PAG-AMPO SAN-O KUMARAWAT

O Jesus, tungod kay imo ini igintutdo,

takus inin akon pagtoo

nga ini nga tinapay nga akon kakaunon

amo an imo ngahaw lawas ug dugo;

nagtotoo ako nga dida hini nga akon pagkarawat,

ikaw Ginoo an makadi pag-ukoy ha akon kalag.

O Jesus, igintutug-an ko

nga usa la ako nga makalolooy nga makasasala

ngan diri na gayud ako takus kumarawat ha imo

dinhi ha akon dughan.

Ginoo diri ako takus nga sumulod ka

dinhi han ubos nga puruy’anan han akon kasingkasing,

kundi kon luwason mo an pulong hin pagpasaylo

mag-uupay an akon kalag.

Marahalon nga Jesus,

hinihigugma ko ikaw ug ha bug-os nga kasingkasing

naghihingyap ako hin pagkarawat ha imo.

Kadi na gad ha akon dughan,

igbuhi ha akon an imo lawas ug dugo

basi mahiusa na ako ha imo hin hingpit.

Jesus nga kinabuhi han kalag ko,

kadi-a na ini nga makapapaid nga anak mo

kay waray lain nga nga magtatambal han akon kamaraut,

magpapakusog han akon kamaluya,

maghuhugas han akon kamahugaw

kon diri ikaw nga akon manunubos.

Binubok’an ko ini nga akon kasingkasing;

kadi-a na Jesus, pag-okye

ngan paghadii ngadto ha akon ikamatay.

Amen.

O gipuputlii nga Iroy ni Jesus,

Matagbalay dinhi ha akon yana

adto nga Dios nga labi ka-uray nga tiyan mo.

Basi makalipay ha iya ini nga paglaoy ha akon,

ikaw gad an pag-andam han akon kasingkasing

basi matakus nga iya puroy’anan.

Badu-i ako han kaputli ug han kamapainubsanon,

pagsab-ungi inin kalag ko

han tim-os nga paghigugma ha iya

ngan tutdo-i ako kon uunanhon

in pagpaawil ha iya dinhi ha akon dughan.

Amen.

PAG-AMPO HUMAN KARAWAT

Mahigugmaon nga Jesus,

salamat hin madamo hini nga imo hatag ha akon,

an imo ngahaw kalugaringon nga lawas.

Maupay nga imo pag-abot nganhi han akon kalag, Ginoo.

Hunahuna ug kasingkasing ko, lawas ug kalag ko,

pagdayeg ug pagsingba kamo ha iya

ha ngatanan nga mga katuigan.

O Jesus, igintubyan mo ha akon

an bug-os mo nga kalugaringon

dida hini nga pagkarawat ko han imo

labi nga ka marahalon nga lawas ug dugo.

Ano man in sadang ko igbalos hini nga imo kalooy?

Bisan kon diri ako takus, iginhahalad ko man ha imo Ginoo

an bug-os ko nga kinabuhi.

Tubyan ko ha imo inin akon lawas

basi na magamit hin pag-alagad ug pag-ataman ha imo.

Tubyan ko ha imo inin akon kalag

basi diri na pag-oripnon han mga kasal’anan.

Tubyan ko ha imo inin akon hunahuna ug kaburot’on

basi mamiling na hin paghiusa ha imo.

Tubyan ko ha imo an bug-os ko nga kalugaringon

basi ma imo na ako, Ginoo, ha dayon nga katuigan.

Humunob unta Jesus dinhi ha akon kalag

an dugo nga imo igin-ula didto ha krus

basi mawara ug mapara na an iya kamalaris ha imo.

Waray pa man katapos an paghugay ha akon han mga panulay

kay iini pa ako ha tuna,

mahinumdom unta ako Jesus,

hin pag-ayup ha imo kon ako pagpapanulayon

basi hito nga  takna pakusgon mo ako hin pag-ato han sala.

Magma-Cristiyanos unta Ginoo, inin akon kinabuhi

basi ma-Cristiyanos man an akon kamatayon;

ngan dida kon humarani na an akon paghingutas,

pakarawata gad ako anay, Manunubos ko,

hini nga imo lawas ug dugo

basi ikaw in akon kaupdan pagsulod

ngadto  ha kadayunan.

Ihinahalad ko ha imo Ginoo,

ug karawata an akon hunahuna ug kasingkasing,

an akon kaburot’on ug panumduman,

an ngatanan ko nga butang

ug an ngatanan nga aanhi ha akon.

Imo ini mga hatag ha akon

ibinabalik ko ngahaw ha imo.

Imo ini ngatanan,

pagladngi sugad han imo gugma

ug han imo grasya ngan ini igo na ha akon.

Amen.

O, Iroy nga langitnon,

bulige gad ako hin paglipay kan Jesus

nga aadi na ha akon dughan.

Sugad han pag-ataman mo ha iya didto ha Belen ug ha Nasaret,

mahibaro man unta ako hin pag-ataman ha iya

dinhi ha akon kalag basi diri ako niya bulagan,

lugod magpadayon ako  

hin pagsugot ug pagsunod ha iya.

Amen.

(Pamalandong nga aada hi Jesus ha imo dughan. Pakihimangraw ha iya sugad han binabati han imo kasingkasing. Pamati kon ano an mga hilum nga iya huring han imo kalag.)