PAG-AMPO

Ginoo ko, Jesucristo,

nga tungod han gugma mo han mga tawo,

napabilin ka ha adlaw ug gab-i

dida hini nga Sacramento,

puno hin kalooy ug hin gugma;

nahulat, nagsasangpit ug natapo

han ngatanan nga nakanhi hin pagduaw ha imo;

natoo ako nga iini ka hini nga Sacramento ha altar.

Nagsisingba ako ha imo, bisan kon diri takus,

ug nagpapasalamat ako ha imo

tungod han ngatanan nga mga grasya

nga imo iginhatag ha akon,

labi na tungod kay naghatag ka ha akon

han imo kalugaringon dida hini nga Sacramento,

tungod kay gintagan mo ako han gisasantosi nga Virgen Maria

nga akon mananabang,

ngan tungod kay gintawag mo ako

hin pagduaw ha imo dinhi hini nga Singbahan.

Yana, nagsisingba ako han imo

mahigugmaon nga gayud nga kasingkasing.

Tungod hinin tutulo nga tuyo:

s’yahan, tungod hin pagpasalamat ha imo

hini nga dako mo nga hatag;

ikaduha, pag-uma ha imo tungod han mga pagpasipara

nga gin-aantos mo dida hini nga Sacramento

tikang han imo mga kaaway;

ikatolo ,pagsaurog ha imo didi hini nga akon pagduaw,

didto ha ngatanan nga mga dapit

diin aada ka hito nga Sacramento,

kundi ginpapabay’an ka la ug diri gintatahud.

Jesus ko, hinigugma ko ikaw

ha bug-os ko nga kasingkasing.

Nasasakit ako kay ngada yana,

nakadamo gud ako pagpasipara

han imo waray katapusan nga pagkamaupay.

Dida han pagbulig han imo grasya,

magtatalinguha ako hin diri na paglaris ha imo

hinin mga adlaw nga tidaraon;

nga yana, bisan kon taramayon ako ug diri takus,

naghahalad ako ha imo han akon kalugaringon;

iginhahatag ngan itinotubyan ko dida ha imo mga kamot

an bug-os ko nga kaburot’on,

an akon mga pagbati, an akon mga hingyap,

ug an ngatanan nga aanhi ha akon.

Tikang yana, ikaw, sugad han imo karuyag,

in pagbuot ha akon ug han ngatanan nga aanhi ha akon.

Amo la in akon pinangangaro ha imo

ug akon ginhihingyap an imo santos nga higugma,

an pagpadayon hin kamatadong ngadto ha akon kamatay

ug an hingpit nga pagtuman han imo kaburot’on.

Igin-aampo ko ha imo

an ngatanan nga mga kalag ha purgatorio,

labi na adton mga naghupot dinhi ha tuna

hin dako nga paghigugma

han gisasantosi nga Sacramento ha altar

ug han gisasantosi nga Virgen Maria.

Igin-aampo ko liwat ha imo an ngatanan nga makasasala.

Ha katapusan, hinigugma ko nga Manunubos,

inuusa ko an akon mga tinguha

han mga tinguha han mahigugmaon nga gayud nga imo kasingkasing:

ngan kon mahiusa na, ihinahalad ko

han Dios Amay, nga waray katapusan,

ngan nangangamuyo ako ha iya, ha imo ngaran,

nga tungod han imo higugma,

karawaton unta niya ug itubyan ini nga mga tinguha.

Amen.

O Santo Sacramento Han lawas ni Jesus.

Dayegon ka Ginoo Hinigugma nga takus.

​

​

PAGKARAWAT NGA ESPIRITUHANON

​

Jesus ko, hugot an akon pagtoo

nga iini ka hini nga gisasantosi nga Sacramento.

Nahigugma ako ha imo labi han ngatanan;

ug naghihingyap ako pag-angkon ha imo

didi ha sakub ha akon dughan.

Kundi sanglit kay diri man ako yana nakomulga,

bisan na la ha espirituhanon nga pagdu-aw,

kadi-a Ginoo, inin akon kalag.

Nga sugad hin aadi ka na ha akon kasingkasing,

pasandiga ako, Jesus dida ha imo diosnon nga dughan;

inousa ko an akon kalugaringon ha imo;

ayaw na itugot, Jesus ko,

nga mahimulag pa ako ha imo ngada ha akon ikamatay.

Amen.

Amay Namon…

Maghimaya ka Maria…

Himaya ha Amay...

Natoo Ako...

PAG-AMPO KAN MARIA SANTISIMA

​

Gisasantosi ug putli nga Virgen Maria, akon Iroy,

Iroy han akon Manunubos ug hadi han kalibutan,

 an mananabang, an paglaum

ngan an darangpan han makasasala,

nadaraon ako yana,

an labi ka-makasasala nga imo anak.

Puno hin pagpaubos,

nagsasaurog ako ha imo, hadi han langit,

ug nagpapasalamat ako tungod han ngatanan

nga mga grasya nga imo iginhatag ha akon ngada yana,

labi na nga gintalwas mo ako

ha kahulog ngadto ha kalayo nga dayon

nga angay ko na unta yana himutangan

tungod han akon mga pakasala.

Nahigugma ako ha imo, Iroy ko,

ngan tungod hini nga gugma,

nagsasaad ako hin pag-ataman ha imo

ha ngatanan nga adlaw ug pagkabig man liwat

han iba nga kasingkasing hin paghigugma ha imo.

Ibinubutang ko dida ha imo an ngatanan ko nga paglaum;

an akon himaya nga dayon itinatapod ko ha imo mga kamot.

Karawata ako nga imo oripon

ug ibutang ako ha ubos han landong

han imo mga kalooy, O Iroy han kalooy.

Ngan tungod kay dako man

an imo gahum ha atubangan ban Dios,

bawi-a ako ha ngatanan nga mga panulay;

kon diri man, tagi ako hin kusog

nga diri ako nira pagdag’on.

Nangangaro ako ha imo

hin hingpit nga higugma kan Jesucristo.

Naglalaum ako nga tungod han imo pagbulig,

magmamaupay an akon kamatayon.

Gisasantosi nga Iroy, tungod han imo higugma han Dios,

nangangamuyo ako ha imo

nga imo ako buligan ha ngatanan nga adlaw,

labi na dida ha katapusan nga takna han akon kinabuhi.

Ayaw ako baya-i ngada ha paghikit’i mo ha akon

nga aadto na ha langit nagsasaurog ug nagdadayaw

han imo mga kalooy ha ngatanan nga katuigan.

Amen.

San Jose, mananabang han singbahan,

han mga panimalay ug han maupay nga kamatayon,

ig-ampo mo kami.