga pamahongpahong ngan diri han ira sag-od nga kaupayan. Sanglit damo an nakokondinar ug nalilimbungan tungod han madagmit nga paghukom han iba. Nahinabo ini gihapon ngadto kan Jesus. Hihimo-on ba liwat ini naton ngadto han aton mga anyaw.

​

Amay Namon, Maghimaya ka Maria ug Himaya sa Amay…

​

​

4. Ika-upat nga Istasyon

HI JESUS GIN-SAKIT NGAN GINPUDONG-PUDONGAN HIN MGA TUNOK

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

Nagsering hi Jesus: “Kona no an iyo buhaton ngadto han iyo kabugtu-an, iyo ito ginbubuhat ha akon.” Ginhuhukman naton hi Jesus kon aton ginhuhukman an aton igkasi tawo. Padayon nga ginhuhukman naton Hiya ha kada panahon nga nagdudumiri kita pagbasol han aton mga sala ug dida hiton aton balik-balik nga pag pinakasasala.

​

Amay Namon, Maghimaya ka Maria ug Himaya sa Amay…

​

​

5. Ikalima nga Istasyon

HI JESUS NAGPAS-AN HAN KRUS

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

Kinahanglan mayada naton katuyuanan ha kinabuhi, usa nga direksyon ngan responsabilidad. An aton talagudti nga mga krus ha kabatasanan amo an aton adlaw-adlaw nga mga burohaton ngan mga responsabiledad. Kona ton ini pas-anon hin mapainubsanun nga paagi aton matutugkad an kahulugan bisan dida han gimamakuri-I ngan pinakamapait nga kahimtang.

​

Amay Namon, Maghimaya ka Maria ug Himaya sa Amay…

​

​

6. Ika-unom nga Istasyon

HI JESUS NAHIPARAKUP

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

An aton kinabuhi katarampuhan hin pagdarag-an ngan kapakyasan, mga luha ngan kalipay, kakuri-an ngan kawarayan. Diri kita nag-uukoy la dida hin kalipay o waray katapusan nga kasakitan. An kanan Dios hingyap para ha aton, amo an mag-ukoy kita hin kinabuhi nga mayada kahulugan. Hingyap Niya nga makit-an an kalayo han paglaum nga buhi dinhi ha aton ha butnga han mga pagsari ug mga kakuri-an, pamahongpahong ngan diri han ira sag-od nga kaupayan. Sanglit damo an nakokondinar ug nalilimbungan tungod han madagmit nga paghukom han iba. Nahinabo ini gihapon ngadto kan Jesus. Hihimo-on ba liwat ini naton ngadto han aton mga anyaw?

​

Amay Namon, Maghimaya ka Maria ug Himaya sa Amay…

​

​

7. Ikapito nga Istasyon

HI SIMON CIRINEO NAGBULIG KAN JESUS PAGPAS-AN HAN KRUS

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

Komo mga tawo nanginginahanglan kita han aton igkasi tawo. Sanglit, kaangayan la nga makig-angay kita han iba. Kundi may mga panahon nga nabulig kita han iba tungod kay nagpapamulat kita hin balos tikang ha ira. Iginhatag ni Jesus an Iya kinabuhi tungod kay nahigugma Hiya ha aton. Pakianhi daw naton an aton kalugaringon: “Nabulig ba ako han iba tungod kay may tinguha ko hin pagbulig o may ada ko lain nga panuyo?” Subda naton hi Jesus nga nag-alagad ngan nagtubyan han Iya kalugaringon nga waray ginpapamulat nga balos.

​

Amay Namon, Maghimaya ka Maria ug Himaya sa Amay…

​

​

8. Ikawalo nga Istasyon

HI JESUS GINSUGAT HAN MGA BABAYE HAN JERUSALEM

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

Kadam-an nga higayon gintatanding naton an aton kalugaringon ngadto han iba. Dinadayaw ta an aton kalugaringon ngan ginhihimo ta ini nga suklanan para han iba. Kundi kada usa ha aton, iba; kada usa mayada hatag han Dyos nga upa, talent ngan abilidad. Pakianhi ta an aton kalugaringon: “Ano an akon mahihimo para ha iba?”

Amay Namon, Maghimaya ka Maria ug Himaya sa Amay…

​

9. Ikaduha nga Istasyon

HI JESUS GINHUBUAN HAN IYA BADO NGAN GINRAYSANG HA KRUS

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

Kita nga mga tawo karuyag magpakita nga kaangayan kita respetohon ngan maupay pagkit-on. An aton pamahong-pahong importante para ha aton. Kita-a daw naton hi Jesus: dugo-on, samara ngan piol. Waray bisan ano dida ha Iya nga makakalukmay ha aton – kundi an Iya mga gin-antos resulta han Iya dako nga paghigugma para ha aton. Pakianhi ta an aton kalugaringon: “Ano iton aton pipili-on – an ha gawas nga kahusay pinadisan hin malimbong nga kasingkasing o maraut nga bayhon nga pinadisan hin putli ngan mahusay nga kasingkasing?”

