TUNGOD HAN TIGAMAN

Tungod han tigaman han Santa Krus,

ha amon mga kaaway,

bawion mo kami Ginoo nga Dios namon.

Ha ngaran han Amay, ug han Anak,

ug han Espiritu Santo. Amen.

​

​

AMAY NAMON

Amay namon nga aada ka ha mga langit,

pagdayawon an imo ngaran,

ikanhi mo ha amon an imo ginhadi-an;

ipasunod an imo pagbuot

dinhi ha tuna sugad han pagsunda didto ha langit.

Tagan mo kami niyan

han karan’on namon ha ikinaadlaw;

pagwad-on mo an amon mga sala

sugad han pagwara namon han nakasala ha amon;

ngan diri mo kami bayaan basi diri

kami pagdag'on han mga panulay, kundi

bawi-a kami ha mga karat-an.

Amen.

​​

MAGHIMAYA KA MARIA

Maghimaya ka Maria nga puno ka hin grasya,

an Ginoo nga Dios aada ha imo,

gindadayaw ka labi han mga babaye ngatanan

ngan gindadayaw man an bunga han tiyan mo nga hi Jesus.

Santa Maria, Iroy han Dios,

ig-ampo mo kami an magpakasasala,

yana ug ha oras han amon ikamatay.

Amen.

HIMAYA HA AMAY

Himaya ha Amay ug ha Anak ug ha Espiritu Santo.

Sugad hadton tinikangan, yana ug ha kadayunan

ug ha ngatanan nga katuigan.

Amen.

NATOO AKO

Natoo ako han Dios,

Amay nga makagarahum,

magburuhat han langit ug han tuna,

ug kan Jesucristo, iya bugtong nga Anak ug aton Ginoo;

Nga iginpanamkon ha gahum han Espiritu Santo;

igin-anak ni Virgen Maria:

ginsakit ha sugo ni Poncio Pilato;

iginraysang ha kros,

namatay ug iginlubong,

linusad ngadto ha kahiladman.

Ha ikatolo kaadlaw nabuhi liwat.

Sinaka ha langit,

ngan nalingkod ha tuo han Amay.

Mabalik ngahaw paghukom han mga buhi

ug han mga patay.

Natoo ako han Espiritu Santo,

han Santa Iglesia Catolica;

han pagkaangbitan han mga santos,

han pagwara han mga sala;

han pagkabuhi han mga lawas

ug han kinabuhi nga dayon.

Amen.

​

PAGBASUL

O, Ginoo ko!

ha bug-os nga kasingkasing ko

nabibido ako nga naglaris ako ha imo,

ngan ginbabasulan ko an ngatanan nga mga sala ko,

kay nahadlok ako hin diri pakasangput ha langit

ug han kahulog ha kahiladman;

kundi labi na tungod kay ini nga mga sala

iginpapasipara ko ha imo, Diyos ko,

an waray katapusan nga kamaupay,

ngan labi katakus han akon higugma.

Yana hugot an akon pagtinguha hin pagkompisal

ug pagbalhin han maraut ko nga kinabuhi.

Amen.

​

GINOO KO JESUCRISTO

Ginoo ko Jesucristo,

matuod nga Dios ug matuod nga tawo,

Magburuhat ug Manunubos ko,

nagbabasul ako nga gayud

han akon mga sala ngatanan

ha bug-os nga kasingkasing ko,

kay nahigugma ako ha imo

labi han ngatanan kay Dios ka man.

Nagtutuyo ako hin diri na pakasala liwat;

igkokompisal ko an akon mga sala ngatanan;

naglalaum ako nga pagwawad’on mo

an akon mga sala ngatanan

tungod han mahal nga pagkasakit

ug pagkamatay mo ha krus tungod ha akon.

Amen.

​

MAGHIMAYA KA REYNA

Maghimaya ka, Reyna, Iroy han kalooy!

Kinabuhi, kinatam-is ug ginlalauman namon,

maghimaya ka; nagpapanawag kami ha imo,

an mga pinanhinginlan nga mga anak ni Eba.

Kami ha imo nangangaraba, nagngongoyngoy

ug nananangis dinhi hinin kalibutan nga luhaan.

Tara, Señora, nga mag-arampo ka namon,

ilingi mo ha amon an imo mga mata nga maloloy-on.

Ngan kon tapos na an panghingilin,

ipakita mo ha amon an imo anak. hi Jesus.

Ay maaghupon, ay maloloy-on,

ay matam-is nga Virgen Maria.

Ig-ampo mo kami santos nga Iroy han Dios.

Basi kami matakus pagsangput han mga isinaad ha amon ni Jesucristo.

Amen.

MAKASASALA AKO

Makasasala ako,

nagkokompisal ako ha aton Ginoo nga Dios

nga makagarahum han ngatanan,

kan Santa Maria, Virgen gihapon,

kan San Miguel Arkanghel,

kan San Juan Bautista,

han mga santos apostol, San Pedro ug San Pablo

ug han mga santos ngatanan,

ngan ha imo man padre,

kay nakasala ako nga gayud ha hunahuna,

ha pulong, ha buhat, ha akon sala, ha akon sala,

ha akon dako nga gayud nga sala.

Busa nag-aampo ako kan Santa Maria, Virgen gihapon,

kan San Miguel Arkanghel, kan San Juan Bautista,

han mga santos apostol, San Pedro ug San Pablo,

han mga santos ngatanan, ngan ha imo man padre,

ig-ampo mo ako ha aton Ginoo nga Dios.

Amen.

​

HA PAGKAON

(San-o kumaon):

Ha ngaran han Amay…

Bendisyone kam Ginoo,

lakip ini nga mga hatag nga amon yana kakarawaton

tikang han imo kamahinatagon.

Tungod kan Jesucristo nga amon Ginoo.

Amen.

(Human pangaon):

Nagpapasalamat kami ha imo,

tungod han ngatanan nga imo mga hatag,

makagarahum nga Dios,

nga buhi ug naghahadi ka ha ngatanan nga katuigan.

Ha ngaran han Amay…

​

​