Amay Namon, Maghimaya ka Maria ug Himaya sa Amay…

​

​

10. Ikanapulo nga Istasyon

AN PINASAYLO NGA KAWATAN

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

Masayon naton hingalimtan an napulo nga mag-upay nga mga buhat hin usa la nga sayop. Halipot la iton aton panlantaw ngan mayada kita hilig hin maghukom han iba nga tawo. Di ba maupay kon subdon ta hi Jesus? Iya hinkakalimtan an aton magsirom nga mga naglabay, natapod han aton kamaupay ngan pinapasaylo an aton mga sala.

​

Amay Namon, Maghimaya ka Maria ug Himaya sa Amay…

​

​

11. Ikanapulo Kag-usa nga Istasyon

HI MARIA NGAN AN HINIGUGMA NGA TINUN-AN HA TIILAN HAN KRUS

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

An kamay-ada iroy usa nga gidadako-i nga surundanon. Dida han pagintriga ni Jesus kan Maria, an Iya minayuyo nga nanay ngadto han Iya hinigugma nga tinun-an, Iya liwat ginhatag ha aton an Iya iroy. Pasalamatan naton an Ginoo nga gintagan kita kan Maria nga magin aton liwat kalugaringon nga Iroy.

​

Amay Namon, Maghimaya ka Maria ug Himaya sa Amay…

12. Ikaduha nga Istasyon

AN PAGKAMATAY NI JESUS

​

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

​

Makuri an pagkarawat han kamatayon hin usa nga suok ha aton. Naabat kita hin kamingaw, kabido ngan kon usahay hin pagduda: “Kay ano nga an akon pa hinigugma nga nanay? Kay ano nga an akon pa suok nga sangkay? Kay ano nga an mga inosente pa nga mga tawo?” Lugaring kay an kamatayon amo an ganghaan nga mahi-uusa kita han Dyos ha kadayunan.

​

Amay Namon, Maghimaya ka Maria ug Himaya sa Amay…

​

​

13. Ikanapulo Kagtulo nga Istasyon

HI JESUS GINHULID HA LUBNGANAN

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

Mas kinikilala ta an ka importante han tawo kon hiya naawara. Binabayaan kita nga an aton la nahinunumduman ha iya, amo la an iya mga pulong, buhat ngan mga ehemplo. Bisan kon hi Jesus binmalik na ngadto han Iya Amay, ginbilin ha aton an Iya mga pagturun-an ngan mga buhat nga amo an nakakahimo ha Iya nga buhi dinhi ha aton. OO, buhi pa Hiya hasta ngada yana. An maupay nga sumat nga hi Jesus nabanhaw ngan buhi, sadang mahikit-an dinhi ha aton mga kinabuhi.

​

Amay Namon, Maghimaya ka Maria ug Himaya sa Amay…

​

​

14. Ikanapulo Kag-upat nga Istasyon

AN PAGKABANHAW NI JESUS

M: Nagsisingba ug nagdadayeg kami ha imo, Ginoo Jesucristo.

B: Kay dida han Imo santa krus ug Imo pagsakit, gintubos mo an kalibutan.

​

Pamalandong:

An putok han aton mga kasingkasing naiiba kon aton ginkikita an aton daan ngan maupay nga kasangkayan ngan nahiyom dayon kita kon nakulaw kita han mga tawo nga aton ginhihigugma. An pagkabanhaw ni Cristo nagdara hin kalipayan ngadto han Iya mga tinun-an. Nawara an ira mga kasakitan ngan mga kahadlok. Kita liwat naglilipay nga nabanhaw hi Jesus tikang ha mga minatay. Hiya an aton rason kon kay ano nga mayada kita paglaom.

Amay Namon, Maghimaya ka Maria ug Himaya sa Amay…

Katapusan nga Pag-ampo

M: Salamat Ginoo han pagtalwas Mo ha amon tikang han sala.

B: Nagpapasalamat kami ha Imo, O Ginoo.

​

M: Salamat Ginoo han Imo mahigugmaon ngan mapasinayloon nga kasingkasing.

B: Nagpapasalamat kami ha Imo, O Ginoo.

​

M: Tutdui ngan pagunhi kami Ginoo, Ngadto han waray katapusan nga kinabuhi.

B: Amen.

​

(Amay Namon…, Maghimaya ka Maria…, Himaya sa Amay… para han panuyo han Santo Papa)